د اېف بي آی د مشر په حیث د کاش پټېل تقرري د سنېټ لخوا منظوره شوه

د امریکې سنېټ د زیارت/پنجشنبې په ورځ د فډرل تحقیقاتي ادارې (اېف بي آی) مشرۍ ته د صدر ټرمپ لخوا پېش کړی شوي کاندید په سر رایه ګیري وکړه چې په نتیجه کې یې په ۵۱ موافقو او ۴۹ مخالفو رایو سره د کاش پټېل تقرري منظوره کړی شوه. په دې توګه، د امریکا د قامي سلامتیا او د قانون د انفاذ په ادارو کې د ټرمپ د انتظامیې لخوا یو بل غټ ګام هم واخېستل شو.

د سنېټ په رای اچونې سره، کاش پټېل د امریکا د قانون د انفاذ د سترې ادارې مشرۍ ته ورسېد، او نوموړي وعده کړې ده چې په اېف بي آی کې به عمومي بدلونونه راولي. د ټرمپ منتقدین، په انتظامیې دا تور لګولی چې ګني هڅه کوي د اېف بي آی ادارې آزادي ختمه کړي او دا اداره د ټرمپ د ترجیحاتو سره مطابقه کړي.

د زیارت/پنجشنبې ورځې په ووټنګ کې، دوو رېپبلېکنو سېنټرانو – سوزان کولېنز او ليسا مورکوسکي – د ډېموکرېټانو په شان د پټېل د تقررۍ په خلاف رایه ورکړه. مګر د سنېټ نورو رېپبلېکنانو ټولو هغه ته د تصدیق رایه ورکړه او هغه یې د بدلون یو استازی وبللو، چې په دې توګه د رایو په ډېر لږ فرق سره د نوموړي تقرري منظوره کړی شوه.

په سنېټ کې د اکثریت رېپبلېکنانو مشر، سنېتر جان ټون د زیارت ورځې د رایې اچونې وړاندې وویل: "اېف بي آی په دې وروستیو کلونو کې د امریکا په خلکو کې خپل اعتبار بایلودلی دی. د دې لوی لامل، دا انګېرنه ده چې د اېف بي آی اهم کار، په سیاستونو ککړ شوی دی."

سنېټر ټون زیاته کړه، "مونږ غواړو چې د قانون د انفاذ ټولې ادارې په ګډه کار وکړي او هغو حقیقي ګواښونو ته توجو وکړي چې زمونږ ملک ته مخ دي. زه دې ته سترګې په لاره یم چې د ښاغلي پتېل سره کار وکړم چې د اېف بي آی سالمیت بحاله کړو او توجو یې د هغه اهم مېشن ته وګرځوو."

نورو رېپبلېکنانو هم همدا شان څرګندونې درلودلې.

د سنېټ د عدلي چارو د کمېټې مشر چک ګراسلي، د دې میاشتې په سر کې سنېټ ته د اېف بي آی د مشر په حیث د پټېل د نامزدګۍ تر پېش کولو وړاندې ویلي و، "اېف بي آی په سیاسي تعصب ککړ شوی دی او د امریکا د خلکو په خلاف د وسلې په حیث استعمالیږي." سنېټر ګراسلي دا هم وویل چې "ښاغلی پټېل په دې خبره آګاه دی."

کاش پټېل یو پخوانی عوامي وکیل او د مرکزي حکومت سرکاري وکیل پاته شوی چې پخوا یې د ټرمپ په اول حکومت کې د هغه د یو قامي سلاکار په حیث او هم په پنټاګان کې کار کړی دی.

صدر ټرمپ په تېر نوامبر میاشت کې چې پټېل یې د اېف بي آی مشرۍ ته ونومولو، په یو بیان کې هغه وستایلو او ویې ویل چې پټېل د هغې دعوې په باطله کولو کې لوی کردار لوبولی و چې ګني ټرمپ د روس سره پټ تعلقات لرل. ټرمپ زیاته کړه چې پټېل "د حقیقت، احتساب او آئین یو دفاع کوونکی دی."

خو بل طرف ته ډېموکرېټانو په تکرار سره د کاش پټېل په قابلیتونو او سالمیت باندې پوښتنې رااوچتې کړې دي او ورباندې یې دا تور لګولی چې په کانګرس باندې د ۲۰۲۱ کال د جنوري ۶مې نېټې ځیني بلوا کوونکي یې "سیاسي قیدیان" بللي و، او دا غوښتنه یې هم کړې وه چې د ټرمپ د مخالفینو په ضد دې قانوني کاروایي وشي.

دوی د افشاکوونکو په حوالې سره په پټېل باندې دا تور هم لګولی چې قانونسازانو ته یې دروغ ویلي چې ګني په اېف بي آی کې د جنوري ۶مې نېټې د بلواکوونکو په قضیو کې د دخیلو چارواکو او مامورینو د جبري لېرې کولو په هڅو خبر نه و.

ډېموکرېټ سنېټر رېچرډ بلومنټل، د زیارت ورځې د سنېت رایې اخېستو نه وړاندې، په واشنګټن کې د اېف بي آی ادارې مخې ته مظاهره وکړه او ویې ویل: "هغه (پټېل) غیرآماده او ناقابله دی. هغه سره د دښمنانو یو فهرست شته. هغه سره دا خارجي تناوونه شته."

سنېټر بلومنټل زیاته کړه: "هغه رېپبلېکنان چې ممکن کاش پټېل ته رایه ورکړي، یاد مو وي چې دا ووټ به مو ځان ته بلا شي. تاسو ته به د دې رایې ورځ، په غم بدله شي."

ډېموکرېټ پیټر وېلش هم د اېف بي آی ادارې مخې ته خبرې کولې وویل چې، د هغه په باور، د ټرمپ په "لاقانونه هنگامه آرائی" کې، پټېل تر ټولو اهم کردار لري.

پیټر وېلش وویل: "هغه د ډانلډ ټرمپ د دې کوشش یوه آله ده چې غواړي د عدلیې وزارت او اېف بي آی تباه کړي څو هغه نه صرف مطلق اختیاردار او د قانون دپاسه، چې بالکل د قانون نه ماسېوا وګرځي."

پټېل تېره میاشت د سنېټ د کمیټې په اورېدنه کې، دا الزامونه رد کړل چې ګني هغه سره د دښمنانو کوم فهرست موجود دی یا هغه به د ټرمپ د مخالفینو یا دښمنانو په ضد څه انتقامي کاروایي وکړي.

پټيل قانون سازانو ته وویل: "که زما تقرري منظوره شي، زه هېڅ دلچسپي نلرم او نه کوم خواهش لرم او نه به یې ولرم چې بېرته شا ته ولاړ شم. په اېف بي آی کې به هېڅ قسمه سیاسي سازي نه وي. د اېف بي آی لخوا به هېڅ انتقامي اعمال نه ترسره کیږي."

د ايف بي آی مشر د صدر لخوا نومل کیږي او بیا یې سنېټ منظوري ورکوي چې بیا یې د کار دوره تر لسو کلونو پورې کېدلی شي.