د پاکستان مرستیال وزیراعظم سره د امریکې د ملي امنیت د سلاکار ټيليفوني اړیکه، د صدر ټرمپ له لوري یې ورته مننه کړې

د امریکې د ملي امنیت سلاکار مایکل والټز د پاکستان د مرستیال وزیراعظم او د بهرنیو چارو وزیر محمد اسحاق ډار سره ټیلیفوني خبرې کړي، او د ترهګرۍ پر ضد د پاکستان د حکومت هڅې یې ستایلې دي.

د پاکستان د سرکاري خبري شبکې اې پي پي د رپورټ له مخې مایکل والټز د پاکستان مرستیال وزیراعظم ته د امریکایي صدر ډونلډ ټرمپ لخوا د کابل په ترهګریز برید کې دلاس لرلو په تور د داعش د نیول شوي ترهګر په نیولو کې د پاکستان په مرستې کولو د مننې پېغام هم رسولی دی.

د امریکې صدر ډانلډ ټرمپ د نهې، سه شنبې، په ماسخوتن د کانګرس مشترکه غونډې ته تقریر کې ویلي وؤ په کال 2021م کې په کابل کې په امریکايي ځواکونو د داعش د ځانمرګي حملې ذمه وار تن په پاکستان کې نیول شوی دی اؤ هغه ددغه ترهګر په نیولو کې په مرستې کولو د پاکستان مننه هم کړې وه.

په پینځم مارچ د پاکستان وزیراعظم شهباز شريف ویلي په ایکس رسنۍ لیکلي وؤ"مونږ د امریکا د صدر ډانلډ ټرمپ مننه کوو، چې په ټوله سيمه کې یې د ترهګرۍ ضد جګړه کې د پاکستان د رول او ملاتړ ستاينه کړې ده".

د پاکستان د بهرنیو چارو وزارت په خپل بیان کې ویلي، چې مرستیال وزیراعظم محمد اسحاق ډار د امریکا د ملي امنیت سلاکار ته د نوې دندې مبارکي ورکړه او ټینګار یې وکړ، چې پاکستان د صدر ټرمپ او د هغه د انتظامیې په ګډون، له امریکا سره خپل پراخه او اوږدمهاله تعلقات لا نور مستحکم کول غواړي.

نوموړي د ترهګرۍ ضد مبارزه کې له امریکا سره د پاکستان د همکارۍ ژمنه بیا تکرار کړه.

مایکل والټز د افغانستان نه د امریکايي پوځ له وتلو وروسته، هلته د پاتې پوځي وسلو اؤ مهماتو د بیرته راټولولو په اړه د صدر ټرمپ اعلان هم وستایه.

د اعلامیې له مخې، دواړو خواو هوکړه وکړه، چې د ټیکنالوژۍ، انرژۍ او معدني سرچینو په برخو کې به خپلمنځي همکاري نوره هم پراخوي.

دواړو دا خبره هم وکړه، چې په راتلونکو ورځو کې به د سوداګرۍ، پانګونې، د اقلیم بدلون او روغتیا په اړه خبرې اترې د پراخ بحث د ایجنډې برخه وي.

د پاکستان وزیراعظم شهباز شريف په اېکس پوسټ کې ويلي، "د پاکستان امنیتي ځواکونو د داعش خراسان د لوړې کچې مشر شریف الله چې افغان وګړی دی، په دې وروستيو کې نيولی دی".

د شهباز شريف په خبره، "مطلوب ترهګر د پاکستان او افغانستان په پوله پرته علاقه کې نيول شوی دی".

د ابي ګېټ پېښه 2021م د اګست د میاشتې په 26مه د افغانستان د پلازمېنې کابل حامد کرزي نړیوال هوایي ډګر مخې ته د یوې خونړۍ چاودنې په شکل کې شوې وه.

د مطبوعاتي رپورټونو له مخې په پېښه کې د 13 امریکايي پوځیانو تر څنګ، لږ تر لږه 180 افغانان وژل شوي او شاوخوا 150 نور ژوبل شوي وو.

وژل شویو امریکايي سرتېرو کې دوه ښځینه پوځیانې هم شاملې وې.

شهباز شريف زياته کړې، "لکه څنګه چې تاسو ټولو ته معلومه ده، پاکستان تل د ترهګرۍ ضد هڅو کې مهم رول لوبولی دی، چې ترهګرو ته خوندي ځای په لاس ور نه شي او هغوی د بل کوم هيواد پرضد ونه کاريږي".

هغه د ترهګرۍ ضد مبارزې دوامداره ساتلو ژمنه تکرار کړې ده.

شهباز شريف ويلي، د ترهګرۍ ضد هڅو کې پاکستان درنې قربانۍ ورکړي، د 80,000 نه زيات پوځيان او ملکي وګړي يې وژل شوي دي.

نوموړي زياته کړې، "د مشرتابه او ولس د ترهګرۍ ضد هوډ نه ماتېدونکی دی، د ملک څخه به ترهګري ختموو او امریکا سره به د سيمې د امن او ثبات دپاره ملګرتيا ته دوام ورکوو".