ټرمپ او سټارمر: امریکا او برطانیه به په یوې تجارتي لوظنامې اتفاق وکړي

د امریکا صدر ډانلډ ټرمپ د زیارت/پنجشنبې په ورځ وایټ هاوس کې د برطانیې وزیراعظم کیئر سټارمر سره په یو مشترک خبري کنفرانس کې وویل چې امریکا او برطانیه د دوه اړخیز تجارت په یوې لوظنامې خبرې کوي او دا لوظنامه ممکن د برطانیې په پیداوار باندې امریکه کې د ټېکسونو یا تعرفو د لګولو مخه ونیسي.

ټرمپ وویل: "مونږ به د تجارت یوه عالي لوظنامه ولرو. مونږ به داسې یوې تجارتي لوظنامې ته ورسېږو چې دواړو ملکونو ته ډېره غوره وي، او همدا اوس چې خبرې کوم، مونږ ورباندې کار کوو."

وزیراعظم سټارمر وویل، دواړو ملکونو په یوې نوې اقتصادي معاملې کار شروع کړی دی چې پرمختللې ټېکنالوجي یې اصلي برخه ده، او دې سره به د امریکې او برطانیې ترمنځ موجوده قوي رابطه، نوره هم مضبوطه شي.

ټرمپ وویل چې د دواړو اتحادیانو ترمنځ د یوې تجارتي لوظنامې په خامه باندې ممکن "ډېر ژر" اتفاق وشي، او په دې برخه کې به د کوششونو مشري د امریکې د خزانې وزیر سکاټ بېسنټ، نایب صدر جې ډي وېنس، تجارت وزیر هووارډ لوتنیک، او د قامي سلامتیا مشیر مایک والټز په غاړو وي.

ټرمپ ټینګار وکړ چې توقع لري دا لوظنامه، هرڅومره چې ژر ممکنه وي، ترلاسه شي.

کله چې د صدر ټرمپ نه دا پوښتنه وشوه چې آیا د برطانیې وزیراعظم هغه ته قناعت ورکړی چې د تعرفو یا تجارتي مالونو باندې د ټېکس لګولو نه دې تېر شي، نو هغه جواب ورکړ: "هغه کوشش وکړ، هغه د غرمې ډوډۍ پر مهال ډېر سخت کوشش کولو. زه فکر کوم چې مونږ کولای شو یوې واقعي تجارتي لوظنامې باندې سلا شو، او بیا به د تعرفو/ټېکسونو ضرورت نه وي. ګورو به."

د برطانیي د خزاني وزیرې رېچل ریفز د شورو/چهارشنبې په ورځ وویل، هغه یقیني ده چې د امریکې-برطانیې تجارت او سرمایه کاري به په دې باندې ګډوډه نشي چې ټرمپ د امریکایي برامداتو د مسئلې پر سر، په برطانیایي برامداتو ټېکسونه ولګوي.

برطانیې او امریکې د صدر ټرمپ په اول صدارتي دور کې هم د آزاد تجارت په یوې معاهدې مذاکرات کړي و، مګر هغه یې مکمله نکړل. کله چې په ۲۰۲۱ کې ډېموکرېټ صدر جو بایډن واک تر لاسه کړ، هغه دا لړۍ ختمه کړله.

د امریکې د اقتصادي څېړنو اداره وایي چې په ۲۰۲۳ کال کې د امریکې او برطانیې ترمنځ د مالونو او خدماتو برامدات او درامدات ټولټال درې سوه اوولس (۳۱۷) بلین ډالرو ته رسېدل او دې سره برطانیه د کېنېډا، مېکسیکو، چین او جرمني نه پس، د امریکې پنځم لوی تجارتي شریک بلل کیږي.

بل اړخ ته امریکا په ملکي کچه، د برطانیې دپاره تر ټولو ستر تجارتي شریک ګڼل شوی، که څه هم یورپي اتحاد سره یې تجارت زیات دی، خو په هغې اتحادیې کې اووه ویشت ملکونه شامل دي.

صدر ټرمپ دا خبره کړې ده چې په یورپي اتحاد به هم تجارتي ټېکسونه یا تعرفې ولګوي.