پخواني ډپټي اټارني جنرل يا څارنوال خورشيد اېډوکېټ د وزیراعظم عمران خان پرضد د پېښور په هايکورټ کې د عدالت د سپکاوي په مقدمه کې موقف خپل کړی چې د امریکې د وروستي سفر په مهال وزیراعظم عمران خان په امریکا کې د بندي پاکستانۍ ډاکټر عافيه صدیقي او پاکستان کې بنديوان ډاکټر شکيل افريدي په اړوند په ورکړي بيان کې د عدالتي فېصلې سپکاوی کړی دی.
د نوموړي په وېنا د صديقي په بدل کې د افريدي د خلاصولو بيان د پېښور هايکورټ د ۲۶ فرورۍ کال ۲۰۱۹ د هغه فېصلې پرضد دی چې پکې ياد عدالت ډاکټر شکيل افريدی کوم بل هېواد ته د نه سپارلو او د صوبې د جېل نه بلې صوبې ته د نه لېږلو او د هغه د خلاصولو دپاره د پټې لوظنامې نه حکومت منع کړی دی.
ياده فېصله هم د پېښور هايکورټ د خورشيد اېډوکېټ له دې نه وړاندې په کړي خواست کې اورولې وه.
نوموړ ی وکيل وايي، د يوې صوبې نه بلې صوبې د لېږلو قانون شته خو د ملک نه بهر داسې نه شي کېدی او د حکومت سره داسې اختيار نشته.
په ډاکټر شکيل افريدي تور دی چې هغه د خېبرپښتونخوا په اېبټ اباد ښار کې د القاعده د وژل شوي مشر اسامه بن لادن په مالولو کې د امریکا د استخباراتي ادارې سي ايي ای مرسته کړې وه.
خو نوموړي ته په قبايلي ضلع خېبر کې د يوې غېر قانونه ګرځول شوې ډلې لشکر اسلام سره د اړيکو په تور کې سزا ورکړی شوې وه. هغه دا وخت د پنجاب صوبې په ساهېوال ښار کې په يو سخت امنيتي زندان کې بنديوان دی.
د قبايلي ضلعو په خېبرپښتونخوا کې ورګډېدو وروسته د ډاکټر شکيل مقدمه د پېښور هايکورټ ته راوړل شوې ده.
د هغه وکيل قمر نديم وايي د را روانې مياشتې په ۲۴م نېټه به د هغه د مقدمې اورېدنه کيږي. هغه وويل په ۲۴ م ستمبر به استعاثه او د دفاع وکيل خپل دلايل وړاندې کوي.
عمران خان چې په وروستيو کې امریکا ته سفر کړی او هغه يوې امریکايي خبري ادارې سره په خبرو کې د شکيل افريدي په اړوند د شوې پوښتنې په ځواب کې ويلي ؤ زمونږ هم يوه ناتوانه ښځه عافيه صدیقي په امریکا کې بندي ده او مونږ د دواړو يو بل په بدل کې د ورکولو خبرې کولی شو.
د عمران خان د سفر نه وړاندې د شکيل افريدي وکیلانو او د کورنۍ غړو د دواړو هېوادونو په واکمنو د شکيل افريدي معاملې ته د کتنې غوښتنه کړې وه.
قمرنديم وايي، دا خو ټولې دنيا ته پته ده چې کله د امریکې دوره وي او اهم کسان لاړ شي او هغوي پکې د ډاکټر شکيل افريدي په باره کې خبره ونه کړي دا خو کېدی نه شي. په دې به خبرې شوي او د هغه په خيال په دې به ښه په طريقې سره خبرې شوي وي.
شکيل افريدي ته په کال ۲۰۱۲ کې د ۳۳ کالو د بند سزا اورول شوې کومه چې وروسته لس کاله راکمه کړی شوې وه.
