ځايي خبريال چې نوم يې پټ ساتل غوښتل، وي او اې ډيوه ته وويل چې د کريمې بلوڅ په جنازه کې ډيرو نارينه ، ښځينه سياسي، مدني فعالانو او خبريالانو ګډون غوښته، خو د حکومت له لوري د کريمې د کلي په ټولو لارو کې د ايف سي ځواک سرتيري ځاي پر ځاي کړل شوي و، او خلګو ته يې د هغې کلي ته د تللو اجازه نه ورکوله ۔
دغه خبریال وویل،
"جنازه وشوه په جنازه کې يوازي د هغې کورنۍ او د تمپ کلي خلکو ته د شرکت اجازه وه، خو هغه هم په کم شمېر کې ، دا د سيمې لومړۍ جنازه ده چې ښځو هم پکي ګډون درلود، ضلعي حکومتي چارواکي ، له تېرې شپې راهيسې پوليس او د امنيتي ځواکونو سرتيري پر قبرستان شاه وخوا ولاړ و، موږ ډېر کوشش وکړ چي هلته د هغې جنازې ته ورشو خو و تمپ سيمه ته د تللو ټولې لارې تړل شوې، د ايف سي يو مېجر موږ راوګرځولو، راته ېې وويل چې هېڅوک هم نشي تللای"۔
د کريمې بلوڅ له جنازې خلک راګرځول او خلګو ته اجازه نه ورکولو په حقله مو د بلوچستان حکومت له ايالتي ترجمان لياقت شاهواني سره د موبايل فون او وټساپ له لارې تماس ونيوه ،هغه ته مو په غږ کې پېغام پرېښود ،خو د رپورټ د جوړولو تر وخته يې ځواب ونه وايه۔
د دې تر څنګ د بلوچستان د اعلا وزير جام کمال مشېرې بشرا رند هم زموږ ټیلیفوني اړېکې ته ځواب ونه وايه ۔
د بلوچ زدکونکو سازمان " بي ايس او ازاد " پخوانۍ مشره کريمه بلوچ له تېرو څو کالو راهيسي د کېنډا په ټورنټو ښارکې سياسي پناه اخيستې وه او د جلا وطنۍ ژوند يې تېراوه ، د 2020م کال د دسمبر پر 20مه د کېنډا په ټورنټو ښار کې د هغې مړی له اوبو رايستل شوی و۔
د کريمې کورنۍ او بېلا بېلو بلوڅو سياسي تنظيمونو د هغې مړينه يوه منظم وژنه / يا قتل بللی خو د کېنډا پوليسو دغه تورونه رد کړي او وايي د کريمې په مرګ کې د جرم کوم څرک نه ښکاري ۔
د کريمه بلوڅ مېړه حمل حيدر پر خپل ټويټر پاڼه ليکلي چې د کريمې بلوڅ له وصيت سره يې سم د هغې مړی د هغې پلرني وطن تمپ ته ليږلی ۔
د يکشنبې په سهار د کريمې بلوڅ جسد د هوايي جهاز له لارې کراچۍ ته راوړل شو ، کورنۍ يې غوښتل چې په کراچۍ کې يې د جنازې لمونځ وکړي او بيا د جلوس په شکل کې د هغې جنازه د هغې کلي ته يوړل شي۔ کورنۍ او بلوڅ فعالان تور پوري کوي چې د امنيتي ادارو لخوا دوی داسي کولو ته پرې نه ښول شول۔
د کريمې بلوچ جنازه ته د خلګو نه پرېښولو پر ضد د بلوچ يکجهتي کمېټۍ له لوري په تربت او نورو سيمو کې مکمل کاربنديز و، بلوڅ ملتپاله ګوندونو بي اين پي مېنګل او نېشنل پارټۍ په خپلو بيانونو کې د کريمې بلوڅ په جنازه کې دخلګو پر شرکت بنديز د رواياتو ضد او ناقانونه عمل بللی او د دې عمل غندنه يې کړې۔
