وزیراعلا ګنډا پور: پښتونخوا اؤ قبایلي ضلعو کې د ناامنۍ تعلق نیغ په نېغه افغانستان سره دی

د خېبر پښتونخوا وزیراعلا ښاغلي علي امین ګنډا پور ویلي چې خېبر پښتونخوا صوبه اؤ په ځانګړي ټوګه قبایلي ضلعې د امن و امان د خراب صورتحال سره مخ دي چې نیغ په نېغه تعلق یې د افغانستان سره دی.

هغه ویلي دي چې د ناامن د ستونزې هواري لپاره به ټولو ته په ګډه سنجیده اؤ نتیجه ورکوونکي ګامونه پورته کول وي.

د ډان نیوز له مخې وزیراعلا علي امین ګنډا پور په پېښور کې د پاکستان لپاره د برتانیه له های کمېشنر جېن مېریټ سره لیدنه کړې او ورسره یې د دواړو هېوادونو ترمنځ د ګډې دلچسپۍ په موضوعاتو، د سیمې د امن و امان په وضعیت، او نورو اړوند مسلو خبرې اترې کړې دي.

په دې لیدنه کې وزیراعلا ګنډا پور ویلي چې که صوبه په ځانګړې توګه قبایلي ضلعو کې د ناامنۍ ستونزه په وخت هواره نه کړل شوه نو ګرد هیواد به د ناامنۍ له بهیر سره مخ شي .

وزیراعلا ګنډا پور وویل صوبه اؤ قبایلي سیمو کې د امنیت د ټینګښت له خاطره صوبایي حکومت د خبرو لپاره جرګه جوړه کړې ده اؤ ددغې جرګې افغانستان ته د لېږلو لپاره ټولې تیارۍ بشپړې کړل شوې دي خو اوس انتظار یوازې د مرکزي حکومت لخوا سپارښتنو منظورولو ته دی.

د ښاغلي ګنډا پور وینا وه چې د دایمي امن ټینګښت د ټولې سیمې اؤ نړۍ په ګټه دی اؤ پاکستان اؤ نور هیوادونه هم باید د مذاکراتو له لارې د ستونزې د دایمي هواري لپاره ګډې هڅې وکړي.

وزیراعلا وویل د افغان کډوالو د ستنولو لپاره چې وفاق هره پرېکړه کوي صوبایي حکومت به پرې عمل کوي خو هغه روښانه کړه چې که چرې د افغان کډوالو د ایستلو پرېکړه کیږي نو دې سره سم باید د هغوي په درناوي سره د ستنولو یو پلان هم تیار کړل شي.

د خېبرپښتونخوا د حکومت د اطلاعاتو څانګې تېره ورځ ويلي وؤ، وزيراعلا علي امین ګنډاپور افغانستان کې د واکمنو طالبانو پېښور کې کونسل جنرل حافظ محب الله شاکر سره هم ليدلي دي اؤ هغه سره یې په لیدنه کې ویلي چې افغانستان ته یې د جرګې لېږلو لپاره ټولې تیارۍ مکمل دي.

د طالبانو کونسل جنرال سره ليدنه کې د تورخم پولې د بنديز او دواړو خواو سوداګرو او عامو خلکو په مشکلاتو هم بحث شوی ؤ.

د افغانستان او پاکستان ترمنځ د سوداګرۍ او تګ راتګ غټه لار تورخم د تېرې مياشتې د 21 مې د شپې د 11 بجو راهسې وروسته له هغې وتړل شوه چې افغان طالبانو په تورخم کې خپلې غاړې ته ودانۍ يا تاسيسات جوړول.

د وزيراعلا او طالبانو کونسل جنرل د ليدنې په اړه خبر کې ويل شوي، د روژې او وړوکي اختر له امله د پولې زر تر زره پرانستو په هڅو اتفاق شوی دی.

ويل شوي، د پولې بنديز له امله سوداګر او ټرانسپورټران د مشکل سره مخ دي او د پولې بنديز د دواړو خواو په ګټه نه دی.

ګنډاپور ويلي، "د پولې پرانستو دپاره مونږ د خپل طرفه هڅې کوو، افغان سفارتخانه دې هم په دې لړ کې کردار ادا کړي، په سيمه کې ناامنۍ د دواړو خلک د مشکل سره مخ کوي، د سيمې امن د پاکستان او افغانستان دواړو په ګټه دی، د تل پاتې امن دپاره خبرې اترې غوره لاره ده".

د خېبرپښتونخوا د وزيراعلا تازه څرګندونو ته مرکزي حکومت سمدستي کوم غبرګون نه دی ويلی، خو له دې وړاندې د ګنډاپور دغه ډول دعوو ته مرکزي حکومت په ځواب کې ويلي، د افغانستان يا کوم هيواد سره خبرې کول د صوبايي حکومت په واک کې نه راځي.

علي امين ګنډاپور له دې وړاندې د تېر کال دسمبر په مياشت کې ويلي وو، مرکزي حکومت ورته ويلي چې د افغانستان سره خبرې وکړي او له دغې وړاندې، نوموړي د ستمبر په مياشت کې هم ويلي وو، د صوبې د وزیراعلا په حېث افغانستان ته پلاوی لېږي.

د ګنډاپور لومړي بيان ته په غبرګون کې د دفاع وزير خواجه اصف ويلي وو، د خېبرپښتونخوا صوبې د افغانستان سره د مذاکراتو خبره په "فېډرېشن، مرکز باندې نېغه حمله ده".

د تېرې مياشتې پیل کې د خېبرپښتونخوا حکومتي وياند بېرسټر سېف اسلام اباد کې د طالبانو سفير سره ليدلي وؤ ، په دوه اړخيزه چارو او افغانستان ته د قبايلي، سياسي مشرانو او علماو د پلاوي په لېږلو یې ورسره خبرې کړې وې.

له دغې دوه ورځې وړاندې سېف ويلي وو، "د مرکزي حکومت د منظورۍ وروسته به پلاوی يا وفد افغانستان ته لېږي، مقصد یې قبايلي ضلعو کې امن په ځای کول دي، مذاکرات به د قبايلي قومونو ترمنځ وي، د خوارجو سره هیڅ مذاکرات نه شي کېدای".

د پاکستان پوځ او حکومت تحريک طالبان پاکستان د خوارجو په نوم يادوي.

خېبرپښتونخوا کې د تحریک انصاف حکومت افغانستان سره بیا بيا د مذاکراتو خبره په داسې وخت کې کوي چې خېبرپښتونخوا صوبه کې په وروستيو کې د ناامنۍ پېښې ډېرې سېوا شوي دي.

تېره شپه هم د خېبر پښتونخوا په بنو سیمه کې د پوځ په مرکز یا چاوڼۍ دوه ځانمرګي بریدونه شوي چې په کې لږ تر لږه نهه کسان وژل شوي او ۲۵ نور زخمیان شوي دي.

د وسله والو حافظ ګل بهادر نومې ډلې د حملې ذمه واري په غاړه اخستې ده

د امنیتي ادارې یو چارواکي وي او ای ډیوه ته ویلي چې شپږ وسله وال هم د ځواکونو په جوابي ډزو کې وژل شوي دي.

د غېر دولتي ادارې پاکستان انسټيټيوټ اف کنفلکټ اېنډ سيکيورټي سټډيز، پيکس تازه رپورټ وایي چې پاکستان کې د تېرې فرورۍ په مياشت کې 79 وسله وال، ترهګر بريدونه شوي چې تر ټولو زيات 44 بريدونه پکې په خېبرپښتونخوا صوبه کې شوي دي.

پېکس وایي په ترسره شوؤ 79 وسله والو بريدونو کې 55 ملکي وګړي او 47 امنيتي عسکر وژل شوي، 81 امنيتي عسکر او 45 ملکي وګړي پکې ژوبل شوي دي