څېړونکي وایي په کابل د طالبانو له قبضې وروسته د پاکستان پرضد هم د لا قانونه تحریک طالبان پاکستان حملې سېوا شوي او هره دویمه درېمه ورځ وروسته طالبان په پخوانيو قبایلي سیمو کې د پاکستان په پوځ بريدونه کوي.
طالبان وايي خپله خاوره به دبل هیواد پرضد د ترهګرۍ لپاره کارولو ته نه ورکوي خو څېړونکي وايي دا به وخت ښي چې طالبان به هغه ډلې څنګه د بل کوم هیواد پرضد د ترهګرۍ نه منعې کړي کومې ډلې چې د هغوئ سره څنګ په څنګ د امریکا پرضد جنګېدلي دي.
په پاکستان او افغانستان کې په ترهګریزو فعالیتونو او سيمه کي د تندلاریتوب په چارو ژور نظر لرونکي خبريال احسان ټيپو محسود وي او ای ډيوه ته ویلي د کله نه چې طالبانو په افغانستان قبضه کړې د هغې راپدېخوا د پاکستان په ګډون د سيمې هېوادونه هم دا اندېښنې لري چې هسې نه د پخوا په څېر د افغانستان خاوره د هغوئ پرضد د ترهګرۍ لپاره وکارول شي او افغانستان يو ځل بيا د نړیوالو ترهګرو مرکز جوړ شي.
د طالبانو لخوا د کابل د نيولو وروسته داسې خبرونه هم مخې ته راغلې وؤ چې طالبانو د باګرام زندان څخه ټول 5000 بنديان خوشې کړي چې پکې د القاعده غړي هم شامل دي .
داسې راپورونه هم مخې ته راغلي چې په افغانستان کې د جېلونو څخه په راخوشې کړې شوو قېديانو کې د پاکستاني طالبانو مرستیال مشر مولوي فقير محمد هم شامل دی.
خبريال احسان ټيپو محسود وایي په کابل دطالبانو له قبضې وروسته د پاکستان پرضد هم د لا قانونه تحریک طالبان پاکستان حملې سېوا شوي اؤ د پاکستان امنيتي چارواکي هم دغه حملو پرېشانه کړي دي.
خو دپاکستان داطلاعاتو مرکزي وزیر فواد چوهدري د افغان پولې پورې غاړې څخه د پاکستان په پوځ د برېدونو په اړه اوړمه ورځ رسنیو ته ویلي وؤ داسې نه ده چې په افغانستان کې د يوحکومت د بدلیدو سره سم به په بله ورځ بدلون راشي .
هغه ویلي وؤ د افغانستان اوسنيو چارواکو په ښکاره وېلي چې هغوئ به د افغانستان خاوره د کوم بل هیواد پرضد د کارولو اجازه ورنکړي.
خبریال ټیپو وايي په هندي کشمیر کې چې کومې مضبوطې ډلې وې لکه حرکت الامجاهدین، جېش محمد د هغوئ او طالبانو فکري بڼه يوه ده او دواړه د ديو بندي مکتب فکر سره تعلق لري.
ټېپو زیاتوي داسې راپورونه هم شته او د پاکستان او طالبانو د مشرانو سره چې کله مونږ خبرې کوو نو هغوئ هم د هغه تنظيمونو په افغانستان کې اثرات او موجودګي مني کوم چې يو وخت کې د هند د ولکې لاندې کشمیر کې فعاله پاتې شوې وو.
هغه وايي دالقاعده برصغير لټرېچر ته وکتل شي نو هغوئ هم د هندي کشمير د جهاد د لارې د ازادولو خبره کوي او هند هم په دې اړه اندېښنې لري.
دا په داسې حال کې ده چې دنهې په ورځ د طالبانو په خواست په دوحه قطر کې د طالبانو د سیاسي دفتر مشر شېر محمد ستانکزي د هند د سفير ديپک متل سره ليدلي وؤ.
دهند د بهرنیو چارو وزارت ویلي، په ليدنه کې د هند سفیر دغه اندېښنې راپورته کړي چې د افغانستان خاوره د هند پرضد هلوځلو او د څه قسمه ترهګرۍ لپاره و نه کارول شي او وايي د طالبانو استازي دا باور ورکړی چې دغه مسله به په مثبت توګه هواره شي.
