د پاکستان د سرحداتو وزیر شهریار افریدي ویلي د افغانستان او پاکستان خاوره باید د یو بل په خلاف استعمال نشي.
شهریار افریدي دغه خبرې د گل، دوشنبې، پشین ته څیرمه د سرانانو افغان کډوالو کېمپ یا پنډغالي د دورې په مهال هلته یوې غونډې ته وکړې.
شهریارافریدي چې د سرحداتو ترڅنگ د قبایلي چارو او نشۍ توکیو د مخنیوي وزیر هم دی وویل، "د پاکستان خاوره باید افغانستان پر ضد استعمال نه شي او د افغانستان خاوره د پاکستان پر ضد نشي استعمال... موږ دوه اسلامي ورونه هیوادونه یو."
شهریارافریدي د سرانانو په کېمپ کې غونډې ته وویل چې د پاکستان حکومت به په هېواد کې د موجودو افغان کډوالو ستونزې هواروي.
د سرحدي چارو وزیر دغه ژمنه په داسې حال کې وکړه چې پاکستان د افغانانو دپاره په هیواد کې د پاتې موده د کال ٢٠٢٠ د جون د ٣٠ نېټې پورې وغځوله.
که څه هم ښاغلي افریدي وویل د پاکستان حکومت افغان کډوالو ته د اسانتیاو برابرولو کوښښونه کوي خو په سرانانو کېمپ یا پنډغالي کې د کډوالو مدني فعال ظاهرپښتون وویل په کېمپ کې میشته افغانان د یوشمېر شتونزو سره مخامخ دي.
د سرانانو په کېمپ کې غونډې ته ظاهرپښتون وویل
د افغان مهاجرو د POR او ACC کارډنو لپاره د پاکستان حکومت اضافه وخت ورکړی مګر ځیني امنیتي ادارې دا نه مني او افغانان د پولې پورې غاړ په ناقونه توگه لېږل کیږي.
ښاغلي پښتون وویل په سرانانو کې مېشته افغانان د تېرو ٣٠ کلونو راهسې د اوبو د کمي سره مخاخ دي، د افغان کډوالو په لېسو یا سکولونو کې له تیرو پنځو کالو څخه د نهم ټولګیو څخه تر دوولسم ټولګیو پوري په ټول بلوچستان کې یو دانه کتاب نه ترلاسه کېږي نو د پاکستان حکومت، UNHCR او افغان حکومت دې دا ستونزه حل کړي.
ظاهر پښتون وویل د انساني همدردۍ او اسلامي ورولۍ په خاطر دې افغان کډوالو ته هم د برق (بجلي) او ګېس اسانتياوې برابرې شي.
شهریارافریدي وويل چې د "ستاسي د کتابونو، صحت، تعلیم د اوبو او کارډونو او د امنتیي ادارو لخوا د زورولو د ستونځوو په ختمولو کې به جدي اقدام کوو."
ښاغلي افريدي وويل چې د پاکستان نوی حکومت افغان کډوالو ته د اسانتیاو برابرولو کوښښونه کوي او زیاته یې کړه چې دا لومړي ځل دی چې په پاکستان کې میشته د ١۴ لکو افغان کډوالو لپاره پر POR کارډ د بینک اکاونټونه خلاصولو اسانتيا موقع ورکړی شوې ده. " د پخواني حکومتونو له خوا چې ستاسي سره کوم ظلم شوی پر هغه زه ستاسو څخه بخښنه غواړم."
په غونډه کې د بلوچستان د افغان کډوالو لپاره کمیشنر بريګېډیر(ر) احمد مسعود او د بلوچستان د UNHCR د څانګي د پشین د سیمي مسؤل اورنګزیب اڅګزې هم موجود وو. د غونډي په اخېره کې ظاهر پښتون د افغان کډوالو په استازیتوب او د پښتنو کلتوري روایت په توگه شهر يار افريدي ته پګړۍ ور پر سر کړل شو.
