د کوزې کورمې اوسېدونکي وايي، د علاقې به ونه وځي

د افغانستان سره په پوله پرتې د خېبرپښتونخوا ناارامه ضلعې کوزې کورمې اوسېدونکي وايي، صوبايي حکومت چې د کومو علاقو خالي کولو فيصله کړې، دوی ته دغه فيصله منظوره نه ده او د علاقې به ونه وځي.

څيړونکي وايي په صوبه کې د تحریک انصاف حکومت په کورمه کې د امن په ځای کولو کې سنجيده نه دی.

خېبرپښتونخوا کې د تحریک انصاف ګوند صوبايي حکومت پرون په 19مه فرورۍ ويلي، کورمه کې به په هر قيمت امن قايمولی شي.

صوبايي حکومت ویلي، د رياستي عملدارۍ په ځای کولو دپاره، تازه د ډزو پېښه کې ککړو ضد سختې کاروايۍ پرېکړه شوې، د اوچت، مندوري، داد کمر او بګن خالي کولو فيصله شوې ده.

خو د کوزې کورمې د بګن ځايي مشر محمد کريم اورکزی وايي، "مونږ ته دا فيصله نامنظوره ده، که بمباري راباندې کوي او که هر څه کوي، مونږ د کورونو نه نه وځو، په بره کورمه کې وسله پرته ده، هلته ولې اپرېشن نه کوي".

وي او اې ډیوه سره خبرو کې نوموړي وويل، "د امن حل د پاړا چنار اپرېشن دی، کوزې او مينځنۍ کورمې کې درې اپرېشنې وشوې".

هغه زياته کړه، په بګن کې د دوی د دوه نيمو میاشتو راهسې احتجاجي ناسته روانه ده، غوښتنې یې د بګن اباد کاري او پاړاچنار اپرېشن دی.

د کوزې کورمې مندوري يو بل سياسي فعال عبدالقادر اورکزی وايي، "خلک په دې فيصله خوشاله نه دي، خلک به چرته ځي، بندوبست ورته نه کيږي، خلک بې ځايه کيږي، که خلک لرې شي نو څه به وشي".

وي او اې ډيوه سره خبرو کې نوموړي وويل، "حکومتي رټ دې په ځای کړل شي، حکومت به سنجيده اقدامات کوي، يواځې اعلانونه دې نه کيږي، ضلعه کې پوځ، ملېشه او پوليس موجود دي، بيا حکومت څنګه رټ نه شي قايمولی".

هغه هم دعوه وکړه، "د کورمې رټ د پاړاچنار نه خراب دی، بره کورمه کې عمليات پکار دي، هلته د کورمې د انتظاميې او ملېشې مرکزونه دي، د کوزې کورمې اپرېشنې شوي دي".

د خېبرپښتونخوا حکومت کوزمه کورمه کې د څلورو علاقو خالي کولو فيصله په داسې وخت کې کړې، چې د فرورۍ په 17مه، د کورمې په ناامنه سیمو کې د مرستو لپاره په روان کاروان برید شوی او د دغه کاروان د ژغورلو هڅو کې پينځه امنیتي عسکر وژل شوي وو.

حکومت ويلي، په امدادي قافله شوي برید کې د لاس لرنې په تور 11 وسلوال نیول شوي دي.

د دې ترڅنګ په کورمه کې د 14 وسلوالو د سرونه قیمتونه ټاکل شوي، چې تر ټولو لوړ قیمت پکې د کاظم نومې وسله وال کماندر د سر درې کروړه روپۍ ټاکل شوي دي.

خو څيړونکی خبريال رفعت اورکزی وايي، د تحریک انصاف صوبايي حکومت د کورمې د امنيت په لړ کې بې غوره ښکاري.

وي او اې ډیوه سره خبرو کې نوموړي وويل، کورمه کې د جايداد مسلې دي، د فرقه واريت مسله حساسه ده، د جايدادونو شخړې په فرقه ييزه شخړو بدلې شي او دغه سيمه جغرافيايي اهميت لري، د افغانستان سره پولې او نزدې د تګ راتګ لارې لري.

د صوبايي حکومت د تازه فيصلې په اړه نوموړی وايي، "په دغو سيمو کې خو اپرېشن وشو، هیڅ مزاحمت ورته نه دی شوی، اوس نه ده معلومه چې حکومت د دې نه کوم مقصد ترلاسه کول غواړي".

هغه وويل،په کورمه کې "تراوسه هرڅه په رڼا ورځ وشو، حکومت يو تن ونه نيولو، دا علاقه د پاکستان جوړېدو څخه د پخوا راهسې حساسه ده، دلته فريقېن د يو بل نه بدله اخلي، او حکومت یې نندارې کوي".

د نوموړي اورکزي په خبره، "کورمه کې په 21م نومبر په قافله حمله وشوه، په 23م او 24م نومبر د بګن بازار وسوځول شو، او هم په 24م نومبر وزیراعلا علي امين ګنډاپور په اسلام اباد ورغلو. د تحریک انصاف د حکومت دپاره عمران خان اهم دی، کورمه ورته اهمه نه ده".

نوموړي وويل، "حکومت تراوسه پورې په کورمه کې په امن قايمولو کې ناکامه دی، صوبايي حکومت تشې دعوې کوي، خلکو له او ځانله دوکه ورکوي، تراوسه يو سنجيده ګام نه دی پورته کړل شوی".

د خېبرپښتونخوا حکومت په کورمه کې د امنیت قايمولو دپاره بيا بيا د اقداماتو اعلانونه او وعدې کوي، او پرون بيا وزیراعلا علي امین ګنډاپور ويلي، د کورمې په ناامنۍ کې بهرني لاس ککړ دي.

کورمه ته تلونکې غټه لاره د ناامنۍ له امله د څلورو میاشتو نه زیاتې مودې راهسې تړلې پرته ده.

د کورمې د شخړې هواري لپاره د جنورۍ په وړومبۍ نېټه کوهاټ کې د حکومت په مرسته شوې جرګه کې د شيعه او سني فريقېنو ترمنځ امن تړون لاسليک کړی وو.

خو د دغې لوظنامې لاسليک کېدو وروسته هم په کورمه کې نه وسله راغونډه کړل شوې او نه ټل۔پاراچنارلاره په مکمله توګه پرانستل شوې ده.

د جنورۍ په 31مه په کوهاټ کې د حکومت په مرسته دواړو فريقينو ترمنځ جرګه شوې وه چې پکې د شوې لوظنامې 14 نکاتو عملي کولو په لړ کې دواړو خواو حکومت ته د کمېټيانو جوړولو لپاره د څوارلسو، څوارلسو تنانو نومونه ورکړي وو.

د فرورۍ په درېيمه نیټه پېښور کې د شيعه او سني ټولنو د مشرانو ترمنځ د ټل۔پاړاچنار لارې د پرانستلو، وسلې غورځولو او په سيمه کې پاتې مورچو ړنګولو په هکله جرګه شوې وه.

د جرګې غړو هیله ښودلې وه چې ډیر زر به د کورمې د شخړې حل راوباسي، خو په کورمه کې تراوسه بشپړ امن نه دی په ځای کړل شوی.