د پاکستان د اقتصادي تګلارو ارزولو لپاره د آي ایم ایف ډله سبا اسلام اباد ته رسیږي

ټاکل شوې ده چې د نړيوالې مالیاتي ادارې (اي ایم ایف) نهه کسیزه ډله د نتهن پورټر په مشرۍ د مارچ په درېیمه نېټه پاکستان ته رسېږي، ترڅو د اووه اربه ډالرو د پور پروګرام د لومړۍ بیاکتنې بهیر پر مخ یوسي.

د پاکستان د خزانې وزارت سرچینې وايي، دا خبرې به تر مارچ ۱۵مې دوام وکړي، او د هېواد د ۲۰۲۵-۲۶ مالي پالیسۍ په ټاکلو کې به مهم رول ولوبوي.

اقتصادي وضعیت او د آي ایم ایف شرایط

د آي ایم ایف پلاوی په داسې حال کې د پاکستان اقتصادي تګلارې ارزوي چې دپاکستان د ټیکسونو راټولولو مرکزي ادارې (ایف بي آر) ته د روان مالي کال په لومړیو اتوؤ میاشتو کې د ۶۰۶ اربه روپیو د مالیې راټولو د کمي له چیلنجونو سره مخ کړې ده.

سرچینې وایي ،دمذاکراتو پر مهال به د پاکستان اقتصادي پالیسۍ، د ټیکسونو نظام، د انرژۍ نرخونه اؤ اقتصادي اصلاحات تر غور لاندې ونیول شي.

اقتصادپوهان د اي ایم ایف پروګرام ته څنګه ګوري؟

خبریال او څېړونکی ذیشان حیدر وايي"که څه هم د آي ایم ایف د پور تړون لاسلیک کولو سره د پاکستان اقتصاد کې استحکام راغلی، خو اوس هم دلته د پام وړ اقتصادي هلې ځلې نه تر سترګو کېږي. بهرنۍ پانګونه کمه ده، خصوصي سکټور ته پاملرنه نه ده شوې، او د حکومتي لګښتونو کنټرول لا هم لویه ننګونه ده"

دهغه په خبره که پاکستان غواړي چې د اقتصادي ودې لوری ونیسي، نو باید د آئی ایم ایف له پروګرام سره تګ ته دوام ورکړي.

تېره میاشت د آي ایم ایف یوې تخنیکي ډلې هم پاکستان ته سفر کړی و، چې د اړونده چارواکو سره یې د مالي نظم، حکومتدارۍ، او قانون د واکمنۍ په اړه خبرې کړې وې.

د دې ترڅنګ، د آي ایم ایف یوې بلې ډلې د اسلام‌اباد د سفر پر مهال د اقلیمي بدلون پر وړاندې د مبارزې لپاره د شاوخوا ۱.۵ اربه ډالرو اضافي مرستو ترلاسه کولو په اړه هم بحثونه کړي دي.

ټاکل شوې ده چې د نړیوالې مالیاتي ادارې دا پلاوی به د مالیې، انرژۍ، منصوبه بندۍ، او سټیټ بینک چارواکو تر څنګ د څلورو واړو صوبو له استازو سره هم لیدنې وکړي.

د پاکستان اقتصادي راتلونکی

خبریال او څېړونکی ثناالله خان وايي: "د پاکستان اقتصاد دا مهال د آي ایم ایف له پالیسو سره تړلی دی، که حکومت یې پوره نه کړي، نو نور قسطونه به نه ترلاسه کوي، چې دا به "اقتصادي وضعیت نور هم خراب کړي.

د نوموړي په خبره ،د اقتصاد اوسنی ثبات هم د آي ایم ایف د شرطونو عملي کولو له برکته راغلی دی.

د اي ایم ایف مشرې کرسټالينا جارجیوا تیره میاشت د پاکستان وزیر اعظم شهباز شریف سره په دوبۍ کي د ليدنې په وخت د پاکستان د اقتصادی استحکام ستاینه کړې وه او ویلي یې وو چې دا استحکام اوس د اقتصادی ودې په لور بوتلل پکار دی چې ګټې یې عام اولس ته ورسيږي.

د نړیوال بانک د پاکستان مدیر ناجي بن هېسن، په ټولنیزو رسنیو کې په خپل بیان کې ویلي چې په پاکستان کې اقتصادي ثبات مخ پر پیاوړتیا دی، او همدې بنسټ ته په کتو، نړیوال بانک ګروپ پرېکړه کړې چې له پاکستان سره خپل شراکت نور هم پراخه کړي