پاکستان د امریکايي کانګرس د ځینو غړو دا غوښتنه غندلې چې عمران خان دې ازاد کړی شي

د پاکستان د بهرنیو چارو دفتر د60 امریکایي کانګرس غړو لخوا ولسمشر جو بایډن ته یو لیک لیږل چې د برطرفه شوې وزیراعظم عمران خان د خوشې کیدو غوښتنه یې کړې په کلکه غندلی.

د بهرنیو چارو د دفتر ویاندې ممتاز زهرا بلوڅ د زيارت په ورځ په یوه اونیزه غونډه کې وويل د پاکستان کورنیو چارو کې دا ډول مداخله د ډیپلوماتیکو اصولو خلاف ده او د پاکستان او امریکا اړیکې زیانمنولی شي.

نوموړې تينګار وکړ چې د پاکستان په کورنیو چارو تبصرې کول د هغو اصولو سره سمون نه لري چې د دوو هیوادونو تر منځ د متقابل احترام او همکارۍ اړیکې یې تعریف کړې دي.

ممتاز زهرا بلوڅ وویل: "د امریکا او پاکستان تر منځ اوږدې مودې همکارۍ اړیکې شتون لري، خو د دې ډول لیکونو له لارې په زموږ داخلي چارو کې مداخله د منلو وړ نه ده او د ډیپلوماتیکو اصولو خلاف کار دی."

د امریکا د استازو جرګې له 60 څخه زیاتو ډیموکراټ قانون جوړوونکو په یوه لیک کې د صدر بایډن څخه غوښتنه کړې چې د عمران خان د خوشې کولو لپاره خپل نفوذ وکاروي.

د روېټرز خبري اژانس د راپور له مخې، قانون جوړوونکو په لیک کې لیکلي: "موږ له تاسو (بایډن) څخه غوښتنه کوو چې د پاکستان له حکومت سره د امریکا مهم نفوذ وکاروئ، ترڅو د سیاسي بندیانو خوشې کېدل یقیني شي، چې پخوانی وزیراعظم عمران خان هم پکې شامل دی، او د بشري حقونو سرغړونې محدودې شي."

د کانګرس غړي ګرېګ کاسر په مشرۍ لیکل شوي دې لیک کې ویل شوي: "د امریکا د کانګرس ګڼ غړي دا لومړی ګډ غوښتنه کوي چې عمران خان دې خوشې شي. که څه هم هغه د امریکایي بهرنۍ پالیسۍ اوږدمهاله منتقد پاتې شوی او له واشنګټن سره یې اړیکې تل ترینګلې وې."

عمران خان له اګست 2023 څخه په زندان کې دی او پر هغه ګڼ قضیې چلول کېږي.

د ډیموکراټ قانون جوړوونکو په لیک کې په پاکستان کې د ټاکنو د شفافیت په اړه هم اندېښنه ښودل شوې.

د پاکستان حکومت له عمران خان سره د "ناانصافۍ" تورونه ردوي، او د انتخاباتو کمېسیون ادعا کوي چې په عمومي ټاکنو کې درغلي نه ده شوې.

د واشنګټن په وینا، د فبرورۍ په میاشت کې کېدونکي ټاکنې 'آزادې او منصفانه' نه شي ګڼل کېدای.

برېتانیې، اروپايي اتحادیې او ملګرو ملتونو هم په پاکستان کې د عامو ټاکنو په اړه اندېښنه څرګنده کړې وه.

تر دې وړاندې، په جولای ۲۰۲۴ کې د ملګرو ملتونو د بشري حقونو کاري ډلې د عمران خان د خوشې کېدو غوښتنه کړې وه او ویلي یې و چې د پاکستان د پخواني وزیراعظم بندي کول 'د نړیوالو قوانینو سرغړونه' ده.