یورپين یونین وايي د انساني حقونو مسلې حل کولو دلارې پاکستان یورپي تجارتي بازار ته لاس رسی لرلی شي

يورپين یونین ویلي د انساني حقونو په انتهايي اهمو برخه کې د پرمختګ وروسته پاکستان یورپي مارکېټ ته د ټېکس نه بغېر برامدات کولی شي.

د انساني حقونو په اړه د یورپي اتحاد خصوصي استازي اولاف سکوګ د پاکستان د یوې هفتې دورې وروسته د جمعې په ورځ دغه خبرداری جاري کړو.

په وروستي وخت کې په پاکستاني چارواکو دا الزامات زیات شوي چي شهري ازادۍ، سیاسي اختلاف او د بیان ازادي چقوي.

پاکستان ته د هغه د دورې په ختمېدو، سکوګ د یورپين یونین په یو بیان کې وویل د جي اېس پي دلاندې یورپين یونین سره د تجارت نه پاکستان په داسې صورت کې ګټه پورته کولی شي چې د انساني حقونو په شمول یو شمېر مسلې حل کړي او اصلاحات وکړي.

د یورپين یونین د انساني حقونو د ترقۍ منصوبه په عامه توګه جي اېس پي بلل کېږي او ترمخه یې د پاکستان په شمول پرمخته تلونکي ملکونه يورپ تجارتي بازار ته په دې شرط بغېر د ټېکس برامدات کولی شي چې د انساني او د خواریکښو د حقونو په لړ کې به خپلې ذمه وارۍ پوره کوي.

یورپین یونین په خپل بیان کې وویل استازي يې د پاکستاني چارواکو سره په ملاقاتونو کې د مذهب د سپکاوي، په زوره د خلکو د بې درکۍ، د رای او د میډیا ازادي، د انساني حقونو په سر چا ته سزا نه ورکړی کېدل، قانوني بهیر، منصفانه مقدمې، شهري ساهه او د مرګ د سزا په شان د تشویش وړ په موضوعاتو خبرې اترې وکړې.

سکوګ وویل په داسې حال کې چې د پاکستان د څارنې منځنی وخت راغلی دی او پاکستان به د جي اېس پي د نویو قوانین دلاندې بیا خواست کوي د هېواد حوصله افزا کوي چې د اصلاحاتو په لار تګ دوامداره وساتي.

هغه وويل په کال ۲۰۱۴ کې د جي اېس پي د شروع کېدو راهسې پاکستان د دې منصوبې نه د ټولو نه زیاته ګټه ترلاسه کړې ده او د یورپين مارکېټ ته یې په برامداتو کې ۱۰۸ فیصد اضافه شوې ده.

د یورپین یونین د انساني حقونو استازي د پاکستان دوره په داسې حال کې وکړه چې د پاکستان پارلېمنټ دا هفته د سایبر جرمونو خلاف قانون، چې پيکا بلل کېږې، په کې يې لانجمن ترامیم منظور کړل. ناقدین خبرداری کوي چې دا ترميمونه به نه یوازې په روایتي میډیا د بیان په ازادۍ قدغنونه ولګوي بلکې سوشل میډیا به هم په منفي ډول متاثره کړي.

د قانون ترمخه هرڅوک چې قصداً غلط خبرونه خپروي د دریو کالو د قېد او یا د ۷۱۰۰ ډالرو د جرمانې او یا د دواړو غبرګو سزاګانو سره مخامخ کېدلی شي.

وزیراعظم شهبازشریف چې په مخلوط حکومت يې سېنسرشپ د زیاتولو الزامات لګول کېږي، د نوي قانون دفاع کوي، وايي دا د غلطو خبرونو مخنیوي دپاره ضروري دی.

د مطبوعاتو د ازادۍ او د انساني حقونو دپاره کارکونکي ملکي او بهرني تنظیمونه غوښتنه کوي چې دا قانون دې ختم کړی شي.