په اسلام اباد کې د پاکستان انفارمېش کمېشن د سیوري لاندې د ملګرو ملتونو ادارې يونېسکو او په اسلام اباد کې د نېدر لېنډ د سفارت په مرسته راجوړې شوې غونډې ته ګډون والو په خپلو څرګندونو کې معلوماتو ته په عامه کچه د لاس رسي په اهميت او په جمهوري ټولنه کې دې ته په اړتیا رڼا واچوله.
څېړونکي په دې حقله وايي تر څو چې ولس بنيادي سرکاري معلوماتو ته لاس رسی نه لري نو په دې پوهېدل ممکن نه دي چې جمهوریت څنګه کار کوي.
په دې اړه د قانوني چارو ماهر اسامه خيلجي وايي “دا تصور کول ګران دي چې جمهوريت به مضبوط شي او د جمهوریت د کمزورتيا لويه وجه هم دا ده چې مونږ د خپلو حقونو او حکومتي نظام په اړه معلومات نه لرو او دا وجه ده چې په پاکستان کې طاقتور قوتونه خپل اختيار پراخه کوي او خپل زور کاروي”.
معلوماتو ته د ولس د لاس رسۍ ورځ په داسې حال کې نمانځل شوې ده چې په پاکستان کې په راتلونکي کې د عامو انتخاباتو کولو تېارۍ روانې دي او کارپوهان وايي انفارميشن ته رسېدل که د ټولنې د چارو لپاره ضروري ده نو د جمهوریت د پياوړي کېدو لپاره هم خورا ارزښت لري.
په دې اړه قانون په کال 2002 کې جوړ شوی و او حکومت پدې قانون د موثره عمل لپاره بيا په کال 2004 کې قواعد جوړ کړل خو کارپوهان اوس هم شکايت کوي چې زياتره پاکستاني وګړي لا هم سرکاري معلوماتو ته په رسېدو کې له ستونزو سره مخامخ کېږي.
د قانون د شتون او د عمل نه کولو په حقله يو بل څېړنکار او د سېنټر فار پېس اېنډ ډوېلپمنټ انيشېټيو غړی مختار احمد علي وايي “زمونږپه هېواد کې غلط او ناسم معلومات ډېر زيات دي خو په حقیقت کې د واړو معلوماتو کمی دی هغه که سرکاري معلومات او دستاوېزات وي او که نور خو پټ ساتل کېږي کوم چې د خفيه ساتنې وړ نه وي.
د صحافيانو نړیوالې ادارې رپورټرز وداوټ بارډرز هم په خپل يو تازه بيان کې د پاکستان په سياسي ډلو غږ کړی چې په راتلونکو انتخاباتو کې دې په خپلو منشورونو کې د اظهار ازادي او د صحافيانو د تحفظ ژمنې او په هغې عمل کول باوري کړي.
د پښتونخوا صوبې چيف انفارمېش کمشنره وايي فرح حامد خان وايي معلوماتو ته د لاس رسي حق د پاکستان ايين ورکړی دی. هغه وايي “معلوماتو ته د رسېدلو حق قانون ورکړی او هر وګړي ته باور ورکوي چې هغه د سرکاري محکمو نه د هغوي د کار په اړه تپوس کولی شي.
د يادې غونډې ګډون والو وينا وه چې کله يو شهري معلومات لري نو په خپل ژوند کې د غورو فېصلو کولو وړ ګرځي.
قانون پوهان معلوماتو او اطلاعاتو ته رسېدل د جمهوریت مرکزى ستن بولي او وايي هم د دې قانون لاندې د واکدارانو نه ځواب غوښتل کيږي.
په دې لړ کې د دستور او جمهوري چارو کارپوه ياسر لطيف همداني وايي “بډې رشوتونه او خپلوي پالنه هغلته وده مومي چرته چې د هر څيز د پټ ساتلو رواج عام وي او زموږ په ملک کې د خفيه ساتلو کلتور دی چې هر څيز له خلکو پټ وساتل شي. ګني په جمهوري ټولنو کې د پټ ساتنې نه بلکې د روڼتيا کلچر عام دی او د روڼتيا لپاره معلوماتو ته د رسېدو په قانون او حق عمل کول ضروري دي.
Forum