د خېبرپښتونخوا په جنوبي ضلع ټانک کې پرون د ګل یا دو شنبې په ورځ د پاکستان د پوځ په کاروان ځانمرګی برید شوی چې پکې یو لاروی وژل شوی دی. پوليسو دا پېښه تاييد کړې ده.
د ټانک ضلعې د پوليسو مشر[ډي پي او] وقار احمد وايي دا برید پرون د ټانک ضلعې د وزیرستان سړک ډبره سيمه کې شوی او د ابتدايي مالوماتو ترمخه د ځانمرګي هدف د پاکستان پوځ کاروان وو او ځانمرګی پکې په خپله الوتی دی. خو چاودنه کې پوځي عسکرو ته کومه مرګ ژوبله نه ده اوښتې.
د سیمې نه امنیتي سرچینو وویل ځانمرګي د یو پوځې افسر کورنۍ د ګاډي سره چاودنه کړې خو ګاډی بلټ پروف وو او کورنۍ بچ پاتې شوې ده. پوځ په خپله د بريد په اړه څه نه دي ويلي.
د سیمې نه ځایي خلکو وویل د برید وروسته تر ډېر ساعت د ټانک او وزیرستان ترمینځ د ګاډو د هر ډول تګ راتګ دپاره سړک تړل شوی وو.
تر دې مهاله د برید زمه واري چا نه ده منلې.
خو سږ کال د دې نه وړاندې یواځې په شمالي وزیرستان کې په امنیتي عسکرو اووه ځانمرګي بریدونه شوي چې د زیاترو زمه وارۍ پکې تحریک طالبان پاکستان په غاړه اخستي دي.
په شمالي وزیرستان کې وروستی ځانمرګی برید د نومبر په 10 مه میر علی سیمه کې د پاکستان د پوځ په کاروان شوی چې پکې درې عسکر ژوبل شوي وو.
په خېبر پښتونخوا کې د ناامنۍ د نورو پېښو ترڅنګ په امنیتي ځواکونو وسله والو حملو او ځانمرګي بریدونو لړۍ په داسې حال کې سېوا شوې چې د پاکستان پوځ دعوه کوي د عملیاتو په پایله کې د منظمې ترهګرۍ نوغی يې ويستی دی.
خو په 16م نومبر په لکي مروت کې د پولیسو شپږ عسکر او باجوړ کې د ملېشه ځواک دوه عسکر په بېلا بیلو بريدونو کې وژل شوي وو، د دغو بريدونو زمه واري تحريک طالبان پاکستان منلې وه.
په پېښور کې وتلی خبریال ناصر داوړ وایي په پوځ او پولیسو د دې پرله پسې بريدونو نه څرګنديږي چې د صوبې هرې ضلعې ته وسله وال رسېدلي او دغلته منظم نیټ ورک لري.
په خېبرپښتونخوا کې د تيرو څو مياشتو راهسې د ناامنۍ ضد او امن دپاره په غټه کچه پاڅونونه او احتجاجي مظاهرې روانې دي.
د خېبر پښتونخوا د صوبې حکومت ویاند بیرسټر سیف ویلي احتجاجونه یو جمهوري عمل دی او د دې احتجاجونو نه حکومت ته هم پیغام رسېدلی او طالبانو ته هم د ولس دریځ معلوم شوی دی.
هغه ويلي که له دې وروسته دوی د طالبانو سره خبرې کوي نو لږ تر لږه طالبان به هم اوس په دې قانع وي چې ولس وسله په لاس د هغوی واپسۍ منلو ته تیار نه دي.
هغه ویلي د خېبر پښتونخوا حکومت د پاکستاني طالبانو یا ټي ټي پي د بیلابیلو ډلو ترمنځ اختلافاتو ختمولو ته راوړاندې شوی او په دې لړ کې یې د ثالث په توګه د کردار ادا کولو وړاندیز هم کړی دی.
