ټرمپ امریکا ته د مکسېکو نه په اکثرو درامداتو باندې تعرفې یا تجارتي ټېکسونه وځنډول

د امریکا صدر ډانلډ ټرمپ د زیارت/پنجشنبې په ورځ، د مېکسیکو په اکثرو سامانونو چې امریکا ته برامد کیږي، هغه ۲۵ فیصده نوي لګول شوې تعرفې یا تجارتي ټېکسونه وځنډول چې درې ورځې وړاندې یې په هغه ملک لګولي و. ټرمپ دا ټېکسونه پس د هغه وځنډول چې د مېکسیکو صدرې کلاوډیا شینباوم د نوموړي سره نېغ په نېغه خبرې وکړې او ورته یې وویل چې مېکسیکو حکومت امریکا ته د کډوالو د تګ او د مرګوني مخدره موادو – فېنټانیل – د مخنیوي په خاطر څه قسمه اقدامات کړي دي.

ټرمپ پخپل ټروټ سوشل مېډیا پلېټفارم وویل چې مېکسیکو ته به د دې ټېکسونو په حوالې سره مهلت د اپرېل تر ۲مې نېټې وغځېږي او په هغو مېکسیکویي سامانونو به ټېکس نه لګول کیږي کوم چې په ۲۰۱۸ کال کې د ټرمپ د اول صدارت پر مهال د مېکسیکو او کېنېډا ترمنځ په شوې تجارتي لوظنامې کې شاملې کمپنۍ هغه امریکا ته وارد کړي.

صدر ټرمپ د کېنېډا په تجارتي سامانونو باندې د لګول شوی ۲۵ فیصده تجارتي ټېکس یادونه ونکړه، که څه هم د امریکې د تجارت وزیر هووارډ لوتنیک د زیارت په ورځ په ټلوېژن باندې یوه مرکه کې وویل اېما وکړه چې د دې امکان هم شته دی. د شورو/چهارشنبې په ورځ صدر ټرمپ په هغو ګاډو باندې چې مېکسیکو یا کېنېډا کې جوړیږي او امریکا ته راوړل کیږي، د نویو ټېکسونو لګول د یوې میاشتې دپاره وځنډول.

ټرمپ پخپل ټروټ سوشل پلېټفارم کې ولیکل چې په مېکسیکویي سامانونو یې تعرفې یا ټېکسونه "صدرې شینباوم ته د احترام په خاطر" ځنډولي دي. صدر ټرمپ زیاته کړې: "زمونږ تعلقات ډېر ښه دي. او مونږ ډېر سخت په مشترکه توګه په سرحد باندې کار کوو، هم د ناقانونه اجنبیانو د مخنیوي په برخه کې چې امریکا ته داخل نشي، او همداسې د فنټانیل د مخنیوي دپاره."

ټرمپ خپل پوسټ په دې ختم کړی چې: "صدرې شېنباوم، تاسو نه، ستاسو د سخت کار او همکارۍ په خاطر، مننه کوم!"

د ميکسیکو صدرې کلاوډیا شينباوم د زیارت په ورځ یو بیان کې وویل، "مونږ په دې اتفاق وکړ چې زمونږ د خودمختاریو د احترام په چوکاټ کې، زمونږ کار او همکاریو بې مثاله نتیجې مخې ته راوړي دي."

وروسته بیا هغې په یو خبري کنفرانس کې وویل چې د زیارت په ورځ په ټلیفوني خبرو کې، ټرمپ اول غوښتل چې لګول شوې تعرفې یا تجارتي ټېکسونه دې پرځای پاته وي. خو شېنباوم زیاته کړه چې هغې ورته د خپل تېرې میاشتې د لاسته راوړنو مثالونه یاد کړل، په شمول د دې چې مېکسیکو څرنګه امریکا ته د فنټانیل د انتقال لړۍ محدوده کړې ده او مېکسیکویي چارواکو څرنګه د غټو جرمي ډلو یا کارټلانو یو کم دېرش (۲۹) جګپوړي غړي امریکا ته واپس کړي کوم چې امریکا ته مطلوب بلل کېدل. همدا راز دا یادونه یې ورته کړې ده چې هغې لس زره عسکر د مېکسیکو شمالي سرحد ته استولي چې د هغه لارې نه امریکا ته د ناقانونه کډوالو او نشه یي موادو د انتقال مخه ونیسي.

تر اوسه معلومه نده چې کله آینده میاشت کې د تجارتي ټېکسونو په حوالې سره د صدر ټرمپ لخوا مېکسیکو ته ورکړی شوی مهلت پای ته ورسېږي، بیا به څه کیږي.