واشنګټن سره نږدې د مسافرو هوايي جهاز او د هېلې کاپټر د ټکر وروسته د ۴۰ نه د زیاتو کسانو مړي د سیند نه راوېستل شوي دي

په بېړني حال کې د امدادي ادارو چارواکو د جمعې په ورځ وویل د امریکې سرښار واشنګټن سره نږدې د مسافرو هوايي جهاز او هېلې کاپټر د جنګدو او دواړه جهازونه په سیند کې د غورځېدو وروسته امدادي کارکوونکو د اوبو څخه د ۴۰ نه د زیاتو کسانو مړي راوېستلي دي.

د مسافرو جهاز او هېلې کاپټر د شورو، چهارشنبې، په ماسخوتن د رونلډ رېګڼ واشنګټن نېشنل ایرپورټ نومې هوايي اډې سره نږدې په هوا کې وجنګېدل او د هوايي اډې خوا کې سیند ته ورغورځېدل. چارواکو ويلي په پېښه کې څوک ژوندی نه دی پاتې.

د جمعې په ورځ د لمر راختلو سره سم امدادي ادارو خپلې هلې شروع کړې.

د امېرېکن ایرلاینز پرواز په جهاز کې ۶۴ مسافر او د عملې غړي سواره وو. په پوځي هېلې کاپترې د عملې درې عسکر وو.

د دې نه مخکې امدادي کارکوونکو د ۲۸ کسانو مړي راوېستلي وو.

د امریکې د مختلفو ادارو تحقیق کارانو د امېرېکن ایرلاینز د مسافرو د جهاز بلېک باکسز یا د پرواز رېکارډ ساتلو الې موندلي دي. د مسافرو جهاز د شورو، چهارشنبې، په ماسخوتن هېلې کاپټر سره د جنګېدو وروسته په پوټومېک دریاب کې وغورځېدو.

نېشنل ټرانسپورټېشن سېفټي بورډ به د جهاز د پرواز د ریکارډ ساتلو الې او د کاک پېټ د رېکارډر نه معلومات اخلي او د پېښې د اسبابو په اړه معلومات به د ترلاسه کولو کوښښ کوي.

د ایرپورټ په کنټرول ټاور کې په عمومي توګه دوه کنټرولران خو د پېښې په شپه یو کنټرول و. دا خبره د فېډرل اېوېشن اېډمنسټرېشن په تحقیقاتو کې موندل شوې ده.

صدر ډانلډ ټرمپ د زیارت، پنجشنبې، په ورځ دوه حکمنامې دستخط کړې. په یوه حکمنامه کې د اېف ای ای نایب مشر وګمارل شو او په بله حکمنامه کې د وفاقي حکومت د تنوع اقدامات بېرته واخیستل شوو.

په وایټ هاوس کې د حکمنامې د لاس لیک کولو په موقع ټرمپ وویل ممکنه ده چې د تنوع پروګرام په دې پېښه کې لاس لرلو.

د دفاع وزیر پيټ هېګسېت د زیارت، پنجشنبې، په ورځ وویل هېلې کاپټر د معمول مطابق د شپې کلیز مشق کولو چې د پرواز په مهال يې څه غلطي وشوه. هغه وویل هېلې کاپټر چې په کوم اوچتوالي پرواز کولو په دې اړه په سمدستي ډول تحقیقات شروع کړی شوي دي.

د مسافرو هوايي جهاز په هوايي اډه د کوزېدو تیار کولو چې د هېلې کاپټر سره وجنګېدو. د ټرانسپورټېشن وزیر وویل جهاز درې ټکړې شو او د هوايي آدې په خوا کې سیند ته وغورځېدو.

د چارواکو په قول هوا او د اوبو څپو د جهازونو ملبه د دوو کلومېټرو علاقې پورې خوره کړې ده.

امدادي کارکوونکو د سیند نه د ۲۸ کسانو مړي راویستلې دي چې په کې د هېلې کاپټر د عملې درې واړه غړي هم شامل دي.

دا په نږدې کلونو کې د امریکا کې د هوابازۍ په صنعت کې د ټولو نه خونړۍ پېښه وه. د دې نه مخکې په ۲۰۰۱ کې د امېرېکن ایرلاینز پرواز په نیویارک کې غورځېدلی و او ۲۶۰ کسان په کې مړه شوي وو.

یادونه: د وي او ای د دې خبر ځینې معلومات د ای پي، ای اېف پی او روېټرز خبري ادارو نه هم اخیستل شوي دي