واشنګټن - په افغانستان کې واکمنو طالبانو ټولو سرکاري او خصوصي پوهنتونونو ته امر کړی چې تر (امر ثاني) پورې دې د جینکو تعلیم معطله کړي. تر دې وړاندې طالبانو ثانوي سکولونه د جینکو پر مخ تړلي و، مګر په پوهنتونونو/یونیورسېټیو کې یې د خاصو محدودیتونو لاندې جېنکو ته اجازه ورکړې وه چې تعلیم وکړي.
د بشري حقونو د څار سازمان (اېچ آر ډبلیو) د طالبانو دا فیصله "شرمناکه" بللې ده.
د طالبانو د لوړو زده کړو وزارت ویاند حافظ ضیآ الله هاشمي پخپل ټوېټر پاڼه د وزیر یو هدایت خپور کړی او ورسره یې د (مهمه خبرتیا!!) ټکي لیکلي دي.
په دې هدایت کې چې د طالبانو د لوړو زده کړو (هائیر ایجوکېشن) وزیر مولوی ندا محمد ندیم جاري کړی دی، ویل شوي چې ګنې دا ګام د طالبانو د کابینې په فیصله باندې اخېستل شوی دی:
د بشري حقونو د څار سازمان (ډبلیو اېچ او) د طالبانو دې ګام ته سخت غبرګون ښودلی او پخپل ټويټر پاڼه یې لیکلي دي چې، "دا یوه شرمناکه فیصله ده چې په افغانستان کې د ښځو او جېنکو د تعلیم حق پاماله کوي. طالبان هره ورځ لګیا دي دا واضحه کوي چې هغوی د افغانانو، په ځانګړې توګه د ښځو بنیادي حقونو ته درناوی نکوي."
د افغانستان دپاره د برطانیې مشر سفارتکار هیوګو شورټر هم غبرګون ښودلی او پخپل ټویټر پاڼه یې لیکلي دي: "برطانیه د طالبانو دا وروستی ګام په کلکه غندي. دا د افغانستان خلکو، د هغه ملک اقتصادي آیندې او استحکام ته یو سنجیده ګوزار دی."
ښاغلي شورټر دا هم ویلي چې ملک به یې د افغانو ښځو او جېنکو د ملاتړ دپاره، له ټولو شریکانو سره کار ته دوام ورکړي.
تر دې وړاندې په طالبانو باندې دا کلکې نیوکې روانې وې چې ولې د جینکو پر مخ ثانوي سکولونه بېرته نه پرانیزي. طالبانو تر اوسه واضحه ندي ویلي چې د جینکو تعلیم یې ولې بند کړی، او نه یې د خپل دې ګام دپاره کوم شرعي دلیل وړاندې کړی دی.
ښځو سره د سلوک او د انساني حقونو په لړ کې افغانستان په نړیواله کچه د تنقید سره مخامخ دی.
سږ کال د جنورۍ په میاشت کې په ناروی کې د افغانانو یوه غونډه وشوه او دا امید پېدا شو چې طالبان به د خپلو لوظونه سره سم د مېرمنو ازادي یقیني کړي، ښځو ته د تعلیم حق ورکړي او په بدل کې به مغربي ملکونه طالبانو سره همکاري شروع کړي. خو داسې و نه شول او طالبانو د مېرمنو د ازادیو په ضد اقدامات نور هم سخت کړل.
د طالبانو مشر ملا هېبت الله اخوانزاده په جینکو او ښځو د قدغنونو لرې کولو دپاره د مغربي ملکونو غوښتنې رد کړي او ویلي یې دي چې هغه د خارجیانو خواهشات نه شي پوره کولی او نه ورته دا د قبلولو وړ دي. هغه ویلي چې په شریعت مفاهمت نشي کولی او نه هم په شریعت مفاهمت کې د مغربي ملکونو سره د همکارۍ څه ګام اخیستل غواړي.
یاده دې وي چې د پاکستان په شمول، تر اوسه د نړۍ هېڅ کوم ملک په افغانستان کې د طالبانو موجوده حکومت ندی تسلیم کړی.
