د کرونا وايرس د خورېدو سره سم د ونډو نړیوالو بازارونو تر څنګ د پاکستان د ونډو بازار۱۷۴۲ درجې راغورځولی. د دې ترڅنګ د ډالر په مقابله کې د پاکستاني روپو بېعه هم اتیا پېسې کمه شوې.
د اقتصادو ماهر لحاظ علي وايي د کروناوايرس له امله د پاکستان د ونډو بازار هم مخ په لاندې روان دی. پاکستان زياتره تجارت د چين سره کوي او ورسره د پاکستان د زرمبادلې لويه برخه د امریکا په تجارت اډاڼه لري. د نوموړي په وينا اوس په نړيواله کچه روزګار اغېزمن شوی نو نېغ په نېغه اثر يې د کراچۍ په سټاک اېکسچېنج پریوځي.
د چين په ووهان ښار کې د کروناوايرس مخې ته راتلو وړاندې د پاکستان د ونډو بازار کې مثبت نخښې په نظر راغلې وې او د ډالر قدر د روپۍ په مقابله کې ۱۵۴ ته راښکته شوی ؤ او د ونډو بازار هم ۴۳۰۰۰ سېوا شوی وو.
نن د زیارت په ورځ د کاروباري اونۍ په څلورمه ورځ د نورو ايشيايي بازارونو په رنګ د پاکستان د کراچۍ سټاک اېکسچېنج کې هم تجارتي هلې ځلې کمې شوې دي.
د اخري معلوماتو راتلو پورې د سلو کمپنيو تجارت د ۳۵۹۵۶ باندې روان ؤ. د زيارت په ورځ د پاکستان د ونډو بازار په ۳۶۶۸۹ پواېنټونو پرانستل شوی وو او پکې څلور نيم فيصده کمی ریکارډ شوی.
د اقتصادو استاذ پروفېسر معراج الحق وايي که د کروناخطر زياتېږي نو په کاروباري هلو ځلو به نور هم فشار زيات شي. د نوموړي په وينا چې په نړيوال کچ د ونډې بازارونه اغېزمن شوي او د دې اثر به ارومرو په پاکستان هم کېږي.
بل اړخ ته د دې منفي اغېز له کبله په پاکستاني روپۍ هم فشار زيات شوی دی او د روپۍ په مقابله کې ډالر اتيا پېسې نور هم ګران شوی دی. په پرانستې بازار کې د يو ډالر نرخ ۱۵۷ روپۍ پينځه پېسې وه او يو ډالر په ۱۵۹روپۍ خرڅېدو.
