د خېبر پښتونخوا وزیراعلا، علي امین ګنډاپور د پاکستان اؤ افغانستان تر منځ د تاؤ تریخوالي راکمولو لپاره د ثالثۍ یا منځګړتوب وړاندیز کړی اؤ ویلي دي که هغه ته د جرګې له لارې افغانستان سره د مذاکراتو اختیار ورکړل شي نو مثبت کردار به ادا کړي.
د جمعې په ورځ اسلام اباد کې خبریالانو سره خبرو کې وزیراعلا ګنډا پور ویلي افغانستان سره تر اوسه په حکومتي کچه خبرې اترې خو شوي خو د جرګې په توګه ورسره خبرې نه دي شوي.
په دې وروستیو کې پاکستان کې د کېدونکې ترهګرۍ په ستونزه په افغانستان کې د افغان طالبانو د حکومت اؤ پاکستان تر منځ اړیکې سختې تاوجنې شوي اؤ د پاکستان وزیراعظم شهباز شریف د جمعې په ورځ د اپېکس کمیټې غونډې ته ویلي وؤ:
"پاکستان د پولې د پورې غاړې څخه کېدونکې دراندازۍ ته غاښ ماتوونکی ځواب ورکړی دی اؤ بیا به یې هم ورکوي".
هر څو که شهباز شریف د افغانستان نوم نیغ په نیغه نه دی اخستی خو پاکستاني چارواکي وخت نا وخت تورونه لګوي چې د ټي ټي پي وسله وال د افغانستان خاوره کې خوندي ځالې لري اؤ د پاکستان په ضد له هغه ځایه فعالیتونه کوي.
افغان طالب چارواکو تل د پاکستان دا دعوې رد کړي اؤ وایي هیچاته اجازه نه ورکوي چې خاوره یې د بل کوم هیواد په ضد وکاروي.
وزیراعلا علي امین ګنډا پور وویل، د ستونزو حل باید د مذاکراتو له لارې ولټول شي اؤ افغانستان سره که د جرګې د لارې د مذاکراتو کولو اختیار ده ته ورکړل شي نو یو مثبت رول به ولوبوي،
خېبر پښتونخوا کې د ترهګرۍ اؤ نا امنۍ په اړه د یوې پوښتنې ځواب کې علي امین ګنډا پور وویل، موږ ټول د ترهګرۍ سره مقابله کوؤ اؤ د ترهګرۍ په خلاف به تر وروستي حده ځو اؤ امن به ټينګوؤ،
نوموړي وویل سرحدي سیمو کې پوځ ځای پځای شوی نو ځکه ددغو سیمو د امنیت ذمه واري هم د پوځ اؤ مرکزي حکومت پغاړه ده.
د خېبر پښتونخوا قبایلي سیمو کې د ممکنه پوځي علمیاتو په اړه هغه وویل تر دې وړاندې هم په قبایلي ضلعو کې وخت په وخت پوځي عملیات شوي خو هیڅ ګټه یې نه ده کړې.
د وزیراعلا علي امین ګنډا پور وینا وه چې مونږ مذاکراتو ته ترجیح ورکوؤ اؤ په هیواد کې د امنیت ټینګولو لپاره مذاکرات کوؤ.
نوموړي وویل له کله راهسې چې د عمران خان حکومت ختم شوی دی نو په هیواد کې ترهګري زیاته شوې اؤ د ترهګرۍ د سېوا کېدو وجه ناسمې تګلارې دي.
د پاکستان حکومت وایي په اګست کال2021م کې په افغانستان کې د طالبانو واک ته له رسېدو راپدیخوا پاکستان کې د ترهګرۍ پېښې چټک شوې اؤ په افغان طالبانو تور لګوي چې د ټي ټي پي وسله والو ته یې پخپله خاوره کې خوندي ځالې ورکړې دي.
د طالبانو حکومت د پاکستان دا تورونه په کلکه ردوي اؤ وایي د خپل هیواد امنیت ټینګول د پاکستان کورنۍ معامله ده اؤ اسلام اباد دې خپلې ناکامۍ د کابل غاړې ته نه اچوي.
په 24م دسمبر افغانستان کې واکمنو طالبانو ويلي وو، پاکستان د پکتيکا برمل ولسوالۍ کې بمباري کړې، د ماشومانو او ښځو په ګډون پکې 46 کسان وژل شوي له دغه برید وروسته بیا ځېنو افغان رسنیو هم دعوه کړې وه چې د طالبانو سرحدي ځواکونو د پاکستان خاوره کې بریدونه کړي اؤ 19 پاکستاني عسکر یې وژلي دي.
د پاکستان اؤ افغانستان دواړو حکومتونو یا امنیتي ادارو د مرګ ژوبلې دا شمېرې نه دي تایید کړي.
تر دې وړاندې پروسږکال د سپټمبر په میاشت کې هم په پېښور کې د وکیلانو د سازمان یوې دستورې ته خپله وینا کې د پښتونخوا وزیراعلا علي امین ګنډا پور ویلي وؤ، هغه به پخپله د صوبې د وزیراعلا په توګه د افغانستان سره خبره کوي، هلته به پلاوی لیږي ، له نزدې به ورسره کښیني اؤ د امنیت ستونزه به هواروي.
خو د علي امین ګنډا پور دې څرګندونو ته مرکزي حکومت سخت غبرګون ښودلی ؤ.
د پاکستان د فاع وزیر خواجه اصف پارلیمان ته ویلي وؤ د علي امین ګنډا پور لخوا افغانستان سره پخپل سر خبرې کول په فیډریشن حمله ده اؤ یوه صوبه هم پخپل سر کوم هیواد سره خبرې اترې نه شي کولی.
Forum