په پاکستان کې د بشري حقونو فعالانو د هیواد څخه د افغان کډوالو په ځانګړې توګه د افغان ښځو د ایستلو په پرېکړه اندېښې ښکاره کړي او یو ځل غوښتنه یې کړې ده چې دوې ته دې په پاکستان کې د پاتې کېدو اجازه ورکړل شي.
د بشري حقونو فعالانو د پاکستان له حکومت غوښتنه کړې ده چې نړیوالو هیوادونو سره د کډوالو په ستونزه خبرو کې مرسته وکړي تر څو دوې ته یو دریم هیواد ته د تګ اجازه ورکړل شي.
د مارچ په اتمه په اسلام اباد کې شوي د عورت مارچ په مهال د بشري حقونو فعالانو د خپلو حقونو د غوښتنو تر ځنګ د افغانستان د ښځو د حقونو لپاره هم غږ پورته کړو او وي ویل د طالبانو د واک تر لاسه کولو وروسته په افغانستان کې دننه او بهر تر ټولو زیاتې افغان ښځې او نجونې اغیزمنې شوې دي.
د ښځو د حقونو مبارزه سیده مجیبه بتول ډیوه ته وویل،د افغان ښځو سره تر ټولو زیات ظلم کیږي ، د هغوي څخه د ژوند ټوله حقونه اخستل شوي اؤ د ټکنالوژۍ او معلوماتو په دې دور کې هم د دوي پر تعلیم او کار بندیز لګول شوی او کورونو کې کښېنول شوې دي.
هغې وویل باید د ټولې نړۍ ښځې د دوي د حق لپاره غږ پورته کړي.
په عورت مارچ کې په پټه ګډون کوونکې یو افغان کډوالې د خپلې پېژندګلو نه څرګندولو په شرط ډیوه ته وویل د پاکستان په شمول ټوله نړۍ مونږ بیرته هلته لیږل غواړي چرته چې غږ هم نشو کولی، د حق غوښتنه خو لرې خبره ده.
ددغه افغان مېرمنې (چې نوم یې نه ښودلو) وینا وه "زه درې کاله وړاندې د افغانستان څخه راغلې وم، زما کوچني ماشومان دي، د طالبانو له وجې افغانستان ته نشو تللی، نو چرته ولاړ شو. زه د پاکستان حکومت څخه خواست کوم، مونږ دې دلته پریږدي یا نورو هیوادونو سره دې خبرې وکړې چې یو دریم هیواد ته زمونږ د تګ مسله حل شي"
پاکستان په دې وروستیو کې د ترهګرۍ د زیاتیدونکو پیښو پړه پر اورپکو ډلو اچوي اؤ تور لګوي چې دا اورپکي له افغانستان څخه فعالیت کوي.
ددې تر څنګ پاکستاني چارواکي دا هم وایي چې په ملک کې د تاوتریخوالي پېښو کې د افغان کډوالو د ګډون ثبوتونه لری خو په افغانستان واکمن طالبان دغه تورونه په سختۍ سره ردوي او غوښتنه کوي چې د افغان کډوالو د ویستلو عمل دې وځنډول شي.
د روانې مارچ میاشتې په اوومه پاکستان افغان سټیزن کارډ لرونکو افغان کډوالو ته هم امر وکړو چې د مارچ تر ۳۱ نیټې پوری له هیواده ووځي او یا د اپریل د لومړۍ نیټې څخه په زور د ایستلو له عمل سره مخامخ شي.
ردا خان
د بشرې حقونو فعاله ردا خان ډیوه سره خبرو کې وایي "د افغان ښځو د ویستلو کوم عمل چې روان دی په دې اړه مونږ غږ رابرسیره کوو ولې چې په افغانستان کې د ښخو لپاره هیڅ ژوند نشته"
هغه وایي" په افغانستان کې دا مهال انجونې یوازې تر شپږم ټولګي پورې تعلیم ترلاسه کولی شی نو تر دې وروسته به د دوي څه ژوند وي چې نه کار کولی شې او نه اعلا تعلیم تر لاسه کولی شی. افغانان په پاکستان کې د کلونو راهسې اوسي. دا ملک د هغوی هم دی"
د ملګرو ملتونو د کډوالو ادارې (یو این ایچ سي ار) له اړخه د مارچ په اوومه د خپرو شوو معلوماتو له مخې، کال ۲۰۲۳ اکتوبر کې د اسناد نه لرونکو افغانانو د ویستلو د عمل شورو کیدو راهسې په زور د ویستل شوو د څلویښتو زرو افغانانو په شمول تر اوسه له 842,000 څخه زیات افغانان خپل هیواد ته ستانه شوي. چې د یوې اندازې تر مخه پکې د څلورو لکو څخه زیاتې ښځې او ماشومان دي.
بشرې حقونو فعاله فاظمه عاطف ډیوه سره خبرو کې وایي پاکستان کې افغان ښځې د تورنو خلکو په رنګه د کورونو څخه نیول کیږي او واپس خپل ملک ته لیږل کیږي.
هغه وایي "په دغو ښځو کې سیاست مدارې، مطبوعاتي غړې یا د بشرې حقونو فعالانې شته چې خپل ملک ته د تلو سره ورته د ژوند خطر دی. زموږ غوښتنه ده چې د افغانانو د ویستلو عمل دی په سمدستې توګه ودرؤل شي"
د ښځو د نړیوالې ورځې په مناسبت ملګرو ملتونو هم په افغانستان له واکمنو طالبانو څخه غوښتي چې د ښځو او نجونو پر حقونو دې بندیز ختم کړي.
Forum