حماس د اسرایل سره په وروستیو تبادلو کې شپږ نور اسرایلي یرغمل خوشې کړل

د حماس ډلې د خالي یا شنبې په ورځ شپږ نور اسرایلي یرغمل خوشې کړل. دا د اوربند د لومړي پړاو په ترڅ کې د ژوندیو یرغمل شویو اسرایلیانو له ډلې وروستي کسان و چې حماس خوشې کړل.

د اسرایل او حماس ترمنځ د شپږو اونیو اوربند دوه اونۍ پاتې دي خو دواړو خواو تراوسه ددې اوربند د غځولو په اړه موافقه نه ده کړې.
د فلسطیني بندیانو د ملاتړ ډلې ویلي اسرایل به د تبادلې د یوې برخې په توګه نن ۶۰۲ فلسطیني بندیان خوشې کړي چې زیات شمېر یې د غزې اوسیدونکي دي او د جګړې په مهال نیول شوي دي.

یرغمل ۲۷ کلن الیا کوهن، ۲۲ کلن عمر شیم طوب، او ۲۳ کلن عمر ونکرټ، د خپل خوشې کېدو سندونه په لاس کې نیولي وو، کله چې دوی د خالي/شنبې په ورځ د غزې د مرکزي نصیرات کډوالو کمپ کې سره صلیب ته وسپارل شول.

کوهن، طوب، او ونکرټ د ۲۰۲۳ کال د اکتوبر په ۷ مه د حماس له خوا د اسرایل په ضد د ترهګریز برید په مهال د یو موسیقۍ فیسټیول څخه تښتول شوي ول.

سلګونه کسان، چې پکې د حماس وسله‌وال شامل وو، د وسلو، لاسي بمونو، پوځي وردیانو، ماسکونو، او د حماس سر بندونو سره د نصیرات کمپ کې راټول شوي وو کله چې دا یاد کسان خوشي کېدل.

هشام السید، ۳۶ کلن، چې شاوخوا لس کاله مخکې د نامعلومو شرایطو لاندې د غزې تړانګه ته اوښتی او تمه کېده چې خوشې شي، په عام محضر کې و نه وسپارل شو.

دې نه مخکې حماس د هم د خالي/شنبې په ورځ د خوشې کېدونکو شپږو اسراییلي یرغمل شویو له ډلې څخه اول دوه کسان خوشې کړل.

د نړيوالې خبري شبکې اې پي د رپورټ له مخې دغه دوه یرغملیان ۴۰ کلن تل شوهم او ۳۸کلن ایورا مېنګیسټو د حماس نقاب‌پوشه وسله والو د جنوبي غزې په رفح ښار کې د خلکو د یوې غونډې مخې ته پر یو سټېج راوستل، او بیا د سره صلیب موټرو ته انتقال شول.

د حماس له خوا دغه ډول ښکاره مراسم، چې پکې یرغمل شوي کسان ښودل کېدل، او ځینې یې مجبوره کړي ول چې خبرې وکړي، له سختو نیوکو سره مخ شوي، ملګرو ملتونو له خوا پرې هم نیوکي شوي او د “یرغمل شویو کسانو ښودل، یې غندلي.

خو حماس د خالي/شنبې په ورځ دا نیوکې رد کړې، او دا مراسم یې د فلسطیني وحدت د یو نمایش په توګه یاد کړي.

د اې پي له مخې لږ وروسته، د اسرایل پوځ تایید کړه چې یاد دوه کسان اسرایل ته رسول شوي دي.

څو ساعته وروسته، د سره صلیب موټر د نصیرات مرکزي ښار ته ورسېدل، چیرته چې د نورو یرغمل شویو د سپارلو بهیر باید دوام ومومي.

د یرغمالانو د خوشې کیدو دا تازه عمل د هغه تړون یوه برخه ده، چې له مخې یې اسراییل سلګونه فلسطیني بندیان خوشې کوي.

دا پروسه په داسې حال کې پر مخ ځي، چې د دواړو اړخونو ترمنځ تاوتریخوالی زیات شوی، په ځانګړي ډول وروسته له هغې چې حماس د اسرایلي یرغمل شوې مېرمنې شیري بیباس د جسد پر ځای بل غلط جسد وسپاره، چې دا موضوع د سختو غبرګونونو او لانجو لامل شوه.

د قطر د نشریاتي ادارې الجزیزیره د رپورټ له مخې د فلسطیني ډلې حماس وینا وه چې د شپږو یرغمالانو خوشې کول د اوربند په تړون د هغوي د عمل کولو ژمنه څرګندوي.

حماس په اسرایل د اوربند په تړون عمل کولو کې د ځنډ تور هم لګولی دی.

الجزیزې د حماس په حواله ویلي دي چې نن د شپږو بندیان د خوشې کولو په مهال په ګڼ شمیر کې د ولس شتون د اسرایل اؤ د هغوي د ملاتړو لپاره تازه پېغام دی .

حماس د تړون د دویم تړون لپاره خپله امادګي ښودلې ده اؤ د قیدیانو د تبادلې د هر اړخیز عمل بشپړولو ته یې خپله ژمنتیا تکرار کړې ده

له حماس ډلې سره تړلي د فلسطیني بندیانو د رسنیو دفتر ویلي چې تر ۶۰۰ زیات فلسطیني بندیان به هم د یرغملو په بدل کې د اسرایل له زندانونو څخه خوشي کړل شي.

د اسرایل د یرغمل شویو او بې درکه شویو کورنیو ټولنې د دې اونۍ په پیل کې د شپږو یرغمل شویو نومونه خپاره کړي وو، چې پکې الیا کوهن، تل شوهام، عمر شم توف، عمر وینکرټ، هشام السید او اورا منګیستو شامل دي.

حماس د پنجشنبې- زیارت په ورځ هم د څلورو اسرایلي یرغمل شویو کسانو مړي اسرایل ته وسپارل، چې پکې د بیباس د کورنۍ درې غړي او یو بوډا سړی شامل وو، چې د دې ډلې په وینا د جګړې په پیل کې د اسرایل په هوايي برید کې وژل شوي وو.

خو اسرایلي وزیراعظم بینامین نتنیاهو د جمعې په ورځ وویل حماس د ډزبندۍ له تړون سره سم اسرایل ته د یو یرغمال تن مړی نه دی ورکړی او وایي ډله به يې قیمت ادا کوي.

نتنیاهو په یو ویډیو بیان کې وویل د ژوندیو یرغمالان د ستنولو او د مړو جسدونه ترلاسه کولو دپاره به اسرایل په عزم ګامونه پورته کوي او حماس به د تړون د خلاف ورزۍ مکمل قیمت ادا کوي.

د زیارت- پنجشنبې، په ورځ د دوو ماشومانو، د یوې ښځې او د یو سړي مړي اسرایل ته سپارل شوي، خو ویل کېدل چې دغه ښځه د ماشومانو مور ده، خو اسرایل وايي د ماشومانو د مور مړی نه دی ورکړل شوی.

دا لومړی ځل دی چې حماس د یرغمل کسانو مړي اسرایل ته سپارلي دي، حماس دعوه کړې ده چې دا کسان د هغوی له ساتونکو سره یو ځای د اسرایل په هوايي بمباریو کې وژل شوي دي.

د اسرایل د دې تور باوجود چې وایي د یرغمل شوي شیري بیباس مړی حماس نه دی ور سپارلی، د یرغملو د خوشي کېدو دا اعلانونه د دې نخښه ده په غزه کې د ډزبندۍ تړون لا هم پر ځای دی.

د حماس وسلوالو دغه مړي سره صلیب نړیوالې مرستندویه ادارې ته سپارلي وو او وروسته له غزې څخه اسرایل ته لیږدول شوي، چېرې چې په لسګونو کسانو ورته انتظار کاوه.

د اسرایل او حماس ترمنځ د شپږو اونیو د ډزبندۍ دوې اونۍ پاته دي او دواړه خواوې تراوسه ددې اوربند د غزولو په اړه لا کوم تړون ته نه دي رسېدلې.

حماس ټینګار کوي چې د اوربند تړون ته ژمن دي او وایي "په خپل ملکیت کې د هیڅ مړي د ساتلو لپاره څه دلچسپي نه لري".

یادونه:- د رپوټ زیات معلومات له اې پي ،رویټرزراو اې ایف پي خبري ایجنسو اخیستل شوي دي