د وزیراعلا ګنډاپور په مشرۍ مشورتي غونډه کې افغانستان سره زر تر زره د مذاکراتو غوښتنه شوې

د خېبر پښتونخوا صوبې د وزیراعلا ښاغلي امین ګنډاپور په مشرۍ ترسره شوي د بیلابیلو سیاسي اؤ مذهبي ډلو د استازو غونډه کې د ترهګرۍ د مخنیوي لپاره افغانستان سره زر تر زره د مذاکراتو پېلولو اؤ د سیاسي مشرتانه د سترې غونډې رابللو غوښتنه شوې ده.

د شنبې- خالي په ورځ د خپرې شوې حکومتي اعلامیې له مخې د وزیراعلا په مشرۍ ترسره شوې په دې مشورتي غونډه کې وویل شول چې د پاکستان امنیت د افغانستان له امن سره تړلی دی، نو باید د افغانستان سره په حکومتي کچه مذاکرات زر پیل شي.

غونډه کې پرېکړه وشوه چې سیاسي او مذهبي ګوندونه به د فرقه ییزې همغږۍ د پراخولو لپاره یو ځای کار کوي.

د اعلامیې له مخې غونډې متفقه پرېکړه وکړه چې د امن ټینګښت تر ټولو مهم دی، دا د ملي ګټو اړتیا ده. که څه هم د کورمې ضلعې مسله سیمه‌ییزه ده، خو دا یو ملي بحران رامنځته کولی شي، نو ځکه د دې دایمي حل لپاره سمدستي ګامونو پورته کولو ته اړتیا ده.

ګډونوالو غوښتنه وکړه چې باید د هېواد په کچه د بشري حقونو د سرغړونو مخه ونیول شي، او د ټولو وګړو د حقونو ساتنه وشي.

په غونډه کې پرېکړه وشوه چې د هېواد د امن، سوکالۍ او سیاسي استحکام لپاره باید ټولې سیاسي ډلې سره یو ځای شي.

د اعلامیې له مخې ،د دې لپاره به یوه ځانګړې کمیټه جوړیږي چې د سیاسي ګوندونو سره تماس ونیسي او د ملي مفاهمت لپاره کار وکړي.

په غونډه کې وویل شول چې د مهمو ملي مسایلو په اړه د مشورتي غونډو جوړول به د ترهګرۍ د ختمولو او د ملي مفاهمت د پراخولو لپاره یو قوي بنسټ رامنځته کړي.

غونډې کې وویلی شول چې دا ډول مشورتي غونډې باید د ټول هېواد په کچه، د هرې ضلعې په سطح هم وشي.

په غونډه کې پرېکړه وشوه چې د جمعې د خطبو له لارې به علما کرام خلک د سولې د ارزښت په اړه پوهوي، او دا به د ټول هېواد په کچه د امن پیغام خپروي.

د غونډې د برخه والو وینا وه چې د ترهګرۍ مخنیوی، د سولې او نظم فضا رامنځته کول زموږ ګډ هدف دی.ملت د ترهګرۍ پرضد متحد دی، او باید په ګډه د دې ناورین مخه ونیسو.

دوی غوښتنه وکړه چې د ترهګرۍ پر موضوع دې د ملي کچې د سیاسي مشرانو ستره غونډه راوبلل شي، او د دې ختمولو لپاره دې یوه جرګه جوړه شي چې پکې بااثره سیاسي او مذهبي شخصیتونه شامل وي.