د ټرمپ استازي حماس سره ليدنه ډېره ګټوره بللې

د امریکې د صدر ډانلډ ټرمپ د يرغمل شوو دپاره استازي اېډم بوهلر د اتوار، يکشنبې په ورځ ويلي، تېره اوونۍ د حماس ډلې سره په غزه کې د يرغمل شوو په اړه ليدنه ډېره ګټوره وه، او دغه ليدنه به په يوه اوونۍ کې د هغو خوشي کولو ته لاره جوړه کړي.

امریکې، حماس ترهګره ډله ګرځولې ده.

بوهلر د سي اېن اېن ټي وي په [سټېټ اف دې يونين] پروګرام کې ويلي، د يرغمالو دپاره خبره شوې ده. هغه د اوږدې مودې جنګ بندۍ خبره هم کړې ده.

خيال کيږي چې حماس سره د 2023م کال په اووم اکتوبر حمله کې يرغمل کړل شوو کې 24 تنه ژوندي اوس هم دي، او دوی سره د 34 جسدونو ساتل کېدو هم ويل کيږي.

بوهلر د ترهګرې ګرځول شوې ډلې سره د نورو ليدنو امکان نه دی رد کړی.

هغه زياته کړې، د اسرايلي چارواکي رون ډيرمر په اندېښنه خبر دی، چې ده د حماس سره نېغه په نېغه تماس نيولی دی.

هغه ټينګار کړی چې د خبرو دپاره ښکاره هدف لري، چې د حماس لخوا د 1200 وژنو او د اسرايل په ځوابي عملياتو کې د 48,000 نه زياتو وژنو وروسته شوې ډزبندۍ موده وغځوي.

نوموړي ويلي، "مونږ امریکا يُو، د اسرايل ايجنټ نه يُو، مونږ په دغه لوبه ځانګړې ګټې لرو، مخکې وروسته رابطې کوو".

د بوهلر نه د سي اېن اېن خبريال جېک ټاپر پوښتنه کړې، چې د يو يهودي په حېث هغه د حماس سره خبرې کول څنګه محسوسوي، هغه په ځواب کې ويلي، "که دوی ښه خلک دي او که بد، دا زما د کار يا دندې برخه ده".

د بوهلر او حماس نېغې خبرې د امریکې د لسيزو هغه پاليسۍ سره په ټکر کې دي، چې واشنګټن د امریکې لخوا ترهګرې ګرځول شوې ډلې سره د خبرو مخالفت کولو.

د امریکايي خبریال اسټين ټايس په اړه بوهلر ويلي، نه دی خبر چې هغه په شام کې ژوندی دی. خو ويلي يې دي، شام ته ځي، هغه به ولټوي که چرته هلته وي ځان سره به یې کور ته راولي.

امریکايي چارواکي دا اوونۍ د منځني ختيځ په سفر دي چې د غزې د جنګ بندۍ خبرې جاري وساتي.

اسرايل د اتوار په ورځ ويلي، غزې ته بجلي قطع کوي، تېره اوونۍ یې مرستې بندې کړي دي.

اسرايل وايي، په حماس فشار اچوي چې د جنګ بندۍ په لومړي پړاو غځولو اتفاق وکړي کومه جنګ بندي چې تېره اوونۍ ختمه شوې ده.