په پاکستان کې د راتلونکو ۱۵ ورځو لپاره حکومت د تېلو بېې لوړې کړې دي، دا په نزدې ورځو کې پرله پسې دریم ځل دی چې حکومت د تېلو بیې لوړوي.
د پاکستان د خزانې د وزارت له لوري د خپرې شوې اعلامیې له مخې د راتلونکو ۱۵ ورځو لپاره د یو لیټر پټرولو بیه یوه روپۍ اؤ د یو لیټر ډیزلو بیه ۷ روپۍ لوړه کړل شوې ده.
تر دې تازه اضافې وروسته اوس په پاکستان کې د یو لیټر پټرولو بیه ۲۵۷ روپو اؤ ۱۳ پېسو اؤ د ډيزلو بیه ۲۶۷ روپو اؤ ۹۵ پېسو ته رسېدلې ده.
تر دې وړاندې حکومت پرله پسې په دویم ځل په ۱۵م دسمبر د پټرولو د یو لیټر بیه کې درې روپۍ اؤ ۴۷ پیسې اؤ د ډيزلو بیه کې دوه روپۍ اؤ ۶۳ پېسې اضافه کړې وه چې تر دغې اضافې وروسه یو ليټر پټرول په ۲۵۶ روپۍ اؤ ۱۳ پېسو خرڅېدل اؤ د ډيزلو د یو لیټر قیمت ۲۶۰ روپۍ اؤ ۹۵ پېسې ؤ.
د نوي کال په پېل د جنورۍ په وړومبۍ نېته هم حکومت د یو لیټر پټرولو بیه ۵۶ پسې اؤ د ډيزلو بیه ۲ روپۍ اؤ ۹۶ پیسې لوړه کړې وه.
په پاکستان کې د تېرو څو کلونو راپدیخوا هر دوه اونۍ وروسته د تیلو نرخونو ته نوې کتنه کیږي اؤ نوي نرخونه یې ټاکل کیږي.
پېټرول په بنیادي توګه په شخصي ټرانسپورټ، کوچنیو موټرو، رکشو، او د دوو پایه ګانو په ګاډو کې کارول کېږي، چې دا نېغ په نېغه د منځنۍ اؤ ښکته طبقې پر بودیجه اغېزه کوي.
د پاکستان حکومت د پېټرولو او های سپیډ ډیزلو په هر لیټر نږدې 16 روپۍ مالیه اخلي، اؤ ددې سربېره د تېلو کمپنۍ او د هغوی پلورونکي د دواړو توکیو په هر لیټر نزدې 17 روپۍ د وېش او پلورلو په نوم ګټه ترلاسه کوي.
Forum