افغانستان کې د جاپان خیریې موسسې مشر ډاکتر ناکامورا مړی نن د خالي یا شنبې په ورځ د ځانګړو مراسمو وروسته جاپان ته انتقال شو.
په دغه ځانګړو مراسمو کې د افغانستان ولسمشر اشرف غني ویلي ډاکتر ناکامورا د افغانستان او جاپان یو اتل افغان وو.
په کابل کې د حامدکزي هوايي ډګر څخه جاپان ته ډاکټر ناکامورا جسد د افغانستان په بیرغ پوښل شوي وو د لیږدولو مراسمو کې ولسمشر غني، ګڼو نورو افغان چارواکو او د افغانستان د ختیځ ننګرهار ولایت یوشمیر قومي مشرانو ګډون وکړ.
ولسمشراشرف غني په دې مراسمو کې وویل ډاکټرناکامورا یو اتل افغان وو، د هغو د هڅو او کار له امله په سلګونه زره افغانان له وچکالۍ ژغورل شوي او د کنړ په سیند د سربندونو په جوړلو سره لمې ځمکې تر اوبو لاندې راغلي دي.
اشرف غني وویل:٫٫ نن ډیره د خواشینی ورځ ده، ډاکتر ناکامورا هغه ستر شخصیت وو چې خپل ژوند یې د افغانستان د محرومې طبقې د خلکو د ژوند د پیاوړتیا او د دې وطن د ابادولو لپاره وقف کړی وو او یوهمعقوله یې درلوده او ویل یې که د کنړ سیند اوبه خوندي کول غواړۍ لیونۍ مینه او لیونۍ اراده غواړي.٬٬
اشرف غني زیاته کړې ډاکتر ناکامورا افغاني الاصله افغان وو او له همدې امله د افغانستان خلکو او د جاپان هیواد ته تسلیت وايي.
ولسمشر په خبرو کې زیاته کړه ناکامورا د جاپان د ولس اتل و د ده مینه له انسان سره وه او قاتلین به یې جهنم ته ځي.
اشرف غني د جاپان خیریې موسسې د مشر د انتقال په مراسمو کې وویل د افغانستان اتل اردو، پولیس او امنیت به دده د قتل خاینان پیدا کوي او د قانون منګلو ته به یې سپاري.
په حامدکرزي نړیوال هوايي ډګر کې جوړ شویو مراسمو کې په افغانستان کې د جاپان هیواد سفیر او همداراز د ناکامورا میرمن او د هغه لور برخه اخیستې وه.
د پي ایم ایس په نوم د جاپاني موسسې مشر تتسو ناکامورا د تیرې چهارشنبې په ورځ له خپلو ۵ افغان همکارانو سره چې ۴ امنیتي سرتیري او یو یې موټر چلووونکی و ختیځ ننګرهار کې د نامعلومو کسانو لخوا په برید کې وژل شوي و.
افغان چارواکو ویلي ډاکتر ناکامورا په تیرو دریو لسیزیزو کې د افغانستان د بې وزله زرګونو کسانو درملنه کړې او په تیرو ۱۶ کلونو کې په ختیځ ننګرهاراو کنړ ولایتونو کې د ځمکو د خړوبولو لپاره لسګونه د اوبو سربندونه جوړ کړي او پر ځینو نورو یې کار روان و.
د ناکامورا وژنه په افغانستان کې په پراخه کچه وغندل شوه او ګڼو افغان ځوانانو او مدني فعالانو د هیواد په بیلابیلو بروخو کې د هغه د یاد په خاطر شمعې بلې کړي او له افغان حکومت نه وغوښتل شول چې هغه د وژنې عاملین پیدا او قانون پرې پلی کړي.
