یو امریکايي جج په خپله دا فېصله په ځای وساتله چې چارواکي دې د کولمبیا یونېورسټۍ ګرفتار طالب علم محمود خلیل ډيپورټ یا ملک بدر نه کړي. د خلیل مقدمه د صدر ډانلډ ټرمپ د حکومت د دې لوظ مرکزي نقطه جوړه شوې ده چې په امریکايي کالجونو کې د فلسطینیانو حمایت کوونکي فعالان به د ملک نه وېستل کېږي.
یو اېس ډسټرکټ جج جېسي فرمن د دې هفتې په شروع کې چارواکي په عارضي ډول خلیل د ملک بدر کولو نه منع کړي وو خو د شورو، چهارشنبې، په ورځ يې په نیویارک کې په وفاقي عدالت کې د اورونې وروسته خپل امر و غځولو. جج وویل وخت اخیسل غواړي او کتنه وکړي چې ایا د خلیل ګرفتاري خو د ایین خلاف ورزي نه ده؟
د امریکې د قومي امنیت وزارت، ډپمارټمنټ اف هوم لېنډ سېکیورټي، ډي اېچ اېس، وايي ۳۰ کلن خلیل د هغه قانون دلاندې ملک بدر کېدلی شي چې ترمخه يې د امریکې خارجه وزیر دا فېصله کولی شي چې که چېرې د کډوال موجودګي د امریکې د خارجه تګلارې سره سمون نه خوري هغه د ملک نه وباسي. دا خبره په یو دستاوېز کې شوې چې روېټرز خبري ادارې کتلی دی.
په نهم مارچ ليکل شوي دستاوېز کې خلیل په مخاطب کولو ويل شوي چې د امریکې خارجه وزیر دا تعین کړی دی چې په امریکا کې د ستا موجودګي یا فعالیتونه د خارجه تګلارې په لړ کې د امریکې دپاره سنګین منفي مضمرات لرلی شي. خلیل ته امر شوي چې د مارچ د میاشت په ۲۷ نېټه د اېميګرېشن یا د مهاجرت د مقدمو جج مخې ته حاضر شي.
د ډي اېچ اېس په دستاوېز کې نور تفصیل نه دی ورکړی شوی او په دې اړه د روېټرز پوښتنو ته جواب نه دی ورکړی.
خلیل د اتوار، یکشنبې، په ورځ د نیویارک په مېنهېټن برخه کې هغه ته د یونېورسټۍ وړکړي کور نه بهر ګرفتار کړی شو. د هغه وکیلان وايي هغه ځکه نیول شوی چې په غزه د اسرایل د پوځي یرغل مخالفت يې کولو او دا ډول د هغه د بیان د ازادۍ خلاف ورزي شوې چې د امریکې د ایین وړمبۍ ماده يې ضمانت ورکوي. اسرایل د کال ۲۰۲۳ د اکتوبر په اوومه نېټه په اسرایل د حماس د حملې په جواب کې د فلسطیني مسلح ډلې خلاف په غزه کې پوځي عملیات شروع کړل.
د خلیل وکيل رمزي قاسم عدالت ته وویل چې هغه ځکه نیول شوی او ډيپورټ کولی شي چې هغه د فلسطینیانو د حقونو وکالت کولو.
مطبوعاتو سره په خپله وړمبۍ مرکه کې د خلیل مېرمن نوره عبدالله، د اتوو میاشتو حامله ده، په عدالت کې د اورېدنې وروسته روېټرز سره په خبرو اترو کې يې وویل امید کوي چې اینده میاشت د ماشوم د زېږېدنې په وخت په خلیل ازاد شوی وي. هغې وویل ډېر جذبات او درد محسوسوي هغه په حقیقت کې قدم په قدم ځما سره و.
قاسم د عدالت نه بهر خبریالانو ته وویل ډي اېچ اېس چې د کوم قانون ذکر کوي هغه ډېر کم استعمالېږي او د مخالفت خاموشه کولو دپاره نه دی.
خلیل په شام کې د فلسطیني کډوالو په یو مهاجر کېمپ کې پېدا شوی او په کال ۲۰۲۲ کې امریکې ته د طالب علم په ویزه راغلی و او تېر کال ورته په امریکا کې مستقل رهایش یا ګرین کارډ ورکړی شو. هغه په کولمبیا یونېورسټۍ کې د اسرایل د خلاف د احتجاجي مظاهرې پېژندل شوي څېره وه.
د امریکې صدر ډآنلډ ټرمپ په سوشل ميډیا ویلي چې خلیل د حماس حمایت کولو خو د هغه حکومت په خلیل د څه جرم الزام نه دی لګولی او نه یې هم حماس سره د هغه د مبینه ملاتړ څه ثبوت وړاندې کړی.
ډ ټرمپ حکومت وايي د کولمبیا یونېورسټۍ په شمول په امریکايي کالجونو کې د فلسطینیانو په حق کې په مظاهرو کې د حماس حمایت او د یهودي طالب علمانو د ویرولو د اېنټي سېمېټزم یا د یهودیانو نه د کرکې پېښې هم شوي دي. د مظاهرو منتظمین وايي په اسرایل تنقید په غلطه توګه اېنټي سېمېټزم بلل کېږي.
د امریکې خارجه وزیر مارکو روبیو د شورو، چهارشنبې، په ورځ د ایرلېنډ د دورې په مهال خبریالانو ته د خلیل د ګرفتارۍ په اړه وویل د دې تعلق د بیان د ازادۍ سره نه دی. روبيو وویل که څوک د حماس حمایتي وي او د امریکې یونیورسټیانو ته راځي او په سر يې ودروي نو که دغه تن دا خبره امریکې ته د راتګ په وکړي نو هېڅ کله به ورته اجازت نه ورکول کېږي.
دا مقدمه د اېميګرېشن عدالتونو دپاره یو ټېسټ کېدلی شي چې د بیان د ازادۍ او د هغه تنظیمونو سره د تړون ترمنځ کرښه کوم ځآی راښکي چې امریکا يې په مبینه توګه ترهګرې دلې بلي.
د خلیل د مقدمې د اورېدنې په موقع په سلګونو مظاهره چیان په مېنهېټن کې د عدالت نه بهر جمع شوي وو ځینو قبطې پورته کړې وې چې په کې غوښتنې شوې وې چې خلیل دې ازاد او ډیپورټ نه کړی شي.
په عدالت کې د مقدمې د سماعت په مهال سرکاري وکیل برېنډن واټرمېن، وویل د خلیل مقدمه دې نیوجرزي ته منقتل کړی شي چې چېرته چې هغه اول بندي ساتل شوی و او یا دې لویزيانا ریاست ته منقتل کړی شې چېرته چې هغه اوس مهال په حراست کې دي.
د عدالت جج فرمن امر وکړو چې خلیل ته دې اجازت ورکړی شي چې د دوو دوو ګنټو دپاره د شورو، چهارشنبې، او د زیارت، پجشنبې، په ورځ د خپلو وکیلانو سره په شخصي کچه خبرې اترې وکړي. د دې نه مخکې د هغه وکیل عدالت ته وویل خلیل د خپلو وکیلانو سره د لويزيانا د حراستي مرکز نه یو وارې په ټېلې فون خبرې کړي دي خو د ټېلې فون لیکه د وخت نه مخکې قطع کړی شوی وه او حکومت يې څارنه کوله او خبرې یې ریکارډ کولې.
Forum