د افغان سولې لپاره د امریکا خاص استازی زلمی خلیلزاد وایي، د بېن الافغاني مذاکراتو د پېل لپاره د ځنډ هېڅ پلمه نه ده پاتې.
خلیلزاد د قاصد مرکز پر مشرعبدالباقي امین وروستی برید غندلی او وایي اوس ددې وخت دی، چې ټول لوري تاوتریخوالی کم او زر تر زره بین الافغاني خبرې پیل کړي.
نوموړی وایي، د عبدالباقي امین قاتلین هڅه کوي، په دغه راز کړنو سره د سولې پر وړاندې خنډونه رامنځته کړي.
خلیلزاد زیاته کړې، تر ټولو غوره لار دا ده چې د جګړې شدت راکم او بین الافغاني مذاکرات زر تر زره پېل شي.
مرحوم عبدالباقي امین په کابل کې د پوهنې وزارت د علمي شورا رییس وو، چې وړمه ورځ په کابل کې کور ته نزدې په یوه چاودنه کې ووژل شو.
د افغان حکومت او وسلوالو طالبانو د بېن الافغاني خبرو په وړاندې لوی خڼډ د طالب بندیان خوشي کېدل یادیږي ، خو افغان حکومت په دې وروستیو خبرداری ورکړی ، چې افغان حکومت ځکه د طالب بندیانو د خوشي کېدو پروسه درولي ، چې د افغان حکومت ځینې کمانډو او پیلوټان چې له طالبانو سره بندیان دي تر اوسه طالبانو نه دي خوشي کړي .
د افغانستان د ملي امنیت سلاکار حمدالله محب په کابل افغان پوځیانو د پوځي تطبیقات پر مهال په خپلو خبرو کې ویلي چې دوی ځکه د طالب بندیانو د خلاصون پروسه درولې، چې طالبانو د افغان حکومت ځینې مهم بندیوان، چې د کمانډو سرتېري او پیلوټان دي ، نه دي خوشي کړي.
ښاغلي محب ویلي "زه غواړم چې د افغانستان خلک په دې پوه شي ،چې زمونږ کماڼدویان چې له طالبانو سره دي ، طالبانو نه دي خوشي کړي، مونږ په تمه یو چې زمونږ بندیان خوشي شي او مونږ هم د دوی وروستي بندیان هم خوشي کړو".
د افغانستان دفاع وزیر اسدالله خالد هم د افغان پوځیانو د نظامي تطبیقاتو پر مهال رسنیو ته ویلي ، چې د طالبانو ځینې بندیوان بېرته د جنګ لیکو ته ستانه شوي ، چې ځینې یې د جنګ په ډګر کې مړه شوي هم دي .
ښاغلي خالد وویل "په دې هم پوهېدلي یو ، چې ځینې خوشي شوي زندانیان بېرته د جنګ لیکو ته تللي ، حتی د جنګ پرمهال وژل شوي دي".
دا په داسې حال کې ده چې لا هم د بېن الافغاني مذاکراتو نېټه نه ده معلومه شوې، او لامل یې هم ظاهراً د څلور سوه هغو لانجمنو طالب بندیانو مسئله ده چې د افغان حکومت په خبره د درنو جرمونو دوسیې لري، خو د دوی د خلاصون په اړه د ولسمشر د فرمان له مخې له ډلې یې تر دې دمه یوازې ۸۰ کسان ازاد شوي دي.
طالبانو وړاندې رسنیو ته ویلي چې د دوی له لوري د دغو مذاکراتو لپاره اجنډا بشپړه شوې او تر هغه به د مذاکراتو مېزلاړ نه شي تر کومه چې په خبره دا ټول څلور سوه بندیان یې افغان حکومت ازاد کړي نه وي.
خو افغان حکومت ادعا کوي ، چې د طالبانو د افغان حکومت کم شمېر مهم بندیان چې پیلوټان او کماڼدویان دي ، نه دي خوشي کړي.
