روس د یوکرېن په اړه د امریکې د "متوازن" دریځ هرکلی کړی

په یوکرېن کې جنګ د ختمولو دپاره د ملګرو ملتونو سېکیورټي کاونسل ته وړاندې کړی شوی امریکايي قرارداد په ۱۰ ووټونو منظور کړی شو، روس او چین د امریکې ترڅنګ د قرارداد په حق کې رای ورکړې، برطانيي او د یورپين یونین غړو په رایو کې برخه وا نخستله او د قرارداد په مخالفت کې هم چا رای ور نه کړه.

د روس حکومت کرېملېن د نهې، سه شنبې، په ورځ د یوکرېن په اړه امریکايي دریځ زیات متوازن وبللو.

د کرېملېن ترجمان دمتري پېسکوف وویل د امریکې دریځ ښښي چې امریکا د شخړې د حل حقیقي خواهش لري.

په امریکايي قرارداد کې د خلکو په مرګ ژوبله د خفګان اظهار شوی دی. په قرارداد کې ویل شوي چې د ملګرو ملتونو بنیادي مقصد دا دی چې په نړیواله کچه امن او امان برقرار وساتي او شخړې په امناکه ډول حل کړی شي. په قرارداد کې غوښتنه شوې چې جنګ دې زر تر زره ختم کړی شي او د روس او یوکرېن ترمنځ دې مستقل امن قایم کړی شي.

ملګرو ملتونو دپاره امریکايي استازې ډوروتي شی سېکیورټي کاونسل ته وویل دا قرارداد مونږ د امن په لاره روانوي. هغې وویل دا وړمبی مګر اهم ګام دی، پکار ده چې په دې فخر وکړی شي او پکار ده چې د یوکرېن، روس او نړیوالې ټولنې دپاره امناکه مستقبل جوړولو دپاره کار وکړی شي.

فرانس او برطانيي غوښتل چې په امریکايي قرارداد ووټ وځنډول شي خو دواړه ملکونه په خپل کوښښ کې ناکامه شول.
بیا دواړو ملکونو د ډېنمارک، یونان او سلوېنیا ترڅنګ غوښتل چې د امریکايي قرارداد په متن کې ترامیم وکړی شي او د روس او یوکرېن جنګ په ځای دې په یوکرېن د روس په لویه پېمانه یرغل الفاظ استعمال کړی شي.

دې ملکونو دا هم غوښتل چې داسې ټکي شامل کړی شي چې په کې د یوکرېن د خودمختارۍ او د علاقايي سالمیت احترام وي او د منصفانه، مستقل او د جامعې امن غوښتنه په کې شوي وي.

روس هم دوه ترامیم تجویز کړي وو خو په امریکايي قرارداد کې د ترامیمو کوښښونه ناکامه شول او د دې سبب ناکافي ملاتړ او یا د روس ويټو وه. امریکې په ترامیمو کې په ووټونو کې برخه وانخيستله.

په سېکیورټي کاونسل کې د ووټونو نه مخکې د ملګرو ملتونو جنرل اسمبلۍ دوه قراردادونه، یو د یوکرېن او بل د امریکې، منظور کړل.

د جنرل اسمبلۍ قرارداد داسې څه شرط نه لري چې نفاذ يې لازمي وي.

د ملګرو ملتونو جنرل سېکرېټري اېنټونیو ګوټېرېس د ګل، دوشنبې، په ورځ په جېنېوا کې و او يې ويل په یوکرېن جنګ د ختمولو دپاره هر ممکن کوښښ پکار دی چې دا ډول د ملګرو ملتونو د منشور، نړیوال قانون او د جنرل اسمبلۍ د قراردادونو سره سم مستقل امن قایم کړی شي.