مارکو روبیو د امریکا او یوکرین ترمنځ خبرو اترو لپاره سعودي عرب ته رسېدلی دی

د امریکا د بهرنیو چارو وزیر مارکو روبیو د ګل ، دوشنبې په ورځ د امریکا او یوکرین ترمنځ د خبرو لپاره د سعودي عرب جدې ښار ته رسېدلی دی.

ښاغلې مارکو روبیو به دغه خبرو کې د صدر ډانالډ ټرمپ په استازیتوب د روس او یوکرین د جګړې د چټک ختمولو باندې ټینګار کوي.

د امریکا د بهرنیو چارو وزارت ویاندې ټیمي بروس په خپل یو بیان کې وویل، چې مارکو روبیو به په دغه سفر کې د سعودي عرب د ولیعهد محمد بن سلمان آل سعود سره هم ویني او په سیمه کې به د ګډو ګټو د پراختیا او د امریکې او سعودي عرب د اړیکو د پیاوړتیا پر لارو چارو بحث وکړي.

ښاغلي روبیو جدې ته د سفر په مهال خبریالانو ته وویل: زه د هغه څه په اړه کوم شرطونه نه ټاکم چې دوی یې باید وکړي یا ورته د کولو ضرورت لري. زه فکر کوم چې موږ غواړو چې هغوی خبرې واورو چې دوی مخکې تلو ته څومره لیواله دي، او بیا یې هغه غوښتنو سره پرتله کړو چې روسیان یې غواړي، او به وګورو چې ترمنځ یې څومره فاصله ده. “

د بهرنیو چارو وزارت ویاندې ټېمي بروس وايي، مارکو روبیو د جمعې په ورځ د یوکرین د بهرنیو چارو له وزیر ایندري سَیبیها سره په ټیلیفون خبرې کړې او هغه ته یې "د صدر ټرمپ دا هوډ څرګند کړی چې غواړي جګړه زر ختمه کړي او ټینګار یې کړی چې پکار دی ټول اړخونه د دوامداره سولې لپاره ګامونه واخلي".

د ګل ، دوشنبې په ورځ یوکرین صدر ولادي میر زېلنسکي په سعودی عرب کې د سعودي عرب له ولیعهد محمد بن سلمان آل سعود سره لیدلي خو هغه به د نهې په ورځ امریکایي چارواکو سره خبرو کې برخه نه اخلي.

د نهې، سه شنبې په ورځ به د زېلنسکي چیف اف سټاف یا دفتر مشر ایندري یرمک په مشرۍ کې د یوکرین یو سفارتي او پوځي پلاوی د امریکایي چارواکو سره د خبرو لپاره سعودي عرب کې وي. د اوکراین په ډله کې به ایندري سَیبیها ، د دفاع وزیر رستم عمروف او د پوځ کمانډر پاولو پالیسا هم شامل وي.

د مارکو روبیو سره به له یوکریني چارو سره په دغو خبرو کې د امریکې د ملي امنیت سلاکار مایک والټز او د منځني ختیځ لپاره د صدر ټرمپ ځانګړی استازی سټیو ویټکوف هم شامل وي.

سټیو ویټکوف خبریالانو ته ویلي دي چې "بنیادي مقصد دا دی چې د سولې د تړون او ابتدايي جنګ بندۍ لپاره یو چوکاټ برابر شي".

د امریکا او یوکرین ترمنځ دا خبرې درې اوونۍ وروسته له هغې کېږي چې جګپوړو امریکايي چارواکو په ریاض کې د روسي چارواکو سره لیدلي وو.

یوکرین وايي د امریکې سره رغوونکو خبرو ته "پوره ژمن» دی او هیله لري چې "په ضروري پرېکړو او اقداماتو باندې بحث او اتفاق» وشي.

تېره ورځ د اوکراین صدر زېلنسکي پر خپل ایکس باندې په یو پوسټ کې لیکلي وو چې له اولې شېبې د سولې غوښتونکی دی او وایي د سولې لپاره یې ریښتیني وړاندیزونه پر مېز ایښي دي او مهمه ده "چې چټک او اغېزناک حرکت" وشي.

په سعودي عرب کې له ملاقاتونو وروسته به د امریکې د بهرنیو چارو وزیر مارکو روبیو کېنېډا ته سفر کوي او هلته به د جي-7 هېوادونو د بهرنیو چارو د وزیرانو په غونډه کې ګډون کوي. دا غونډه د مارچ له 12مې تر 14مې پورې کیږي.

په فرورۍ کې د جرمني له میونیخ امنیتي کانفرنس وروسته د جي-7 هېوادونو د بهرنیو چارو وزیرانو په خپله ګډه اعلامیه کې په یوکرین کې د "دوامداره سولې" د راوستو لپاره پر خپلو ژمنو ټېنګار وکړ او "د یوکرین لپاره د ټینګ امنیت د ضمانتونو اړتیا تکرار کړه".