دجنوبي وزیرستان مرکز واڼا کې پاکستان پیپلز ګوند داحتجاجي مظاهرې پرمهال غوښتنه کړې چې په سیمه کې د حکومتي واک پرځایې کولو د دعوؤ وروسته دې د ضلعې ټول انتظامي دفترونه او عدالتي نظام بیرته خپلې ضلعې ته انتقال کړی شي.
دا مهال د جنوبي وزیرستان دانتظامیې د دفترونو ترڅنګ د عدالت وداني هم په یوه بله ضلعه ټانک کې شتون لري.
د سیمې اوسیدونکي وايی درې کاله وړاندې اساسي قانون کې دترمیم دلارې قبایلي سیمې په خېبر پښتونخوا صوبه کې ورګډې کړل شوي خو په سیمه کې د انتظامي ادارو د دفترونو او عدالتي نظام د نشتوالي له امله دوئ اوس هم د پخواني ایف سي ار قانون په څېر حالاتو کې ژوند کوي.
د پېښور هايي کورټ لخوا په قبايلي ضلعو کې د عدالتونو لپاره دتیر کال دفرورۍ دمیاشتې په ۲۵ نېټه د پينځوؤ زنانه ؤ په شمول د ۲۸قاضیانو ټاکل کېدو اعلامیه جاري کړل شوې وه.
دا وخت د خېبر ضلعې لپاره په حیات اباد، د مومندو لپاره په شب قدر، د باجوړ لپاره په تېمرګره، د اورکزئ لپاره هنګو، د کرمې لپاره په ټل، د شمالي وزیرستان لپاره په بنو او د سويلي وزیرستان لپاره په ټانک کې عارضي عدالتونه جوړ کړل شوي دي.
د پیپلز ګوند فعال او په تیرو ټول ټاکنو کې خېبر پښتونخوا اسمبلۍ ته کاندید عمران مخلص وزیر وي او ای ډیوه ته وویل چې سیمه کې د پولیس نظام فعاله نه دی، د امنیت، عدالت او انتظامي چارې هم هغه رنګه د اېف سي ار د نظام په رنګ روانې دي.
هغه زیاته کړه عدالتي نظام او د انتظامیې دفترونه په یوه بله ضلع ټانک کې جوړ کړی شوي دي چې د خلکو په اسانه رسايي ورته نشته، دغه ولس اوس هم د اپیل، وکیل او دلیل دحق نه محرومه دی.
هغه زیاته کړه چې دسیمې یو شمېر خلک د کمزوري پولیس نظام او عدالتونو د نیشتوالي له امله په وړو وړو مقدماتو کې په جېلونو کې پراته دي.
عمران مخلص وزیر وایي د انتظامي دفترونو د نشتوالي له امله د سیمې اوسیدونکي د یو ډومیسایل جوړولو لپاره یوې بلې ضلعې ټانک ته سفر کوي چې بلها مصرف پرې کیږي.
هغه وویل هرکله چې حکومت د امنیت دټینګښت دعوې لري بیا دې انتظامي او عدالتي دفترونه دخلکو اسانتیا لپاره خپلې ضلعې جنوبي وزیرستان ته انتقال کړی شي.
د پاکستان پیپلز ګوند دجنوبي وزیرستان مشر امان الله وزیر وویل په صوبه کې دوئ دې لپاره شامل شوي چې ددوئ به د پاکستان اساسي قانون ته لاس رسی وشي خو درې کاله وروسته هم خلکو ته د ایین او قانون سره سم د تحفظ، ترقۍ او بحالې بنیادي حقونه نه ورکړل کیږي.
هغه وویل د صوبې د ستر عدالت هایي کورټ د لارې فیصله شوې چې ټول انتظامي دفترونه دې خپلې ضلعې ته بېرته انتقال کړل شي خو حکومت دا پریکړه نه عملي کوي.
صوبايی حکومت په وروستیو کې ویلي وؤ چې د قبایلي ضلعو دفترونه دې اړونده ضلعو ته انتقال کړی شي خو امان الله وزیر تور پورې کړو چې ځایي انتظامیه او پولیس د صوبې حکومت ته ویلي چې د ضلعې حالات لا سم نه دي او دوئ امنیت نه شي ورکولی.
وایس اف امریکه ډیوه په دې اړوند د صوبې او د ضلعې حکومتي چارواکو سره د رابطې هڅه کړې خو څه ځواب یې تر لاسه نه کړو.
د جنوبي وزیرستان د انتظامیه دفتر نه ډیوه ته دومره وویل شول چې دا مهال د ضلعې ټولې انتظامي او عدالتي چاري په ټانک ضلعه کې ترسره کیږی او یوازې واڼا سب ډویژن کې دمرستیال کمیشنر دفتر فعال دی.
انتظامیه وایي دوئ ته چې کله د صوبې حکومت نه کومه لاښوونه وشي هغه به عملي کوي
