د افغانستان په دوو ولایتونو کې د سختو بارانونو او ږلۍ له امله 29 کسان مړه شوي دي.
د نړیوالې خبري شبکې ای اېف پي د راپور له مخې، د فراه ولایت د طبیعي پېښو د مدیریت د ریاست مشر محمد اسرایل سیار ویلي، چې په دې ولایت کې د ږلۍ د ورېدو له امله 21 کسان مړه شوي او 6 نور ټپیان دي.
نوموړي ویلي، مړه شوي کسان د دوو کورنیو غړي وو، چې د سېل لپاره د ښار نه وتلي وو.
په ورته وخت کې، د افغانستان په جنوبي ولایت کندهار کې د طبیعي پېښو د مدیریت ریاست ویلي، چې د سختو بارانونو له امله په بېلابېلو سیمو کې 8 کسان مړه شوي، چې ښځې او ماشومان هم پکې شامل دي.
د دې ادارې په وینا، 4 ښځې چې په جامو وینځلو بوختې وې، سیلاب وړي، چې یوازې یوه یې ژوندۍ پاتې شوې.
همداراز، په کندهار کې یوه ماشوم سیلاب لاهو کړی، او د یوه کور د چت نړېدو له امله یوه ښځه او درې ماشومان مړه شوي دي.
افغانستان د اقلیم بدلون له سختو اغېزو سره مخ دی
د لسیزو تر جګړو وروسته، افغانستان د نړۍ له هغو غریبو هېوادونو څخه دی، چې د اقلیمي بدلون له سختو اغېزو سره مخامخ دی.
افغانستان د هغو هېوادونو په نوملړ کې شپږم ځای لري، چې د اقلیمي بدلونونو له امله تر ټولو زیات زیانمن شوی دی.
په 2023م کال کې، د ملګرو ملتونو د پرمختیایي ادارې استازي سټیفن روډ ریکس ویلي وو، چې وچکالي، سېلابونه، او د کرنیزو حاصلاتو کمښت، د افغانستان لپاره جدي خطرونه دي
Forum