پاکستان کې د تېرې فرورۍ په مياشت کې 79 وسله وال، ترهګر بريدونه شوي، تر ټولو زيات 44 بريدونه پکې په خېبرپښتونخوا صوبه کې شوي دي، په پنجاب کې يو برید هم نه دی شوی.
دغه شمېرې غېر دولتي ادارې پاکستان انسټيټيوټ اف کنفلکټ اېنډ سيکيورټي سټډيز، پيکس خپرې کړي دي، پيکس هره مياشت پاکستان کې د وسله والو بريدونو او پکې د اوښتو مرګ ژوبلو شمېرې خپروي.
پرون په دويم مارچ خپور کړي رپورټ کې پيکس ويلي، په ټول ملک کې 79 وسله وال بريدونه شوي، 55 ملکي وګړي او 47 امنيتي عسکر پکې وژل شوي، 81 امنيتي عسکر او 45 ملکي وګړي پکې ژوبل شوي دي.
پيکس ويلي، تر ټولو زيات وسله وال بريدونه په ټوله خېبرپښتونخوا صوبه کې شوي دي. د شمېرو ترمخه پخوانۍ فاټا کې 21 وسله والو بریدونو کې 22 امنيتي عسکر او اته ملکي وګړي وژل شوي دي.
ويل شوي، امنيتي ځواکونو په سیمه کې 98 وسله وال وژلي، 15 یې ژوبل کړي او 50 مشکوک وسله وال یې نيولي دي.
د پيکس له مخې، د زیاتو بریدونو زمه وارۍ تحریک طالبان پاکستان، لشکر اسلام او حافظ ګل بهادر ډلې منلي دي.
د پيکس په رپورټ کې ویل شوي، د پخوانۍ فاټا نه علاوه پاتې صوبه کې 23 وسله والو بريدونو کې 13 امنيتي عسکر او 12 ملکي وګړي وژل شوي او 22,22 ملکي وګړي او منيتي عسکر ژوبل شوي دي.
د تېرو میاشتو په څېر فرورۍ کې هم د خېبرپښتونخوا نه پس زیات بریدونه په بلوچستان صوبه کې شوي دي.
ويل شوي، بلوچستان کې په ترسره شوو 32 وسله والو بريدونو کې د 35 ملکي وګړو، لس امنيتي عسکر په ګډون 11 وسله وال وژل شوي دي.
رپورټ کې ويل شوي، د بلوچستان لبرېشن ارمي، بشير زېب او ازادې ډلې، بي اېل اېف، او يو بي اې د زیاتو بريدونو زمه وارۍ منلي دي.
په رپورټ کې زياته کړل شوې، سيند صوبه کې درېو وړو بریدونو کې يو امنیتي عسکر وژل شوی او پنجاب صوبه کې يو بريد هم نه دی رپورټ شوی او 16 مشکوک وسله وال نيول شوي دي.
پيکس زياته کړې، په فرورۍ کې د پاکستان امنيتي ځواکونو خپل عمليات زيات کړي، 156 وسله وال یې وژلي، 20 یې ژوبل کړي او 66 یې نيولي دي.
پيکس د روان کال د لومړو دوه میاشتو شمېرو کې ويلي، د جنورۍ او فرورۍ په میاشتو کې پاکستان کې ټولې 153 حملې شوي، 104 امنيتي عسکرو او 75 ملکي وګړو په ګډون پکې 179 وژل شوي دي.
ویل شوي په تېرو دوه مياشتو کې د پاکستان امنيتي ځواکونو 364 وسله وال وژلي او 70 مشکوک یې نيولي او په ياده موده کې د تښتونو 46 پېښې هم شوي دي.
خېبرپښتونخوا او بلوچستان صوبو کې د ناامنۍ پېښې دوام لري، دواړه صوبې د افغانستان سره په پوله پرتې دي.
د پاکستان پوځ او حکومت دعوه کوي، د کله نه په افغانستان کې طالبان په واک کې راغلي، پاکستان کې ناامني او ترهګري سېوا شوې ده، او د افغانستان د خاورې نه پاکستان کې ترهګري کيږي، خو طالبانو د پاکستان دغه دعوې او تورونه تل رد کړي او ويلي یې دي پاکستان دې د خپلو ناکامو زمه واري په دوی نه ور اچوي.
Forum