واشنګټن ــــ افغان طالبانو په داسې وخت کې چې د نېټو ځواکونو اتحاد را روانه اوونۍ په افغانستان کې د پاتېدو یا نه پاتېدو په اړه پرېکړه کوي، د دېرشو هېوادونو پر دې اتحاد یې ږغ کړی چې په افغانستان کې نور "جګړې ته دوام" ور نه کړي.
په افغانستان کې د امریکایي ځواکونو تر کمېدلو وروسته نېټو ځواکونه هم په دې هېواد کې د پاتېدو یا نه پاتېدو په اړه پرېکړه کوي او د دې لپاره یې را روانه اوونۍ د خپلو دفاع وزیرانو آنلاین غونډه را بللې ده چې د فرورۍ پر اوولسمه او اتلسمه به کېږي.
طالبانو د خالي- شنبې په ورځ پخپل بیان کې پر نېټو ځواکونو ږغ کړی چې نور له افغانستانه ووځي. د طالبانو ویاند ذبیح الله مجاهد په دې بیان کې د جګړې دوام د نېټو ځواک د هېوادونو او افغان ولس په تاوان بللی. په بیان کې راغلي:
"د ناټو د مشرانو راتلونکې غونډې ته زموږ پیغام دا دی چې د اشغال او جګړې دوام نه ستاسو او نه مو د اولسونو په ګټه دی اونه هم زموږ د ولس. هرڅوک که د جګړو او اشغال دوام غواړي، مسئولیت به يې لکه د تیرو شلو کلونو په شان د هغوی په غاړه وي".
د امریکې له طالبانو سره د 2020م کال د فرورۍ په تړون کې منلې چې د روان کال تر مې میاشتې به خپل ټول پوځیان له افغانستانه باسي، ځکه خو پخواني صدر ډانلډ ټرمپ خپل پوځیان 2500 ته را کم کړل، خو نېټو او پېنټاګان ویلي د ټولو پوځیانو ایستل به یې په حالاتو پورې اړه ولري.
په وروستیو کې امریکې او افغان حکومت تور پورې کړی چې طالبان د قطر پر تړون ولاړ نه دي، نه یې له القاعده ډلې سره اړیکې پرې کړې دي، نه یې تشدد کم کړی او نه د سولې په خبرو کې دلچسپي لري.
خو طالبان پخپل وروستي بیان کې دا ټول تورونه رد کړي او وایي چې د قطر تړون په افغانستان کې د جګړې د ختمېدو یواځینی حل دی او دوی په بشپړه توګه ورباندې عمل کړی دی. د طالباند ویاند ذبیح الله مجاهد په دې اړه پخپل بیان کې ویلي:
"پخپله امریکايي جهت اعتراف کوي چې په تېرو نیږدې 12 میاشتو کې هيڅ بهرنی عسکر په افغانستان کې نه دی وژل شوی، دا د "اسلامي امارت" [طالبانو] له خوا یاد تړون ته جدي ژمنتیا ښيي، همدا راز د تړون د متن سره سم د افغانستان له خاورې څخه هيچا هم د امریکا د متحده ایالاتو او د هغوی د متحدینو په ضد کوم اقدام نه دی کړی او نه هم اجازه ورکول کیږي".
طالبانو په قطر کې د بین الافغاني مذاکراتو د ځنډېدو ښکاره سبب نه دی ویلي، خو وایي ډزبندي د دغو خبرو د ایجنډا په موضوعاتو کې شامله ده او خبرې به ورباندې کېږي.
طالبانو پخپل بیان کې پر امریکا تور لګولی چې د قطر له تړونه یې سرغړونه کړې او وایي دوی تر پخوا جګړه ډېره کمه کړې خو خپل جنګیالي یې یواځې په هغه ځای کې دفاعي بریدونه کوي چې د افغان ځواکونو له خوا ورباندې حملې کېږي. طالبانو پخپل بیان کې ویلي:
"د امریکايي الوتکو له خوا بې مورده او د تړون خلاف بمبارونه لا هم روان دي، د تړون له متن سره سم، د بین الافغاني مذاکراتو له پيل څخه وروسته په دریو میاشتو کې ټول بندیان لا نه دي خوشي شوي، په ملګرو ملتونو کې د اسلامي امارت مشران لاهم له تور لیسټ او د جایزو له لیسټه نه دي ایستل شوي".
طالبانو ایران، روس او ترکمنستان ته د خپلو پلاوو تر سفرونو وروسته دا بیان په داسې وخت کې ورکړی چې په قطر کې یې د افغان حکومت له مذاکراتي ډلې سره له څه باندې درو اوونیو راهیسې ناستې نه دي کړې. افغان حکومت د خبرو د ځنډ ذمه واري پر طالبانو ور اچوي.
د نېټو ځواکونو مشر جېنز سټولټنبرګ په وروستیو کې په وار وار ویلي، چې اتحادیان یې باید په افغانستان کې د خپل راتلونکي کار او میشن په اړه ګډه پرېکړه وکړي، وایي که په دې حال کې له دې هېواده ووځي دا به نه یواځې د سولې روان بهیر ته زیان ورسوي بلکې په تېرو نولسو کلونو کې د نړیوالې ترهګرۍ په ضد لاسته راغلې ګټې به هم وبایلي.
