د افغانستان د دفاع او کورنیو چارو وزارتونو د جنسیت کمټیې په غونډه کې د دفاع وزیر اسدالله خالد ويلي دا مهال په پوځ کې ۲۴۱۱ تنه مېرمنې دنده ترسره کوي او د هرکال په تیرېدو سره د افغان پوځ په لیکو کې د مېرمنو ونډه مخ په زیاتیدو ده.
اسدالله خالد وايي کوشش کوي چې په هېواد دننه له دفاع وزارت څخه نیولې تر پوهنتونونو پورې افغان مېرمنو ته د زده کړو ډېره مناسبه فضا رامنځته کړي.
په ورته وخت کې د کورنیو چاو وزیر مسعود اندرابي د پولیسو په لیکو کې هم د افغان ښځو د شاملېدو د شمېر زیاتوالي خبر ورکړ.
اندرابي وايي د افغانستان د ملي پولیسو په چارو کې ۳۷۰۰ مېرمنې دندې لري چې ۴ سوه یې په ملکي برخو کې او ۳۳۰۰ په نظامي برخو کې خپلې چارې مخ ته وړي.
نوموړی وايي د پولیسو په لیکو کې د مېرمنو ونډه زیاته شوې او یوازې په تیرو اته میاشتو کې۲۰۰ ښځې د پولیسو په دندو کې شاملې شوې دي.
د پوځي چارو څیړونکی جنرال عتیق الله امرخیل له ډیوې سره په خبرو کې وايي په هره کچه کې د پولیسو او امنیتي ادارو کې د مېرمنو ونډه زیاتیږي په افغانستان کې د جرایمو په کشف،ثبات او د امن په ټینګښت کې به یې رول اغیزمن او مهم وي.
نوموړي وویل "د نړۍ اکثره هېوادونو په امنیتي ادارو کې افسرانې مېرمنې دنده مخته وړي او په افغانستان کې چې دا مهال جګړه روانه ده باید د نارینه افسرانو پرځای ښځینه افسرانې په غېر محاربوي ادارو لکه په لوژجستیک او مخابرې، کشف او استخباراتو په برخه کې ګمارنه اړینه ده او د نارینه په پرتله په مېرمنو کې فساد او اختلاف شتون نه لري نو له همدې امله په امنیتي ادارو کې د مېرمنو ونډه ډیره ارزښت لري".
د افغانستان د کورنیو چارو زیر مسعود اندرابي د جنسیت کمیټۍ د جوړې غونډې پرمهال نن د زيارت، پنجشنبې په ورځ د افغان امنیتي سرتیرو د تلفاتو په کچه کې د ۱۰ فیصده د کموالي خبر ورکړ او وې ویل چې د افغان ځواکونو پوځي وړتیا د تیرو کلونو پرتله دامهال ۲۶ سلنه لوړه شوې ده.
اوس مهال د افغانستان امنیتي ځواکونو شمېر د دفاع وزارت په وینا له ۵ سوه زره څخه زیات دی او له ترهګرۍ سره مبارزه او ټولې امنیتي چارې له ۲۰۱۴ کال وروسته افغان پوځ یې د نړیوالو ځواکونو سره په همغږۍ په خپله سمبالوي.
