د امریکې ځانګړي استازي سټیو ویټکوف له عرب مشرانو سره د غزې دبیارغونې پر پلان خبرې کړې

د قطر د بهرنیو چارو وزارت د چارشنبې- شورو په ورځ وویل، د یو شمېر عربو هېوادونو د بهرنیو چارو وزیرانو د منځني ختیځ لپاره د امریکې له ځانګړي استازي سټیو ویتکوف سره لیدلي او د غزې د بیا رغونې د پلان په اړه یې ورسره بحث کړی دی.

د قطر د بهرنیو چارو وزارت په خپل یو بیان کې ویلي، "د عرب هېوادونو د بهرنیو چارو وزیرانو د غزې د بیارغونې په پلان باندې بحث وکړ، دا پلان د مارچ په څلورمه نېټه په قاهرې کې د عرب لیګ په سرمشریزه کې تایید شوی دی".

په بیان کې راغلي چې له سټیو ویټکوف سره په مجلس کې د قطر، اردن، مصر، سعودي عرب او د متحدو عربي اماراتو د بهرنیو چارو وزیران او د فلسطین د ازادۍ تنظیم مشر موجود وو.

په بیان کې راغلي دي چې دوی د امریکې له استازي سره "متفق شوي چې د بیارغونې د هڅو د بنیاد په توګه د دغه پلان په اړه همکاري او سلا مشورې روانې وساتي".

د شنبې- خالي په ورځ د اسلامي‌ همکاریو تنظیم د غزې د بیارغونې لپاره پلان وړاندې کړ او عرب لیګ په ریاض کې په خپله بیړنۍ غونډه کې دا پلان مخې ته کړ.

د فلسطین د خپلواکې ادارې تر راتلونکې مشرۍ لاندې د غزې پټۍ د بیارغونې دا پلان د مصر په مشرۍ وړاندې شوی دی.

ولسمشر ټرمپ وړاندیز کړی وو چې د غزې خلک دې نورو هېوادونو او‌ په خاص ډول مصر او اردن ته واستول شي او غزه دې امریکا ته وسپارل شي، دا نوی پلان د ولسمشر ټرمپ د وړاندیز په ځواب کې وړاندې شوی دی.

اسرايل او امریکې دا پلان رد کړی، خو بریتانیې، فرانس، جرمني او ایټلي تایید کړی دی.

تېره ورځ په قطر کې د غزې د ماتېدونکې اوربند په اړه هم تازه خبرې پیل شوې، سټیو ویټکوف د منځګړتوب لپاره منځني ختیځ ته تللی دی.

د قطر د بهرنیو چارو وزارت په بیان کې ویل شوي‌، "وزیرانو په غزه او د فلسطینیانو په نیول شویو سیمو کې د اوربند په ساتلو تاکید او د منصفانه او هر اړخیزې سولې لپاره یې د رښتینو هڅو د پیل په اړتیا ټېنګار وکړ".

د اوربند لومړی پړاو د مارچ په پیل کې پای ته ورسېد او په دویم پړاو باندې یې اتفاق ونه شو. په همدې حال کې اسرايل هم د اوربند د غزولو په هدف قطر ته خپل مذاکره کوونکي‌استولي دي.