فلسطیني وسله والې ډلې حماس ویلي د ۶۰۰ فلسطیني قېدیانو د ازادۍ په بدل کې به د څلورو یرغمالانو مړي د زیارت، پنجشنبې، په ورځ اسرایل ته ورکوي. دې سره به په غزه کې د اسرایل او د حماس د ډزبندۍ وړمبۍ مرحله هم سرته ورسېږي.
امريکې ویلي د ډزبندۍ د دویم پړاو په اړه خبرې اترې په ځای دي.
د شورو، چهارشنبې، په ورځ په زرګونو خلکو د شېري بيبس او د هغې د دوو ځامونو په جنازه کې شرکت وکړو. شېري او د هغې ځامن په غزه کې د حماس په ولکه کې وژل شوي او مرګ يې د یرغمالانو د مشکلاتو علامت ګڼل کېږي.
د اسرایل او د حماس د ډزبندۍ دلاندې حماس تر اوسه ۲۵ یرغمالان او اسرایل په سلګونو فلسطیني قېدیان ازاد کړي دي.
د حماس یو چارواکي ای اېف پي خبري ادارې ته وویل منځګړو تنظیم ته ویلي چې حماس او نورې ډلې به د څلورو اسرایلي یرغمالانو مړي اسرایل ته ورکوي او اسرایل به د ۶۰۰ نه زیات فلسطیني قېدیان ازادوي.
د حماس یو بل چارواکي وویل د جسدونو او د فلسطیني قېدیانو د ازادۍ تبادله به په یو وخت کېږي.
د اسرایلي وزیراعظم بېنجمن نېټن یاهو دفتر وویل اسرایل د منځګړو سره ته رسېدلی چې اسرایل ته به د څلورو یرغمالانو مړي ورکول کېږي.
په واشنګټن کې د منځني ختیځ دپاره د صدر ډانلډ ټرمپ استازي وویل د ډزبندۍ په دویمه مرحله خبرو اترو دپاره اسرایلي چارواکي په لاره دي.
د امریکايي یهودیانو یوې دستورې ته سټیو وېټکاف وویل په مذاکراتو کې پرمختګ دوام لري. هغه زیاته کړه چې په دوحه یا قاهره کې به د مصر او قطري چارواکو خبرې اترې بیا شروع کېږي.
حماس ویلي تنظیم تیار دی چې ټول باقي یرغمالان په یو ځای په دویمه مرحله کې ازاد کړي.
د جنورۍ په ۱۹ نېټه د اسرایل او د حماس ډزبندي د شروع کېدو راهسې حماس ۲۵ یرغمالان او اسرایل د ۱۱۰۰ نه زیات فلسطیني قېدیان ازاد کړي دي.
د طبي امداد نړیوالې ادارې انټرنېشنل کميټي اف دي رېډکراس په ټولو فریقېنو غږ کړی چې د قېدیانو او د یرغمالانو تبادله دې په باوقار او د شخصي انداز کې وکړی شي.
په اسرایل کې فلسطیني قېدیان د ترهګرو په څېر لیدل کېږي چې د ملکي خلکو ا د اسرایلي ځواکونو خلاف د پرتشدد حملو په سر نیول شوي دي.
د فلسطینیانو دپاره د قېدیانو ازادي انصاف او د اسرایل خلاف د مزاحمت د علامت په توګه لیدل کېږي.
اسرایل او حماس دواړو په یو بل د ډزبندۍ د خلاف ورزۍ الزامات لګولي دي خو د دې باوجود هم د امن دا لوظنامه په ځای ده.
د کال ۲۰۲۳ د اکتوبر په اوومه نېټه په اسرایل د حماس د حملې په جواب کې اسرایل په غزه کې د حماس خلاف عملیات شروع کړل او لوظ یې وکړو چې حماس به ختموي. د حماس په حمله کې په اسرایل کې تر ۱۲۰۰ پورې کسان وژل شوي او ۲۵۰ نور کسان حماس یرغمال ونیول.
په غزه کې د جنګ د لاسه د غزه د صحت وزارت وايي د ۴۸۰۰۰ نه زیات کسان وژل شوي دي. ملګري ملتونه وايي دا شمېرې د باور وړ دي. اسرایل وايي په غزه کې تر ۱۷۰۰۰ پورې وسله وال يې هم وژلي دي.
Forum