د پاکستان پوځ وايي، خېبر کې یې لس وسله وال وژلي

د پاکستان پوځ ويلي، د افغانستان سره په پوله پرتې خېبر ضلعه کې یې عمليات کړي، لس وسله وال یې وژلي دي.

پوځ پرون په 24مه فرورۍ ويلي، د 23مې او 24مې فرورۍ په مينځنۍ شپه کې یې د خېبر ضلعې په باغ علاقه کې د استخباراتو په بنياد عمليات کړي، لس خوارج یې وژلي دي.

د پاکستان پوځ تحریک طالبان پاکستان د خوارج په نوم يادوي.

پوځ د وژل شوو وسله والو نور تفصيل نه دی ویلی.

د پاکستان پوځ چې کومو سيمو کې عمليات کوي هلته جرنلسټان يا مطبوعات رسايي نه لري، ځکه د ازادو سرچينو څخه د عملياتو په اړه تاييد نه کيږي.

پوځ دا عمليات په داسې وخت کې کړي چې هم په دغه شپه د افغانستان سره په پوله پرتو شمالي او جنوبي وزيرستان کې په امنیتي پوستو وسله والو بريدونو کې لږ تر لږه څلور پاکستاني امنیتي عسکر وژل شوي او څلور نور ژوبل شوي وو.

په دې وروستيو کې د پاکستان پوځ په شمالي او جنوبي وزيرستان کې د وسله والو ضد عملياتو دعوې کړي چې پکې يې وسله والو ته په غټه کچه د مرګ ژوبلې اړولو هم ويلي وو.

پوځ په 23مه فرورۍ ناوخته ويلي، د ډېره اسماعيل خان په درابڼ او مدې علاقو کې یې د استخباراتو په بنياد دغه عملیات کړي دي.

ويل شوي، امنيتي ځواکونو ته په درابڼ کې د وسله والو د موجودګۍ خبر وو، هلته یې عمليات کړي څلور خوارج یې وژلي دي. او بل د مدې په علاقه کې د وسله والو سره نښته شوې، درې خوارج وژل شوي دي.

په 21مه فرورۍ پوځ ويلي وو، کرک کې يې عمليات کړي، شپږ وسله وال یې وژلي وو.

او په 17مه فرورۍ پوځ ويلي وو، د جنوبي وزیرستان په سراروغه علاقه کې یې د استخباراتو په بنیاد علمياتو کې 30 وسله وال وژلي وو.

د پاکستان پوځ چې کومو سيمو کې عمليات کوي هلته جرنلسټان يا مطبوعات رسايي نه لري، ځکه د ازادو سرچينو څخه د عملياتو په اړه تاييد نه کيږي.

په تېره يوه اوونۍ کې په وزیرستان، ډېره اسماعيل خان، کورمه او خېبر کې په بېلابيلو بريدونو او پېښو کې لږ تر لږه 15 پاکستاني عسکر وژل شوي وو.

د خېبرپښتونخوا په جنوبي او افغانستان سره په پوله پرتو قبايلي ضلعو کې د ناامنۍ پېښې سېوا شوي دي.