د پاکستان پوځ ویلي دافغانستان سره په پوله پرته د خیبر پښتونخوا په جنوبي وزیرستان ضلع کې د وسله والو سره جګړه کې دپوځ د یو افسر په ګډون دوه عسکر وژل او دوه وسله وال وژل شوي دي.
وسله والې تحریک طالبان پاکستان په پوځ د برید زمه داري پغاړه اخستې ده
د پوځ د مطبوعاتو څانګې اي اېس پي ار مطبوعاتو ته ورکړی شوي بیان کې وویل چې د پوځ او وسله والو جګړه د افغانستان پولې ته نژدې د جنوبي وزیرستان په انګور اډه سیمه کې شوي ده او د ډزو په تبادله کې دوو عسکرو ترڅنګ دوه وسله وال هم وژل شوي دي.
پوځ وویل عسکرو وسله او چاودېدونکی مواد قبضه کړي دي.
د پوځ د بیان نه وړاندې امنیتي سرچینو وي او ای ډیوه ته ویلي وو د خالي، شنبې، په شپه د انګور اډې سیمې سره جوخت دبیرمل تحصیل په سرې کنډه سیمه کې د وسله والو سره نښتې هغه مهال شوي چې د پوځ په یوه پوسته یې د درنو او سپکو وسلو سره برید وکړو.
اي اېس پي ار وویل وسله والو سره جګړه کې د پوځ افسر میجر شجاعت او یو بل عسکر وژل شوي او دوه نور عسکر ټپيان شوي دي.
ټپیان شوي عسکر دهیلي کاپټر د لارې روغتون ته رسول شوي دي.
سرچینو زیاته کړې له برید وروسته امنیتي ځواکونو د پیښې دځائ نه د دوؤ وسله والو مړي هم تر لاسه کړي دي.
د پاکستاني طالبانو ویاند میډیا ته بیان کې دې برید کې د لسو عسکرو د مرګ ژوبلې دعوه کړې ده. یو بل ته د تلفاتو اړولو په اړه د وسله والو او نه هم د پوځ د بیانونو په ازاده توګه تصدیق کېدلي شي .
دطالبانو ویاند ویلي پوځي عسکر د دوئ پرضد استخباراتي عملیاتو له ورغلي ؤ چې د هغوی پرضد دوئ ځوابي برید ترسره کړو او هغوې ته یې درنه مرګ ژوبله اړولې ده.
بیرمل تحصیل انګور اډه علاقه د ضلعې مرکز واڼا نه 50 کلوميټره لودیز د افغان پولې سره جوخته پرته ده. او دې ځائ ته د میډیا رسد نه کیږي .
د چارواکو په وینا د بريد وروسته په علاقه کې د لټون عمليات پېل کړی شوي اؤ یو ځېنې شکمن کسان هم له سیمې څخه نیول شوي دي.
د افغانستان سره په پوله پرتې قبايلي سيمې جنوبي وزيرستان کې د پاکستان پوځ په کال 2009م کې د راه نجات په نوم عملیات پیل کړي وؤ اؤ پوځ ادعا کوي چې سيمه يې په بشپړ ډول د ترهګرو نه پاکه کړې ده.
د پاکستان د پوځ ویاند میجر جنرل بابر افتخار د جنورۍ په پینځمه دعوه کړې وه چې په ملک کې د ردالفساد په عملياتو کې ټولې دترهګرو ځالې ختمې کړی شوي دي خو په 25م مارچ د شمالي وزیرستان په دته خېل تحصیل کې په پاکستاني پوځ برید شوی ؤ، چې د پوځ په وینا څلور پوځیان پکې وژل شوي وؤ.
همدارنګه د مارچ 29مه نېټه هم په ټانک او جنوبي وزیرستان ضلعو کې پر پوځ بریدونه شوی وؤ چې د یو کپتان په ګډون نهه پاکستاني پوځیان پکې وژل شوي ؤ.
د دغه بريدونو زمه واري هم تحریک طالبان پاکستان منلې وه.
