کوهاټ کې د سي ټي ډي پوليس دوه اهلکار وژل شوي

د خېبرپښتونخوا کوهاټ ضلعه کې نن په لسم مارچ د ترهګرۍ ضد پوليس څانګې سي ټي ډي دوه اهلکار نامعلومه وسله والو په ډزو وژلي دي.

د کوهاټ پوليسو په وينا، دا پېښه د تانده ډېم په روډ نن سهار شوې ده.

ويل شوي، د نامعلومه وسله والو په ډزو کې (اې ایس آی، تاڼدار) مصطفا خان او (هېډ کانسټېل، حوالدار) زاهد په نخښه شوي دي.

د پوليسو په وينا، دواړه پوليس اهلکار په موټر سايکل دفتر ته په لار وو او ويشتل شوي دي.

چارواکو ويلي، د پېښې وروسته، پېښه کې د ککړو حملو کوونکو ضد په علاقه کې د لټون عمليات پيل کړل شوي دي.

تراوسه پورې په پوليسو د بريد زمه واري چا نه ده منلې.

د کورنيو چارو وزير محسن نقوي د پوليسو وژنې د پېښې غندنه کړې ده.

د خېبرپښتونخوا د ترهګرۍ ضد پوليسو (سي ټي ډي) په وينا، په 2024م کال کې د ترهګرۍ ضد عملياتو کې د خېبرپښتونخوا 149 پوليس وژل شوي او 232 ژوبل شوي وو.

سي ټي ډي ويلي، د پوليس او امنيتي ادارو سره په مقابلو کې د فتنه الخوارج (تحريک طالبان پاکستان) 270 ترهګر وژل شوي او 802 نيول شوي وو.

د تېر کال په 27م دسمبر د پاکستان د پوځ وياند لفټننټ جنرل احمد شريف چودري ويلي وو، په 2024م کال کې د ترهګرۍ ضد عملياتو کې د پوځ 383 افسران او عسکر وژل شوي وو.

هغه ويلي وو، امنيتي ځواکونو او قانون نافذونکو ادارو 59,775 عمليات کړي، د تحریک طالبان پاکستان د وسله والو په ګډون 925 وسله وال وژل شوي، او دا په تيرو پينځو کلونو کې تر ټولو غټه شمېره ده.

پاکستان کې د تېرې فرورۍ په مياشت کې 79 وسله وال، ترهګر بريدونه شوي، تر ټولو زيات 44 بريدونه پکې په خېبرپښتونخوا صوبه کې شوي وو.

غېر دولتي ادارې پاکستان انسټيټيوټ اف کنفلکټ اېنډ سيکيورټي سټډيز، پيکس د رپورټ ترمخه، په ټول ملک کې 79 وسله وال بريدونه شوي، 55 ملکي وګړي او 47 امنيتي عسکر پکې وژل شوي، 81 امنيتي عسکر او 45 ملکي وګړي پکې ژوبل شوي وو.

پيکس ويلي، تر ټولو زيات وسله وال بريدونه په ټوله خېبرپښتونخوا صوبه کې شوي وو، د شمېرو ترمخه پخوانۍ فاټا کې 21 وسله والو بریدونو کې 22 امنيتي عسکر او اته ملکي وګړي وژل شوي دي.

ويل شوي، امنيتي ځواکونو په سیمه کې 98 وسله وال وژلي، 15 یې ژوبل کړي او 50 مشکوک وسله وال یې نيولي وو.

د پيکس له مخې، د زیاتو بریدونو زمه وارۍ تحریک طالبان پاکستان، لشکر اسلام او حافظ ګل بهادر ډلې منلې وې.

د پيکس په رپورټ کې ویل شوي، د پخوانۍ فاټا نه علاوه پاتې صوبه کې 23 وسله والو بريدونو کې 13 امنيتي عسکر او 12 ملکي وګړي وژل شوي او 22,22 ملکي وګړي او منيتي عسکر ژوبل شوي وو.