کوټه کې دایف سي د عسکرو په ګاډي چاودنه شوې،د یو عسکر په ګډون پکې اته کسان ژوبل شوي

د بلوچستان ایالت په سر ښار کوټه کې د ایف سي ځواک دعسکرو د ګاډي تر څنګ بمي چاودنه شوې چې د یو عسکر په ګډون پکې اته کسان ژوبل شوي دي.

د پولیسو د وینا له مخې دا چاودنه د جمعې په ورځ په کوټه کې د ګیلاني اؤ جان محمد سړک په څلور لاري هغه مهال شوې چې د ایف سي عسکرو ګاډی په سړک تېریدو.

پولیس وایي چاودنه کې استعمال شوي باردوي توکي په یو موټر سایکل کې اېښودل شوي وؤ اؤ کله چې د ایف سي ګاډی له دغه ساحې تېریدو نو چاودنه پرې وشوه.

پولیسو منلې چې چاودنه کې د ایف سي د یو عسکر په ګډون اته تنان ژوبل شوي دي.

د پېښې سره سم په ګڼ شمیر کې امنیتي عسکر اؤ مرستندویه فعالان د پېښې ځاي ته رسیدلي اؤ ژوبل کسان یې د کوټې سول روغتون ته انتقال کړي دي.

د کوټې د سول روغتون ویاند وسیم بیګ هم ډیوه ته پخلی کړی چې هسپتال ته اته زخمیان ور وړل شوي دي.

په سمدستي توګه ددې چاودنې ذمه واري چا پغاړه نه ده اخستې خو په نزدې وختونو کې چې بلوچستان کې په امنیتي ځواکونو څومره بریدونه شوي هغې کې د زیاترو ذمه واري بلوڅ بیلتون پاله ډلو پغاړه اخستې ده.

د پاکستان بلوچستان صوبه د یوې اوږدې مودې راهسې د ناکرارۍ سره مخ ده اؤ دغلته که یو خوا د ریاست نه مرورې بلوڅ وسله والې ډلې وخت په وخت په امینتي ځواکونو مرګوني بریدونه کوي نو بلخوا د صوبې د حقونو په غوښتنه اؤ د جبري بې درکیو په ضد سیاسي ګوندونه اؤ مدني ټولنه هم وخت په وخت احتجاجونه کوي.

بلوچستان د رقبې په لحاظ د پاکستان تر ټولو ستره صوبه ده خو په پسماندګۍ کې هم د هیواد تر ټولو پسمانده صوبه ګڼل کیږي.

په دغه کړکیچ ځپلې صوبه کې د قدرتي وسیلو پریمانه ذخیرې وجود لري چې هرکال دپاکستان قامي خزانې ته د اربونو روپو ګټه ورکوي خو د بلوچستان قام پرست تنظیمونه اؤ سیاسي ګوندونه وایي چې په قدرتي وسیلو دپور مامور دې صوبې وګړي پخپلو وسیلو اختیار نه لري اؤ ګټې یې ټولې بهر روانې دي.

وخت په وخت مخې ته د راغلو شمیرو اؤ معلوماتو له مخې بلوچستان نه ترلاسه کیدونکی قدرتي ګیس دپاکستان د26 فیصده ابادۍ ضرورتونه پوره کوي خو پخپله دبلوچستان زیاتره سیمې دتېرو اویاؤ کالو راهسې دګیس داسانۍ نه محرومې ساتل شوې دي.

بلوچستان کې د قدرتي ګیس ترڅنګ د معدنیاتو نورې ډير سترې ذخیرې هم موجودې دې چې هغې کې د سرو زرو،سپینو زرو، اوسپنې،کرومایټ، تانبې، چونې، قیمتي کانو، سنګ مرمرو وغیره ذخیرې شاملې دي.

پخپلو وسیلو د اختیار نه لرلو پرضد د اوږدې مودې نه بلوچستان کې ګڼ شمیر بلوڅ تنظیمونه په وسله وال مقاومت بوخت دي اؤ غوښتنه لري چې د بلوچستان په وسیلو دې د دې صوبې خپلو وګړو ته واک اختیار ورکړل شي.

خو د پاکستان د مرکزي حکومت چارواکي بیا د بلوڅ وسله والو ډلو تورونه ردوي اؤ وایي دوي د بهرنیانو دښمنانو په مرسته د بلوچستان د ترقۍ مخه نیول غواړي اؤ نه پرېږدي چې په بلوچستان کې ترقیاتي کارونه وشي یا خلک په سوله کې ژوند وکړي.