د پاکستان حکومت د تېلو بیې ټیټې کړې

د پاکستان د خزانې وزارت په خپله اعلامیه کې ویلي چې د هاي سپیډ ډیزلو بیه په یو لیټر کې 5 روپۍ اؤ 31 پیسې ټیټه شوې اؤ د پټرولو نرخ په یو لیټر کې یوازې 50 پیسې کم شوی دی.

اعلامیه زیاتوي چې د پټرولو د یو لیټر نوې بیه 255 روپۍ 63 پیسې او د هاي سپیډ ډیزلو د یو لیټر بیه 258 روپۍ 64 ټاکل شوې ده.

همدا شان د خاورو د تېلو نرخ 3 روپۍ 53 پیسې او د لایټ ډیزلو بیه 2 روپۍ 47 پیسې د لیټر په سر راټیټه شوې ده.

په پاکستان کې د تېرو څو کلونو راپدیخوا هر دوه اونۍ وروسته د تیلو نرخونو ته نوې کتنه کیږي اؤ نوي نرخونه یې ټاکل کیږي.

پېټرول په بنیادي توګه په شخصي ټرانسپورټ، کوچنیو موټرو، رکشو، او د دوو پایه ګانو په ګاډو کې کارول کېږي، چې دا نېغ په نېغه د منځنۍ اؤ ښکته طبقې پر بودیجه اغېزه کوي.

د پاکستان حکومت د پېټرولو او های سپیډ ډیزلو په هر لیټر نږدې 16 روپۍ مالیه اخلي، اؤ ددې سربېره د تېلو کمپنۍ او د هغوی پلورونکي د دواړو توکیو په هر لیټر نزدې 17 روپۍ د وېش او پلورلو په نوم ګټه ترلاسه کوي.