خېبرپښتونخوا کې د تېرو پينځو ورځو راهسې په دمې دمې سره د بارانونو لړۍ روانه ده، د 26مې فرورۍ راهسې تراوسه پورې ترسره شوو بارانونو له امله پېښو کې لږ تر لږه څلور تنه مړه او نهه نور ژوبل شوي دي.
يادې شمېرې خېبرپښتونخوا کې د قدرتي افتونو په وخت د انتظام ادارې [پي ډي اېم اې] نن په درېيم مارچ شريکې کړي دي.
پي ډي اېم اې ويلي، مړه شوو کې درې سړي او يوه ښځه او ژوبلو کې ښځې او ماشومان شامل دي.
د بارانونو له امله پېښې په خېبر، تورغر، هنګو، دير، باجوړ، کوز او بر کوهستان، بټګرام او هريپور کې شوي دي.
ويل شوي، باراني پېښو کې 14 کورونه هم اغېزمن شوي دي.
د موسمياتو محکمې د سبا څلورم مارچ پورې د خېبر پښتونخوا ضلعې په برنو غرنو سيمو کې د باران، سيلۍ او واورو وړاندوينه هم کړې ده.
د موسمياتو محکمې د واورو د لاسه د لارو بندېدو، بارانونو له امله د غرونو ښوېدو او ږلۍ کېدو امکان څرګند کړی دی.
ويل شوي، سېلانیان او مسافر دې ځان خبر ساتي او احتياطي تدابير دې خپل کړي.
Forum