د ملګرو ملتونو د ایټمي څار ادارې انټرنشنل ایټامک انرجي ایجنسۍ (IAEA) په خپلو دوو تازه رپورټونو کې ویلي، چې ایران د یورینیم د غني کولو سطحه د ۶۰ سلنې کچې ته رسولې، چې دا د ایټمي وسلو جوړولو لپاره پکار ۹۰ سلنې ته نزدې ده.
د خبري شبکې رایټرز د راپور له مخې، ایران له دسمبر میاشتې راهیسې د یورینیم ذخیره زیاته کړې، چې دا پرمختګ د لویدیځو هېوادونو لپاره د سختې اندېښنې وړ بلل شوی.
لویدیځ قوتونه وایي، چې په دومره لوړه کچه د یورینیمو غني کول هېڅ منطقي جواز نه لري، ځکه چې دا یوازې پوځي اهدافو ته لار هواروي خو ایران ادعا کوي، چې دوی یوازې د پرامنه ایټمي انرژۍ ارزو مند دي
د امریکایي صدر ډونلډ ټرمپ انتظامیې ویلي چې د ایران د ایټمي فعالیتونو پر ضد به خپلو فشارونو ته دوام ورکړي.
بل لور ته، آي اې اي اې خبرداری ورکړی، چې د ایران د ایټمي سرګرمیو پر وړاندې د سفارتي هڅو وخت مخ په ختمېدو دی، او ښايي د نوو بندیزونو لګولو ته اړتیا پیدا شي.
د ایټمي انرژۍ نړیوالې ادارې په خپلو دوو تازه راپورونو کې ایران ته غیر معمولي اشاره کړې، چې پکې ویل شوي"د جوهري موادو د تیارونکي یوازیني ایټمی وسلو نه لرونکي ریاست له لوري د اعلا یورینیم پېداوار کې ډاګیزه اضافه د بې کچه اندېښنې وړ ده"
د رایټرز له مخې د شورو په ورځ غړو هیوادونو ته د لېږدول شوؤ دې خفیه رپورټونو څخه څرګندیږي چې هر څو که د ۶۰ سلنه موادو ذخیره نیمایي زیاته شوې ده خو په نامعلومه مقاماتو کې د یورنیمو د غیر واضحه موجودیت په ګډون له اوږدې مودې راهسې د ځند ښکار ستونزو په هواري کې هیڅ حقیقي پرمختګ نه دی شوی.
د آی اې اي ای د راپورونو له مخې، د ایران د ۶۰ سلنه غني شوو یورینیمو ذخیره د هیکسا فلوراید په شکل کې د ۶۰ سلنې ریفاینډ یورینیم ذخیره په تېره سه ماهۍ یا درې میاشتیزه کې ۹۲.۵ کیلوګرامه سیوا شوې اؤ اوس ۲۷۴.۸ کیلوګرامه ته رسېدلی. که نور غني شي، نو دا اصولاً شپږو ایټمي بمونو جوړولو ته کافي ګڼل کېږي.
ډونلډ ټرمپ د خپلې لومړۍ واکمنۍ پر مهال د ایران اؤ نړیوالو طاقتونو تر منځ شوي تاریخي تړون څخه امریکا بیله کړې وه چې د هغې په اساس په ایران لګیدلو بندیزونو کې د نرمۍ په بدل کې د تهران په ایټمي فعالیتونو سخت بندیزونه لګول شوي وؤ خو په کال ۲۰۱۸م کې د ټرمپ لخوا ددې تړون څخه تر وتلو وروسته ایران د دې حدودو څخه سرغړونه کړې وه
اوس دا تړون تقریباً له منځه تللی، او اروپایي هېوادونه هڅه کوي چې د ایران د ایټمي پروګرام د محدودولو لپاره امریکا بېرته دې تړون ته راولي. که چیرې نوی تړون ونه شي، نو د اکتوبر د میاشتې پای ته له رسېدو مخکې، لویدیځ هیوادونه هڅه کوي چې پر ایران ټول بندیزونه بیا ولګوي.
Forum