نړیوال یا ورلډ بېنک خپل یو تازه رپورټ کې ویلي چې پاکستان خپل قامي امدن زیاتولو دپاره نه خو نورو ټېکسونو ته او نه هم د ټېکس شرح زیاتولو ته اړتیا لري.
د ډان ورځپاڼې ترمخه، ورلډ بېنک دغه څرگندونې د پاکستان د ټېکسونو په نظام کې چټکتیا راوستلو په اړه رپورټ کې کړې دي.
د ورلډ بېنک موندنې داسې حال کې هم مخې ته راغلي دي چې پاکستان خپل خراب اقتصاد بهتر کولو دپاره د مالیاتي ادارې ايي ایم اېف سره د اربونو ډالرو قرض دپاره خبرې پېل کړې دي او د رپورټونو ترمخه، ايي اېم اېف پاکستان ته ویلي چې نوي ټېکسونه دې ولگوي او د ځینو موجوده ټېکسونو شرح دې زیاته کړي.
ورلډ بېنک ویلي که چېرې پاکستان د د ټیکس د وصولۍ شرح ٧٥ فېصد ته ورسوي نو دا به د هېواد د قامي امدن ٢٦ فېصد برخه وي چې د منځنۍ کچې د هېوادونو دپاره د امدن مناسب کچه ده.
ورلډ بېنک رپورټ وايي د پاکستان د ټېکس یا محصولاتو مامورین یوازې د ټېکس ٥٠ فيصد برخه راټولوولو کې کامیابېږي.
د ډان ورځپاڼې د رپورټ ترمخه، ورلډ بېنک په خپل رپورټ کې تجوزیر کړی دی چې د پاکستان د ټېکس راټوولو محکمه فېډرل بورډ اف رېوینیو یا ایف بي ار کې د اصلاحاتو او د ټېکس په مد کې د صوبو او وفاقي حکومت ترمنځ د همکاري زیاتولو ضرورت دی چې د نشتوالي له امله یې د رپورټ ترمخه د ټېکس په راټولو منفي اثر غورځېږي.
د پاکستان د خزانې پخوانی وزیر او اقتصاد پوهه سلمان شاه هم د ټېکس په نظام کې د اصلاحاتو په ضرورت زور واچوي. هغه وویل پکار ده چې د ټېکس پالېسي یا تگلاره او د ټېکس نظام ډیر ساده وي او ترڅو چې داسې وه نشي د ټېکس امدن نشي زیاتېدی. هغه وویل د ټېکس د شرحې د کمولو هم ضرورت دی.
پاکستان د نړۍ په هغو هېوادونو کې شامل دی چې پکې د خلکو د ټېکس ورکولو شرح ډیره کمه ده خو هېواد په دې مد کې څه نه پرمختگ کړی دی او د تېرو کلونو په مقابل کې دا وخت په قامي امدن کې د ټېکس نه د ترلاسه شوي امدن شرح ١٣ فیصد ته رسېدلې ده.
درپورټونو ترمخه، د موجوده مالي کال په لومړیو نهو میاشتو کې د پاکستان د ټېکس اداره ایف بي ار د ٣٠٠ ارب روپو کې کمي سره مخامخ دي.
