د امریکا د عالمي مېډیا ادارې کېري لېک د ځانګړې سلاکارې په حیث اعلانه کړله

د امریکا د عالمي مېډیا ادارې – یونایټډ سټېټس اېجنسي فار ګلوبل مېډیا (یو اېس اې جي اېم) – د زیارت/پنجشنبې په ورځ اعلان وکړ چې پخوانۍ خبریاله او اوسنۍ سیاستمداره کېري لېک به د یوې ځانګړې سلاکارې په حیث په یاده اداره کې کار کوي.

کېري لېک چې دېرش کاله خبریاله پاته شوې ده، په ډسمبر میاشت کې د صدر ټرمپ لخوا د وایس آف امریکه مشرۍ ته ونومل شوه.

دغې عهدې ته د مېرمن لېک ټاکنه ټکنۍ شوې ده، ځکه د یو اېس اې جي اېم مشرۍ ته د صدر ټرمپ لخوا نومل شوی کس - زاړه پال سیاسي لیکوال او فعال برېنټ بوزل – لا تر اوسه د سنېټ لخوا ندی منظور شوی او هغه په سنېټ کې د خپلې ټاکنې په اړه اورېدنې ته انتظار دی.

د امریکا د عالمي مېډیا اداره همدا راز انتظار باسي چې یو نوی دوه ګوندیز بورډ جوړ کړی شي، کوم چې د یو اېس اې جي اېم د مشر ترڅنګ به په ځینو موضوعاتو، په شمول د نېټورکونو د مشرانو ټاکلو او یا برطرفه کولو باندې به، د هغه سره کار کوي.

رومان ناپولي، د یو اېس اې جي اېم کارکوونکو ته د یو ایمېل له طریقه د کېري لېک راتلل اعلان کړل. ناپولي اوس مهال د یو اېس اې جي اېم د مشر یا چیف اېکزېکېټیو کارونه د نګران مشر په توګه په مخ وړي، ځکه مخکېنۍ مشرې امېنډا بېنېټ له خپلې دندې استعفا وکړه.

رومان ناپولي پخپل ایمېل کې لیکلې چې کېري لېک به "په نشریاتي صحافت کې ځانه سره د تجربیاتو یوه خزانه راوړي، ځکه هغې د دوه لسیزو نه ډېر وخت د مېډیا په سترو مارکېټونو کې د یوې اېنکرې او خبریالې په حیث کار کړی دی."

ناپولي د هغې د کارنامو په یادولو سره لیکلي چې کېري لېک د مشرانو سره چې په کې د امریکې دوه صدران هم شامل دي، مرکې کړي، او د نړېوال راپور ورکولو په خاطر یې دوه ځله اېمي اېوارډونه هم ګټلي دي.

په ايمېل کې راغلي دي: "د ټرمپ انتظامیې د جګپوړې سلاکارې په حیث، کېرې به د یو اېس اې جي اېم سره د پالیسیو او سټراټېجیو په عملي کولو کې مرسته وکړي."

یو اېس اې جي اېم، یوه لویه اداره ده چې د چتر لاندې یې د وایس آف امریکه، رېډیو فري یورپ (مشال، آزادي،...)، او نور خبري ادارې کار کوي او دغه ادارې د خبرونو خپرولو او د سېنسرشپ سره مقابلې کولو ته ژمنې دي چې ټول ټال هره هفته یې د مخاطبینو شمېر له ۴۲۰ میلینه کسانو نه اوړي.

یو اېس اې جي اېم د دې ترڅنګ چې د هغو آزادو خبري نېټ ورکونو څارنه کوي، یو بل ماموریت هم لري چې هغه "ټوله نړۍ کې د آزادۍ او ډېموکراسۍ په ملاتړ د خلکو خبرول، ورسره تعامل کول، او ورسره رابطه کول دي."