زېلنسکي وایي، د اوکراین-امریکې پیاوړي تعلقات د ټولې نړۍ په ګټه ده

د اوکراین صدر ولودیمیر زېلنسکي د زیارت/پنجشنبې په ورځ وویل چې "د اوکراین-امریکې مضبوط تعلقات، د ټولې دنیا په ګټې دي." داسې ښکاري چې د زېلنسکي دا خبره، د واشنګټن سره د نوموړي د کشیدګیو د آرامولو یوه هڅه ده. په دې وروستیو څو ورځو کې صدر ډانلډ ټرمپ او صدر ولودیمیر زېلنسکي د اوکراین په وړاندې د روس د درې کلنۍ جګړې په تعلق سره یو بل ته ځیني توندې خبرې کړې دي.

زېلنسکي په کیېف کې وویل چې هغه د ټرمپ د استازي، کیت کېلاګ سره "د جنګي محاذ د صورتحال، د جنګي اسیرانو د واپس کولو په څرنګوالي، او (د جنګ د ختمېدو په صورت کې) د مفیدو امنیتي ضمانتونو په سر، نتیجه خیز ملاقات" درلود.

د صدر ټرمپ استازي، کیت کېلاګ د کیېف ښار ته په رسېدو سره وویل چې هغه د زېلنسکي د نظریاتو اورېدو دپاره هلته تللی دی. تر دې وړاندې اوکرایني چارواکو په دې باندې خپله غوصه ښودلې وه چې ولې په سعودي عرب کې د روس او امریکایي سفارتکارانو ترمنځ خبرو نه دوی بهر پاته کړی شوي دي.

پس د هغه چې کېلاګ د زېلنسکي سره په اوکراین کې وکتل، توقع کېدله چې دواړه به په یو خبري کنفرنس کې راښکاره شي، مګر اوکرایني چارواکو وویل چې د امریکایي پلاوي په غوښتنه دا خبري کنفرنس منسوخه کړی شو.

د امریکا صدر پخپل بیان کې د اوکراین صدر ولودیمیر زېلنسکي "د انتخاباتو بغیر یو ډېکټېټر/آمر" وبللو. زېلنسکي په ټرمپ تور ولګولو چې ګني د روس د غلطو معلوماتو د اثر لاندې راغلی دی. ټرمپ دا دعوه وکړه چې ګني دا اوکراین و چې د روس سره یې جنګ شروع کړ. ماسکو په ۲۰۲۲ کال کې په اوکراین پوځي حمله وکړه چې آینده هفته کې یې درې کاله پوره کیږي.

اوکراین دا وېره لري چې هسې نه ټرمپ دا جنګ داسې ختم کړي چې تر ډېره د ماسکو د مطالباتو مطابق وي. روس اوس مهال د اوکراین یو په پنځمه برخه خاوره لاندې کړې ده، کوم چې په نړېوال حیثیت سره د اوکراین برخه ګڼل کیږي.

د زیارت/پنجشنبې په ورځ د امریکا نایب صدر جې ډي وېنس واشنګټن ډي سي ته څېرمه د قدامت پسندانو یا کنزروېټیو فعالانو یوې غونډې ته وویل چې ټرمپ په اوکراین کې "د وژنو خاتمه غواړي" او بل دا چې "امن د امریکاییانو په مفاد دی".

هغه زیاته کړه چې په ریاض کې د روس-امریکا د خبرو وروسته، "مونږ امن په څنډه ولاړ یو". وېنس د جګړې په ختمولو کې د اوکراین کردار یاد نکړ، که څه هم امریکایي چارواکو ویلي چې کیېف او ماسکو به دواړه د جوړجاړۍ په پروسه کې دخیل وي او د امن د حاصلولو دپاره باید ځیني مراعاتونه ومني.

د اوکراین په حوالې سره د ټرمپ د وروستیو تبصرو په جواب کې، یورپي مشرانو وعده وکړه چې دفاعي اخراجات به زیات کړي. ځیني یې په دې غور کوي چې که جنګ ختم شي، بیا د امریکا د حمایت لاندې د یورپ امن ساتونکي ځواکونه په اوکراین کې مېشت کړی شي.

کرملېن وایي، دا منصوبه د ژورې اندېښنې وړ ده، مګر زېلنسکي او نېټو د دې منصوبې هرکلی کړی دی.

د نېټو سېکرېټري جنرل مارک روته وویل: "دا ډېره اهمه ده چې روس به هېڅ کله بیا د اوکراین د ځمکې یوه بله یو کلومټر مربع خاورې د نیولو کوشش ونکړي."

هغه زیاته کړه چې د امن په یوې معاهدې کې باید د اوکراین دپاره قوي ضمانتونه شامل وي.

مارک روته همدا راز وویل: "په داسې حال کې چې ډېرې فیصلې لا پاته دي، دې کې هېڅ پوښتنه نشته چې یورپ په اوکراین کې د امن په قایمولو کې یو ډېر اهم کردار لري."