د افغانستان د انتخاباتو خپلواک کمیسیون اعلان وکړ چې د تېرو ولسمشریزو (صدارتي) انتخاباتو ابتدائي نتایج به د لړم میاشتې پر ٣٢مه (د نوامبر ١۴مه) اعلان کړي.
د انتخاباتي تقویم یا مهالوېش له مخې، ټاکل شوې وه چې ابتدائي نتایج د اکټوبر پر ١٩مه اعلان شي، خو دا کار وځنډېد.
د افغانستان د انتخاباتو د کمیسیون مشرې حوا علم نورستانۍ نن د یکشنبې/اتوار په ورځ د یو خبري کنفرانس پر مهال، د نتایجو د ځنډېدو له امله بخښنه وغوښتله. هغې وویل چې د ابتدائي نتایجو د اعلان نوې نیټه، د کمیسیون له ټولو کمیشنرانو سره د مشورو په نتیجه کې ټاکل شوې ده.
مېرمن نورستانۍ په ټاکلي وخت د ولسمشرۍ د ټاکنود لومړنیو پایلو د نه اعلانیدو لامل د ټاکنو په پروسه کې د لا شفافیت او روڼتیا رامنځته کیدل او تخنیکې ستونزې یادې کړي دي.
نوموړې د افغانستان خلکو ته ډاډ ورکړ چې د انتخاباتو ابتدائي نتایج به د بیا ځل لپاره نه ځنډیږي او له نن څخه ۱۸ ورځې وروسته، د نومبر په ۱۴مه نیټه به د ولسمشرۍ د شویو ټاکنو ابتدائي پایلې اعلانوي.
په ورته وخت کې د ولسمشرۍ ټاکنو ته د اشرف غني د ټیم په ګډون نورو ټاکنیزو ټیمونو د ټاکنو د خپلواک کمیسیون په دې پریکړې اندیښنه څرګنده کړې او شوی اقدام یې د انتخاباتو د قانون خلاف ګڼلی دی.
د ولسمشرۍ د ټاکنو ابتدائي پایلواعلان په داسې حال کې ځنډیدلی چې د افغانستان ولسمشرۍ انتخابات د روان میلاي کال د سپتمبر په ۲۸مه نیټه ترسره شو خو د نږدې یوې میاشتې په تیرېدو سره یې لا تراوسه د پایلو داعلان څرک نه لیدل کیږي.
