ډېره اسماعیل خان ـــــ د پښتونخوا په قبایلي ضلع شمالي وزیرستان کې د هدفي وژنو پرضد احتجاجي پرلت نن په 25مه ورځ هم روان دی، احتجاج کوونکي وايي د لکي مروت او بنو سیمې مشرانو منځګړتوب حکومت سره مزاکرات ناکامه شوي دي.
خو د شمالي وزیرستان د انتظامیې مشر ډپټي کمشنر شاهد علي دفتر چارواکي وایي حکومت د دوی په غوښتنو منلو کې سنجیده دی او د دوی سره دې مرسته وکړي.
بل لور ته تېره ورځ په شمالي وزیرستان کې شوي خانمرګي برید کې د پاکستان پوځ د څلورو عسکرو وژنه تایید کړې ده.
د اتمانزو د قامي جرګې مشر ملک ربنواز وایي د لکي مروت او بنو سیمو مشرانو جرګې ته د رویاتو سره سم 24 ساعته وخت ورکړل شوی وو چې حکومت دې دوی ته په علاقه کې د امن د پر ځای کولو ډاډ ورکړي .
هغه وویل د دغې جرګې د غړو په منځګړیتوب د حکومت سره درې ورځې خبرې شوې دي خو د دوی د امن غوښتنې په منلو کې پاته راغلي دي.
هغه وویل د خبرو پرمهال دوی ته د امن دد پر ځای کولو او په بشپړه ډول د هدفي وژنو د مخنیوي ډاډ نه دی ورکړل شوی.
هغه زیاته کړه جرګې د خبرو ددې عمل په ځنډولو سره د احتجاجي پرلت د لا غزولو پریکړه کړې ده چې پکې په علاقه کې سړکونه، بازارونه او مارکیټونه د تېرې یوې اونۍ نه تړل شوي دي.
خو د شمالي وزیرستان د انتظامیې د مشر شاهد علي دفتر چارواکي وایي حکومت د دوی د غوښتنو په منلو کې سنجیده دی او د ناامنۍ ختمولو په اړه ژمن دي خو دوی دې حکومتي چارواکو سره مرسته وکړي او احتجاج دې ختم کړي د دوی ټولې غوښتنې به منل کیږي.
په شمالي وزیرستان کې دا پرلت په داسې حال کې روان دی چې تېره ورځ د پاکستان د پوځ په کاروان باندې میر علي سیمه کې ځان مرګی برید شوی وو.
د پاکستان پوځ دا ځانمرګی برید تایید کړی او ویلي یې دي ې د برید په نتیجه کې څلور پاکستاني پوځي عسکر وژل شوي دي.
د پوځ په بیان کې ویل شوي په وژل شوو پوځي عسکرو کې 22 کلن لانس نايک شاهزيب د مانسهرې اوسېدونکی، 26 کلن لانس نايک سجاد د غیزر اوسېدونکی، 25 کلن سپاهي عمير د کوهاټ اوسېدونکی او 30 کلن سپاه خرم د پنجاب د نارووال اوسېدونکی وو.
په بیان کې د ځانمرګي بریدکوونکي او د هغه د مرسته کوونکو د معلومولو او پلټنو ویل شوي.
په بیان کې د ترهګرۍ ختمولو هوډ ښکاره کړی شوی او ویل شوي چې د پاکستان پوځ د ترهګرۍ د خطر د له منځه وړلو لپاره ژمن دی او "د عسکرو دا ډول قربانۍ" به له لاسه ورنه کړي.
تر اوسه د دې برید زمه واري چا پر غاړه نه ده اخستې خو د ملک وزیراعظم شهباز شریف او صدر اعظم ډاکټر عارف علوي دا پیښه غندلې او د عسکرو په تاوان یې د افسوس څرګندونه کړې ده.
د شمالي وزیرستان په قبایلي سیمه کې په امنیتي ځواکونو بریدونه او له مشکوکو ترهګرو سره نښتې په وروستیو میاشتو کې ډېرې شوي دي.
او تر دغو پیښو وروسته ځایي خلک د علاقې په امنیت پوښتنې راپورته کوي خو د پاکستان په مطبوعاتو کې دا نه ښودل کیږي.
په شمالي وزیرستان کې دا تازه او وخت په وخت بريدونه په داسې حال کې کيږي چې د پاکستان او تحریک طالبان پاکستان تر منځ ډز بندي روانه ده او د ټي ټي پي یو مهم مشر عمر خالد خراساني په هوایي برید کې وژل شوی دی.
