د پاکستان حکومت د افغانستان پکتیکا ايالت ته د مرستو ټرکونه ليږلي چې پکې د چارواکو په وېنا د 2100 کورنيودپاره خوراکي توکي شامل دي، خو بل لور ته د پکتيکا سره په پوله پرتې قبايلي سيمې وزيرستان کډوال وايي دوی هم د کلونو نه کډوال او هر ډول مرستو ته اړتيا لري د پاکستان حکومت دې د دوی هم تپوس وکړي.
د جنوبي وزیرستان مرستیال کمشنر اعجاز اختر ویلي پرون د زيارت/ پنجشنبې په ورځ (14 اکتوبر) د پاک افغان کواپریشن فورم د پکتیکا صوبې 2100 کورنیو ته د خوراکي توکيو مرستې لیږلي او دا د دې اظهار دی چې په دې سخت وخت کې د افغانستان د خلکو او دولت سره د پاکستان حکومت او عوام ولاړ دی.
پکتیکا ته امدادي مرستې د جنوبي وزیرستان انګور اډې د لارې لیږل شوي، او دغه مرستې په انګور اډه د پکتيکا د طالبانو مرستیال ګورنر حماسي ته ورکړی شوي دي.
د طالبانو ګورنر میډیا ته ويلي د پاکستان د حکومت د مرستو ستاینه کوي او زياته کړې يې ده د پکتیکا خلک په دې وخت کې هر ډول مرستو ته اړتيا لري ځکه چې دوی د سختو مشکلاتو سره مخ دي.
هغه وویل د پکتيکا خلک د یخنۍ نه د سرپناه دپاره سامان، دارو درملو، خوراک او د څښلو صفا اوبو ته سترګې په لار دي.
خو بل لور ته بيا په پاکستان کې د پوځي عملیاتو په پایله کې اغیزمن شوي خلک وايي، په ملک کې اوس هم دوی کډوال دي مرستو ته اړتيا لري او پاکستان په خپله د نورو هېوادونو نه امداد غواړي، نو څنګه کولی شي چې افغانستان ته مرستې ليږي.
د شمالي وزیرستان پخوانی کډوال خلیل وزیر چې اوس هم په علاقه کې د کډوالو د مسلو د هوارولو دپاره مبارزه کوي، وايي د نا امنۍ او پوځي عملیاتو له لاسه کورونه او کاروبارونه وران شوي. اوس هم په زیات شمیر سره خلک کډوال دي ماشومان یې سکولونه او د صحت روغتیا مرکزونه نه لري هر ورځ ورځ په علاقه کې د نا امنۍ پېښې کیږي.
خلیل وزیر وایي که څه هم حکومت د دوی د ورانو شوو کورونو او بازارونو تاوان منلی خو تر اوسه دا مرستې نه دي ورکړل شوي.
هغه وویل د کاروبار د نشتوالي او مرستو نه ترلاسه کیدو په وجه کاروبار په ټپه ولاړ دی ماشومان بې تعلیمه کیږي او د کور خرڅ خوراک لپاره د خېر په غوښتو مجبور شوي دي.
کډوال وايي په قبايلي ضلع شمالي وزیرستان کې په کال 2014 کې د ضرب عضب پوځي عملياتو په مهال د سيمې نه د زرګونو په شمېره کې خلک د افغانستان خوست، پکتيکا او ګردېز ولايتونو ته کډه شوي وو.
دغه کډوال وخت په وخت شکايت کوي چې د پاکستان حکومت دې د دوی د بيرته ستنېدو انتظام وکړي ځکه چې دغه کډوال د وړاندې نه د سختو ستونزو سره مخ دي.
د طالبانو په افغانستان کې په واک کې د راتلو وړاندې دغو کډوالو ويل چې د افغانستان د حکومت او نړيوالو مرستې ورته بندې شوي ځکه دوی دې خپلو علاقو ته ستانه کړی شي.
خو پاکستاني چارواکو د کډوالو د شکايت په ځواب کې تل دغه دريځ خپل کړی چې ياد کډوال د افغانستان سره په پوله پرتو هغو سيمو استوګن دي کومې علاقې چې اوس هم په مکمله توګه د بدامنۍ څخه نه دي پاکې کړی شوي.
د طالبانو د واک نه وړاندې د افغانستان حکومت ويلي وو يواځې د خوست په ګلان کېمپ کې يې د شمالي وزيرستان 20زره کډوال رجسټرډ کړي خو پاکستاني چارواکو بيا دعوه کړې وه چې د افغانستان نه يې شپږ زره کورنۍ بيرته راستنې کړي دي.
په افغانستان کې چې طالبان په 15 اګست په واک کې راغلي طالبان د نړۍ نه مرستې غواړي چې نړۍ دې د بشري بحران څخه بچ کېدو دپاره د افغان ولس مرستې وکړي.
او د ملګرو ملتونو د کډوالو ادارې مشر فلېپو ګراندي په 09م اکتوبر ويلي وو که چرته نړیواله ټولنه د افغانستان سره مرستې ونکړي نو په افغانستان کې لوی انساني بحران رامنځته کېدلی او د ملک د خدماتو، بېنکونو او اقتصادي نظام په مکمله توګه تباه کېدلی شي.
