امریکا په دې وعده ټینګار کړی چې بهر کې قیدي امریکاییان به وطن ته راستانه کوي

د امریکا خارجه وزارت د زیارت/پنجشنبې په ورځ د یرغملانو او ناحقه زندانیانو په یاد د جهنډې اوچتولو یوه دستوره جوړه کړه او یو ځل بیا یې د امریکا د حکومت په دې عزم ټینګار څرګند کړ هغه امریکایي شهریان او د امریکا د دایمي اقامت لرونکي چې په بهر ملکونو کې قیدیان دي، هغوی به امریکا ته راستانه کوي.

د یرغملانو په برخه کې د صدر ډونالډ ټرمپ خاص استازی اډم بوېلر وویل: "زمونږ د پالیسیو توجو ۱۰۰ فیصده د خپلو وګړو وطن ته راستانه کول دي. تاسو به په آینده ورځو کې ځیني اعلانونه واورئ." خو بوېلر نور جزئیات څرګند نکړل.

د امریکا د خارجه وزارت یو ترجمان وي او اې ته وویل: "صدر ټرمپ ژمن دی چې ټول هغه امریکاییان چې په بهر ملکونو کې یرغمل دي یا ناحقه بندیان دي، هغوی خپل ملک ته راستانه کړي. په دې کې هغه امریکاییان او نور یرغملان هم شامله دي چې حماس تر اوسه په غزه کې ساتلي دي."

د خارجه وزارت دغه ویاند زیاته کړه، "ملک ته د هغوی د بېرته راوستلو هلې ځلې روانې دي او حساسې دي – اوس مهال کې مونږ څه ملاقاتونه یا څه خبر په لاس کې نلرو چې اعلان یې کړو."

د مارچ په ۹مه نېټه، ایران کې د اېف بي آی یا د امریکا د تحقیقاتي فډرل ادارې د پخواني اېجنټ، رابرټ لېونسن د اغوا کېدلو اتلس (۱۸) کاله پوره کېږي.

دې پېښې ته د توجو په خاطر، کانګرس، د دواړو ګوندونو په ملاتړ سره، د قامي دفاع د اختیاراتو په قانون کې چې د ۲۰۲۴ په مالي کال کې یې منظور کړ، د یرغملانو او ناحقه بندیانو جهنډه یا بېرغ تصویب کړ.

د زیارت په ورځ، د اېف بي آی مشر کاش پټېل وویل، واشنګټن دا عزم لري چې د سفارتکاري او استخباراتي هلو ځلو د طریقه، د یرغملانو او ناحقه بندیانو کېسونه ټوله پای ته ورسوي، هغوی وطن ته راستانه کړي، او هغوی چې نشي راوړل کېدلی، د هغوی جسدونه امریکا ته رامنتقل کړي.

د خارجه وزارت دا دستوره یوه ورځ پس د هغه جوړه شوه چې صدر ټرمپ په وایټ هاوس کې د اتو (۸) مخکېنیو یرغملانو سره وکتل کوم چې د امریکا لخوا ترهګر بلل شوې حماس ډلې یرغمل ساتلي و، او بیا خوشې شول.

د شورو/چهارشنبې په ورځ وایټ هاوس د دې خبرې تصدیق هم وکړ چې امریکایي چارواکي د حماس سره په روانو مذاکراتو کې دخیل دي. له هغه وخت راهیسي چې د امریکا خارجه وزارت په کال ۱۹۹۷ کې حماس د یوې خارجي ترهګرې ډلې په حیث اعلانه کړه، د قطر په سرښار دوحه کې کېدونکې دغه خبرې د امریکا او حماس ترمنځ وړومبۍ نېغ په نېغه خبرې ګڼل کیږي.

د حماس سره د دغو خبرو مشري د بوېلر په غاړه وه، او داسې ویل کیږي چې په دې خبرو کې د امریکایي یرغملانو په خلاصون او د جنګ په داسې ممکنه طریقه ختمول توجو شوې چې حماس نور په غزه کې واکمن پاته نشي.

په هغو یرغملانو کې چې تر اوسه پورې د حماس په ولقه کې پاته دي، پنځه تنه یې امریکایي شهریان دي چې په هغو کې یو یې هم ۲۱ کلن اېډن الېکزنډر دی کوم چې باور کیږي آخري امریکایي-اسرائیلي یرغمل دی کوم چې تر اوسه غزه کې ژوندی پاته دی.

د هغه مور، یاېل الېکزنډر په دې وروستیو کې د تل ابیب ښار د یرغملانو په میدان کې خبرې وکړې او ویې ویل: "دا ساده حقیقت دی: د یرغملانو حالت د هرې ورځې په تېرېدو سره لا زیات پسې فوري کېږي. دوی اوس [د ډزبندۍ] په دویمې مرحلې کار کوي. مونږ یې د دویمې مرحلې په سترګه نه ګورو، مونږ ورته د یوې داسې طریقې په سترګه ګورو چې زمونږ زوی ورباندې بېرته کور ته راشي. مهمه نده چې تاسو یې څه بلئ، مهمه دا ده چې یو اتفاق وشي چې پاته یرغملان دې ژر تر ژره کورونه ته ستانه کړی شي."

اسرائیلي چارواکو دا هفته وویل چې اسرائیل آماده دی د غزې د ډزبندۍ معاملې دویمې مرحلې ته مخ ته ولاړ شي، او دا یې وویل چې حماس دې د هغو یو کم شپېتو (۵۹) یرغملانو څخه چې ورسره پاته دي، نور شمېر هم راخلاص کړي.